НҮБ-ын Ерөнхий Ассамблей 2003 онд жил бүрийн арванхоёрдугаар сарын 9-ний өдрийг Авлигын эсрэг олон улсын өдөр хэмээн зарлан тунхагласан билээ. Авлигын эсрэг НҮБ-ын далбаан дор нэгдсэн улс орнууд энэ өдрийг угтан олон нийтийн дуу хоолойг сонсох, Авлигын эсрэг конвенцид тусгасан үүргүүдийг нийгэмд таниулах учиртай.

Авлигын шалтгааныг арилгах, үр нөлөөг бууруулах цогц арга хэмжээг тусгасан НҮБ-ын Конвенцийг дэлхий даяар авлигатай тэмцэх гол хэрэгсэл хэмээн үздэг. Конвенцийг баталсан оныхоо 12 дугаар сарын 9-ний өдрөөс эхлэн гурван өдрийн турш Мексик улсын Мерида хотод хүндэтгэлтэйгээр байрлуулан, түүнд дэлхийн улс орны тэргүүнүүд гарын үсгээ зуржээ. Түүнээс хойш 2005 оны 12 дугаар сарын 9-ний өдрийг хүртэл Нью-Йорк хот дахь НҮБ-ын төв байранд бүх улс гарын үсгээ зурахад нээлттэй үлдээсэн байдаг юм. Энэ ч утгаараа Авлигын эсрэг олон улсын өдрийг өнөөдрөөр  зарласан гэдэг. Манай улсын хувьд 2005 оны аравдугаар сарын 27-ны өдөр НҮБ-ын Авлигын эсрэг Конвенцийг соёрхон баталснаар нэгдэн орсон байдаг. Ингэснээр Монгол Улс авлигын эсрэг олон улсын үйл хэрэгт алхаа нийлүүлэх болжээ.

Гэхдээ үүнээс өмнө 1996 онд УИХ Авлигын эсрэг хууль, 2002 онд Авлигатай тэмцэх Үндэсний хөтөлбөрийг баталж, Үндэсний хөтөлбөрийг хэрэгжүүлэх ажлыг зохицуулж, хяналт тавих орон тооны бус Үндэсний зөвлөлийг байгуулж ажиллуулж байсан. Дараа нь нэгэнт НҮБ-ын Авлигын эсрэг Конвенцийг соёрхон баталж, нэгдэн орсон тул 2006 оны долоодугаар сарын 6-нд УИХ-аар Авлигын эсрэг хуулийг шинэчлэн баталж, тухайн жилийнхээ арваннэгдүгээр сарын 1-ний өдрөөс хэрэгжүүлж эхэлсэн.

Авлигын эсрэг хуулийн дагуу Монгол Улсад анх удаа Авлигатай тэмцэх газрыг байгуулан 2007 оны нэгдүгээр сарын 11-ний өдрөөс үйл ажиллагааг нь эхлүүлж байжээ. Түүнээс хойш тус газар авлигын эсрэг олон нийтийг соён гэгээрүүлэх, авлигаас урьдчилан сэргийлэх, авлигын гэмт хэргийг илрүүлэх зорилгоор гүйцэтгэх ажил, хэрэг бүртгэлт, мөрдөн байцаалт явуулах, энэ хуульд заасан этгээдийн хөрөнгө, орлогын мэдүүлгийг хянан шалгах чиг үүргийг гүйцэтгэсэр иржээ.