Ерөнхийлөгчийн авчирсан ҮАБЗ-ийн Ажлын албаны дарга Б.Хурц хаана явна.  “Онгоцноос буулаа, Германчууд, та эрх чөлөөтэй гэхээр нь гараад ирлээ” гэж утсаар ярьсан гэх мэдээллээс хойш таг чиг. Эрээд сураад ч олдохгүй юм. Ирээд арав гаруй хоносон ч өнөөдрийг хүртэл түүнийг хэвлэл мэдээллийнхэн лав олж харсангүй. Ганц зураг ч гарсангүй. Түүнийг Монголд буусныхаа маргааш ажилдаа орсон гэх боловч Төрийн ордонд түүнтэй тааралдсан хүн алга. Ажлынхаа ширээний ард суугаа төрхийг нь харсан хүн гарч ирсэнгүй. Хэвлэлийнхэн хоёр долоо хоног араас нь хөөцөлдөөд юу ч олсонгүй. Эцэстээ “Б.Хурц Монголд яг ирсэн юм уу” гэх мухардалд ч орж байх шиг. Тэрбээр Германаас Монголд гэнэт буусан гэх. Түүнтэй хамгийн ойр холбоотой байсан Гадаад харилцааны дэд сайд Б.Болор Монголд Б.Хурц ирэх гэж байна гэдгийг нэг цагийн өмнө мэдсэн гэдэг. Ер нь Б.Хурц буруугүй л юм бол яагаад өнөөдрийг хүртэл мэдээлэл хийж олны өмнө гарахгүй байна вэ. Гэмт хүн гэлбэлзэнэ гэдэг үг байдаг даа. Эсвэл тэр Монгол Улсын нууцаар эрх чөлөөгөө солиод ирэв үү. Ингэсэн гэм буруугаа цагаатгаж цайруулах хор найруулж яваа юм биш биз гэх хардлага ч байна. Мэдээж хэрэг, түүнийг олон асуулт хүлээж байгаа.
Тэр иргэн Д.Энхбатыг Францаас хулгайлж авчирсан. Д.Энхбатад С.Зоригийн хэргийг тулгах гэж тамлан зовоосон. Эцэст нь Д.Энхбат эрүү шүүлтийг нь давж чадалгүй нас барсан. Энэ бүхэнд хэн буруутай вэ гэсэн олон асуулт хүлээж байна.
Талийгч Д.Энхбатын дүү Д.Баяр нэгэнтээ “Ахынхаа амийг би Монголын төрөөс нэхнэ” гэж байсан удаатай.
Хэн түүнийг гадаадаас авчирч үхэлд хүргэв. Англи, Германы хуулийн байгууллага Б.Хурцыг хууль зөрчсөн, гэмт хэрэгтэн гэдгийг нотолсон. Монголын төр ямар тохиролцоонд хүрч Б.Хурцыг эх оронд нь авчирсан бэ. Герман Б.Хурцын оронд юу нэхэж шантаажилсан бол. Тэр одоо хаана байна. Амарч зугаалж явна уу, эсвэл ажлаа хийж байна уу. Баттай гээд хэлж болох хоёр ч эх сурвалжийн мэдээлэл хоорондоо зөрсөн юм. Гадаад харилцааны дэд сайд Б.Болор “Б.Хурц зусландаа амарч байгаа гэсэн. Тийм их ойр дотны хүн биш болохоор яг хаана байгаа гэдгийг нь сайн мэдэхгүй байна” гэв. Гэтэл ҮАБЗ-ийн нарийн бичгийн дарга М.Ганболд “Б.Хурц ажлаа хийж байгаа. Өчигдөр бид хоёр уулзсан” гэж хэлсэн.

Бид Б.Хурцыг хайн өчигдөр Зайсан дахь гэрт нь очсон юм. Зайсан хотхоны 58 дугаар байр гэх гурван давхар хаусанд Б.Хурцынх байдаг ажээ. Орцных нь гадаа түүний 77-71 УБӨ улсын дугаартай “Volkswagen” маркийн машин байв. Түүнийг өнгөрсөн сарын 28-нд “Чингис хаан” олон улсын нисэх буудалд буухад энэ машинаар гэрийнхэн нь тосч авсан юм. Энэ машин Батын Хурцын нэр дээр 2007 оны долдугаар сард Монголд орж ирсэн аж.
Бид гэрийнх нь үүдэнд хүрч ирсэн ч хамгаалалтын залуугийн шаардлагаар байрны хашаанаас гарсан юм. Хэдэн цагийн турш гэрийнх нь үүдийг харуулдсан ч гурван орцтой тус хаусанд ганц ч хүн орж, гарсангүй.
11:20 цагт тэдний хашаа ны гадаа 77-71 УБЦ улсын дугаартай цагаан өнгийн “Старекс” машин ирсэн юм. Энэ машин нь Б.Хурцын эхнэр Ү.Сарнайн “Сарнайх” компанийн нэр дээр 2007 онд орж ирсэн аж. Тус машин хашааны үүдэнд хоёр цаг гаруй зогсч байгаад дотогшоо орсон. Б.Хурцын амьдардаг Зайсан хотхонд гурван орцтой дөрвөн хаус байдаг. Юутай ч энэхүү хотхоноос 11:15 цагт 00-12 УБЗ улсын дугаартай, 11:40 цагт 88-88 УНК улсын дугаартай машинууд гарч явсан юм.

“Хурцаа ах ирсэн. Би таарсан”
Бид 15:00 цагийн үед хотхоны хамгаалагч гэх махлаг шар залуугаас хэдэн зүйл асууж тодруулсан юм.
-Энэ хотхонд дандаа УИХ-ын гишүүд байдаг гэл үү?
-Мэдэхгүй ээ. Би ямар орж гарч байгааг нь хараад таних биш. Битүү камертай учраас нэг их гарч ороод байдаггүй.
-Сонин хэвлэлээр гараад байдаг Б.Хурц энд амьдардаг гэлүү?
-Хэн тэгж байна, би мэдэх­гүй.
-Телевизээр гараад л бай­сан шүү дээ?
-Ирснийх нь дараа л өдөр бүр сэтгүүлчид ирдэг байсан. Тэр үед энэ хотхон бүхэлдээ өндөр хамгаалалттай байсан л даа. Харин хамгаалалтын хүмүүсийг хоолонд орох хойгуур нэг телевиз ороод байшингийн зургийг авсан байсан. Тэрийг л харсан байх.
-Өчигдөр нэг сонин дээр Б.Хурц ирээгүй гээд гарчих­сан байна билээ?
-Янз бүрээр л ярьж байгаа шүү дээ. Хурцаа ахыг олж харна гэдэг хэцүү л дээ. Тагнуулч хүн хэзээ олонд харагдах, хэдийд харагдахгүй явахаа сайн мэдэх байлгүй дээ.
-Өнөөг хүртэл Монголд ир­снээс нь хойшхи шинэ зураг хэвлэлд гарсангүй шүү?
-Хоёр төрлийн л зураг байдаг юм билээ. Тагнуулч хүнийг олж чадахгүй л дээ.
-Ирээгүй гэдэг нь үнэн байх аа?
-Үгүй ээ, ирсэн. Би өөрөө нэг удаа таарсан.
-Хаана?
-Хашаанаас гарч байхад нь.
-Аан, тэгвэл ажилдаа ор­сон нь үнэн юм байна л даа?
-Тэрийг мэдэхгүй ээ. Би нэг удаа л харсан.
-Ганболд /ҮАБЗ-ийн на­рийн бичгийн дарга/ ахаас асуусан чинь ажил дээрээ байна гэх юм. Өглөө гарахад анзаараагүй юм уу?
-Мэдэхгүй ээ. Ер нь бид гарсан орсон гээд хамаагүй юм яриад байдаггүй шүү дээ. Ялангуяа Хурцаа ахын талаар мэдээлэл авах гэсэн хүмүүс их ирж байна. Ингэхэд өөрөө сэтгүүлч биш биз.
-Үгүй ээ. Телевизээр гара­хаар нь дэлгүүр орох замдаа сонирхож байхгүй юу. Нээ­рэн, Б.Хурц эхнэртэйгээ амралтанд амарч байна гээд байсан уу?
-Сайн мэдэхгүй. Ер нь больё, танихгүй хүнтэй энэ талаар ярихгүй байхыг СӨХ-ноос анхааруулсан.
Тэрбээр ам алдаж хэдэн үг унагасандаа айсан байртай хашаа руугаа явж орсон юм. Үүнээс харахад Б.Хурцын талаар хэн ам нээж болохгүй гэсэн хатуу даалгаврыг ойр хавийнханд нь хүртэл өгсөн бололтой.

М.Ганболд: Б.Хурц бид хоёр өчигдөр ажил дээрээ тааралдсан
Б.Хурцыг ажлаа хийж байна гэж хэвлэл мэдээллийн хэрэгслээр цацаж байгаа ч түүний ажлынхаа өрөөнд сууж байгаа ганц ч зураг, дүрс олонд хүрээгүй байна. Түүнийг ажилдаа ирж байгаа эсэх талаар ҮАБЗ-ийн нарийн бичгийн дарга М.Ганболдоос утсаар тодруулсан юм.
-Гадаад харилцааны дэд сайд Б.Болор ҮАБЗ-ийн аж­лын албаны дарга Б.Хурцыг зусландаа амарч байгаа гэж байсан. Та цуг ажилладаг хүн мэдэж байгаа даа?
-Ажилдаа ирж байгаа. Хаана амьдарч байгааг нь би яаж мэдэх вэ.
-Та хамгийн сүүлд хэзээ тааралдсан бэ?
-Өчигдөр таарсан. Өрөөндөө ажлаа хийгээд л сууж байсан.
-Танаас өөр тааралдсан хүн ховор байна. УИХ-ын гишүүд хүртэл тааралдахгүй байна гээд байсан ?
-Гишүүдтэй уулзаад байх шаардлага ер нь Б.Хурцад байхгүй л дээ.
-Өнөөдөр та хоёр таарал­дав уу?
-Үгүй. Би өөр газар явж байна. ажил дээр байгаа биз.
-Б.Хурц Монголд ирээд хэд хоног амарсан уу?
-Амарсан эсэхийг нь мэдэхгүй ээ.
-Яагаад хүмүүстэй таарал­дахгүй байгаа юм бол?
-Би яаж мэдэх вэ дээ. Өөрөөс нь асуухгүй юу.Л.Цэрэн