НИТХ-ийн өмчид бүртгэлтэй хоёр автомашин хаачив?

Төрийн албан тушаал хашиж байхдаа эдэлж байсан эрх ямбанаасаа огцорсон ч гэлээ салж чадахгүй байдаг хүмүүсийн тухай яриа мэр сэр  сонсогддог. Тэгвэл ийм албан тушаалтны нэгээр  НИТХ-ын даргаар ажиллаж байсан Ц.Сандуй даргыг нэрлэж болохоор болжээ. Учир нь Ц.Сандуй НИТХ-ын даргаар ажиллаж байхдаа албан хэрэгцээндээ унаж байсан унаагаа даргаас буухдаа “аваад явчихсан” гэх жигтэй мэдээг сонслоо.

60 тэрбумын авто гэдгээрээ “алдартай” мань дарга Нийслэлээс 1 автомашин аваад “зугтах” хэмжээнд хүрч “ядуурсныг” ойлгоход бэрх. Сураг сонсвол Ц.Сандуй дарга  ганц машины тухай асуудал биш бүр хоёрын хоёр Ланд -200 автомашиныг аваад зугатсан гэнэ.

НИТХ-ын даргын хэрэгцээнд зориулан Улаанбаатар банкнаас өгсөн 00-62 УНҮ улсын дугаартай Land-200 автомашиныг НИТХ-ын дарга асан Ц.Сандуй албан үүргээ гүйцэтгэж байхдаа унаж байсан бол өдгөө албан тушаалаасаа чөлөөлөгдсөн атлаа  нийслэлийн өмчид эргүүлэн өгөлгүй хувийнхээ хэрэгцээнд унах болсон байна. Тэрбээр үүгээр зогсохгүй “Таван богд” компаниас Нийслэлийн өмчид шилжүүлэн  өгсөн 07-84 УНҮ улсын дугаар  шинэ Ланд-200 автомашиныг мөн л Ц.Сандуй дарга авч яваад эргүүлэн авчирч өгөхгүй байгаа гэнэ.

Нийслэлийн өмчийн харилцааны албаныхан арга барахдаа  Ц.Сандуй  НИТХ-ын даргаар ажилласан хугацааныхаа “хөлсөнд” нийслэлийн өмч болох хоёр ширхэг шинэ  Land cruser-200 автомашиныг авна гэж бодож байгаа юм байхдаа хэмээн гайхаж сууна. Албаны хүмүүс энэ асуудлаар АТГ болон холбогдох хууль хяналтын байгуулагад хандахаар болсон гэнэ.

 Ц.Дулмаа

Эх сурвалж: Мedeel.mn