Монгол Улс Манжийн 220 жилийн дарлалаас чөлөөлөгдөж тусгаар тогтнолоо сэргээсний 100 жилийн ой энэ сарын 29-нд тохионо. Энэ өдрийг бүх нийтийн амралтын өдөр болгох санаачлагыг нэр бүхий 10 гишүүн гаргасан билээ. Улмаар 100-н жилд ганц тохиох энэ өдөр бөхчүүдэд улсын цол олгох нь зүйтэй хэмээн дээрх гишүүд үзсэн юм. Хуулийн төслийг өргөн барьсан 10 гишүүнээс гурав нь МАН-ынх.

Иймдээ ч Ч.Сайханбилэг тэргүүтэй АН-ынхан эл асуудлыг босго давуулахын тулд Төрийн байгуулалтын байнгын хорооны хуралдаан дээр багагүй маргаан дэгдээсэн юм. Учир нь тус байнгын хорооны МАН-ын гишүүд хурлыг орхин гарсантай холбоотой. Эцэст нь санал хураалт явуулахад Г.Баярсайхан хуулийн төслийг дэмжээгүй тул бүлгийн дарга Ч.Сайханбилэг түүнийг заналхийлсэн байдалтай мөрөн дээрээс нь базаж, чихэнд нь шивнэсэн.

Түүний үг Г.Баярсайхан гишүүний нүдэнд нь бараг л нулимс мэлтэлзтэл муухай царайлуулав. Аавдаа алгадуулсан хүүхэд шиг “Ч.Сайханбилэг дарга аа, Ч.Сайханбилэг дарга аа” хэмээн араас нь танхимаас гарав. Үүнийг ажигласан Д.Очирбат гишүүн “Бүлгийн дарга гишүүнээ дарамтлахаа боль” хэмээн хашгирч суусан.

Харин төд удалгүй ариун цэврийн өрөөнөөс Ч.Сайханбилэг, Г.Баярсайхан, Б.Бат-Эрдэнэ нар их л ууртай гарч ирцгээсэн юм. Хөндлөнгийн хүн харахад бүлгийн дарга гишүүндээ алганы амт үзүүлэх гэхэд нь аварга салгасан болов уу гэж хардмаар. Үүнийг нотлох шиг Ч.Сайханбилэг “Муу хуурамч профессор минь аятайхан байгаарай” хэмээн заналтайхан хэлсээр байнгын хорооны хуралдаан руу оров. Харин гишүүн юу ч дуугаралгүй муухай царайлан өрөө рүүгээ алхлаа.

Л.Нинж

Эх сурвалж: “Нийгмийн толь”