Авлигатай тэмцэх газарт цус ойртсон томилгоо явагдах нь гэсэн жиг жуг биелэлээ олов. Учир нь тус байгууллагын шинэ дарга нар өөрсдийн халаасны хүнээр багаа бүрдүүлж эрх мэддийг гартаа оруулж эхэллээ. Ингэж хэлдэг нь учиртай. Тус газрын дэд дарга Б.Хурц  хамтран  зүтгэгчдээ Үндэсний аюулгүй зөвлөлөөс авчирсан нь  иргэдийн дургүйцлийг хүргэх болсон.
АТГ-ын гүйцэтгэх алба, тамгын хэлтсийн дарга нар нь ҮАБЗ-д ажилдаж байсан. Нэг үгээр хэлбэл, С.Эрдэнээ, Ч.Өнөрбаяр нар Б.Хурцын далайсан газарт далд орж, далласан газарт ил гарах журмын нөхөд нь юм. Ямартай ч харийн шоронгоос суллагдан ирээд шинэ албанд томилогдсон Б.Хурц өөрийн багаа бүрдүүлж эхэлжээ. Өөрөөсөө өер хүнд үл итгэгч тагнуулч зангаараа халаа сэлгээ хийж хамтрагчидаа татаж авчирлаа.

АТГ-ын шинэ удирдлагууд хүчний байгууллагадаа нэр нөлөө бүхий байсан эрхмүүд. “Хушга” хэмээх хочтой Н.Ганболдын тухайд гүндүүгүй эр гэлцдэг юм билээ. Цагдаад гэлтгүй нэр хүндтэй эрхэм дуулддаг. Харин Б.Хурцыг хүн хулгайлсан хэрэгт сэжиглэгдэж харийн шоронд олон сар хоригдож байснаар нь монголчууд андахгүй.

Албан тушаалаа урвуулан ашигласан  хэрэгт ч буруутгагдаж явсан нэгэн. Адаг сүүлд нь хүний  нутагт “хэрэгтэн” болж явсан хүн энэ газрын эзнээр сууж буйг эмгэнэлтэй бөгөөд гутамшигтай гэх мэтээр гадна дотны сайтуудад бичжээ.

Үндэсний аюулгүй байдлын Ажлын албаны дарга хүн харийн нутагт хоригдох нэрийдлээр бэлтгэгдсэн тагнуулч болсон байх магадлалтай гэх хардлага олны дунд байсаар байгаа.  Авилгын хэрэгт нэр холбогдсон эрхмүүдийн дийлэнхийг улстөрчид эзэлдэг.Эдгээрийн ихэнх хувь нь Авлигатай тэмцэх газарт шалгагдаж буй. Ерөнхийлөгч асангаас  нь авахуулаад хорооны Засаг дарга  хүртэл авлига  авсан хэрэгт холбогдсон. Энэ хэргүүдийг шалгаж тогтоох эрхэм үүрэг хүлээсэн Б.Хурцад итгэж болох уу. Тэр хэн нэгний гар хөл болж авлига гээчийг далд хэлбэрээр цэцэглүүлэхийг үгүйсгэх аргагүй. Учир нь Б.Хурцын ард нэр бүхий улстөрчид ивээн тэтгэдэг гэлцдэг. Ингээд бодохоор итгэх аргагүй юм.

БХурцын явсан газарт хууль бус үйлдэл дагалдаж байдаг бололтой. Баримт сөхвөл, Б.Хурц Үндэсний аюулгүй байддын зөвлөлийн Ажлын албаны дарга болохоосоо өмнө 2009 онд “МИАТ компанийн Сөүл хот дахь Ерөнхий төлөөлөгчөөр ажиллаж байсан. Тухайн үедээ МИАТ-ийн удирдлагуудтай үгсэн тохирч улсад их хэмжээний хохирол учруулсан хэрэгт нэр холбогдсон байдаг. Өдгөө ч энэ хэрэг шийдэгдээгүй хуулийн байгууллагад шалгагдаж буй.

Авлигатай тэмцэх газрын удирдлагууд ард иргэдийнхээ өмнө юу гэж амласныг эргэн саная. Н.Ганболд “Ямар нэг улс төрийн харьяалалгүй. Нам бус.АТГ-ын даргын асуудлыг Монгол Улсын Ерөнхийлөгч өөрөө уулзаж санал тавьсан” гэсэн бол Б.Хурц “Нам бус.Төрийн албан хаагч. Ямар нэг намын харьяалалгүй” хэмээн ам нээсэн нь баг зүүсэн салбадай  шиг харагдсан. Албан тушаалын хэрэгт холбогдож байсан эрхэм авлигын хэргийг илрүүлнэ гэдэг юу л бол.

Б.Хурц хүн чанарынхаа хувьд сайн хүн байж болно.Харин хийсэн үйлдлийг нь сайн гэж хэлэх хүмүүс олдох болов уу. Хэрийн  тагнуулчид баймгүй нарийн ухаанаар С.Зориг агсны хэрэгт сэжиглэгдэж байсан Д.Энхбатыг гурван улсын хил дамнуулан хулгайлж ирсэн нэгэн. Энэ хүний хийсэн ажлыг төр засаг үнэлбэл гавьяа шагнал өгмөөр ч харийн нутагт олон сараар хоригдож байгаад ирсэн түүнд итгэх хүн ховор. Ээдрээтэй олон асуултын хариу тайлагдаагүй байхад энэ хүнийг “авлигыг ангуучил” хэмээн өргөмжилсөн нь олны гайхширлыг төрүүлээд зогсохгүй “Ерөнхийлөгчийн сонголт энэ үү” хэмээн хардахад хүргэж байна.

Б.Хурцыг ирэх сургаар албан тушаалыг нь зэхэж ямар ч асуулт, шалгуургүйгээр түүнийг АТГ-ын дэд даргаар томилсон нь нотой. Учир нь түүнээс авлигын загалмайлсан улстөрчид аврал эрэх мэт.

Б.Хурц яагаад заавал төрийн өндөр албан тушаалд томилогдох ёстой гэж. Эсвэл Б.Хурцын хувь тавилан дарга байхаар зурагдсан юм уу. Түүнд төрд зүтгэх чин эрмэлзэл байлаа гэхэд ард түмэн итгэхгүй байгаа. Харин та итгэсэн хэрэг үү Ерөнхийлөгч өө.

Монголд Авлигатай тэмцэх газар байгуулагдаж байсан үе саяхан. Тэр цагаас авлига гэх нь байтугай ав, өг гэсэн үгийг ч цээрлэх болсон. Гэтэл байгуулагдсан нэрээс цаашгүй үйл ажиллагаа нь доголдсон тус газарт чөтгөр шүгэлсэн гэлтэй. Үе үеийн дарга нар нь үхэл хагацал, шорон орон гээд үзээгүй зүйлгүй. Анхны дарга
Д.Дангаасүрэн нь хүний нутагт учир битүүлгээр амиа алдсан бол удаах дарга Б.Сангарагчаа нь “аавын хаалга” татаж азгүйтсэн. Ямар сайндаа л хар цагаан хэл аманд өртсөн энэ газарт лам хуварга залж ном хуруулан ариусгах цаг болжээ гэж иргэд ярьж байхав.

Б.Чанцал

Эх сурвалж: “Нийгмийн толь” сонин