Бидэнд нэг сайн, нэг муу мэдээ байна. Эхлээд муу мэдээг нь дуулгая. Монгол Улс эдийн засгийн хямралд орсон. Гэхдээ хамгийн доод ёроолдоо хүртэл унчихаагүй байгаа. Харин сайн мэдээ нь гэвэл чухам юунаас болж ийм байдалд оров, үүнийг хэрхэн засаж, сайжруулах боломжтой болохыг мэдэж байгаа. Мөн энэ ажлыг одооноос эхлэх гэж байгааг Монгол Улсын Ерөнхий сайд Ч.Сайханбилэг УИХ-ын танхимын индэр дээрээс мэдэгдлээ. Муу мэдээг үгүй болгож, сайн мэдээгээ бүр сайн мэдээ болгохын тулд ард түмний дэмжлэг хэрэгтэй болохыг ч тэрээр хэлж байна. Учир нь түүний мэдэгдснээр эдийн засгийн хямралыг даван туулж, тодорхой бодлогыг гаргахдаа бүсээ чангалах болно гэдгийг анхаарууллаа. Энэ байдлыг Монгол хүн бүр тэвчиж, бүсээ чангалж, төр засгийн бодлогод хүлээцтэй хандаж хүнд хэцүү цаг хугацааг өнгөрүүлж чадвал сайхан цаг ирнэ гэдгийг Засгийн газрын тэргүүн хэллээ. Засгийн газраас явуулах хатуу бодлогуудыг зөвөөр ойлгож хандвал сүүлийн 20 гаруй жилийн алдаагаа одооноос засаж, зөв замд нь оруулах боломж бий. Шийдлийн Засгийн газар бизнес эрхэлж яваа захирлын хүүхэд, хоногийн хоолоо залгуулах гэж зүтгэж яваа аавын хүүхдийн аль алинд нь 20 мянган төгрөгийг бэлнээр өгдөгийг болиулж байна. Тэд сарын саяас давсан орлоготой өрхийн хүүхдийн 20 мянгыг түр зогсоож, мөнгө шаардлагатай өрхийн хүүхдэд энэ мөнгийг үргэлжлүүлэн олгохоор боллоо. Мөн үнэхээрийн онц сайн сурч байгаа оюутнууд л 70 мянган төгрөгөө үргэлжлүүлэн авах ёстойг хэлсэн. Энэ бол шударга зарчим. Ижил тэнцүү биш өрхийн хүүхдүүд, нэг нь сурахын төлөө байхад нөгөө нь хичээл хийдэггүй энэ хоёр оюутан адилхан улсаас мөнгө авна гэдэг шударга бус. Үүнээс хэмнэлт гаргахаар Шийдлийн Засгийн газар шийдвэрлэжээ. Төрийн албан хаагчдын тэтгэвэрт гарахад олгодог нэг удаагийн буцалтгүй тусламжинд салбар бүр харилцан адилгүй 12-36 сартай тэнцэх хэмжээний тусламж олгодог асуудлыг цэгцэлж, салбар харгалзахгүй 12 сараар тогтоох шаардлагатайг Ерөнхий сайд онцоллоо. Түүнчлэн малчдад хандсан олон татаасыг цэгцэлж малын хөлийн татварыг орон нутаг нь өөрсдөө тогтоож өөрсдөө хэрэглэж байх эрхийг нь олгох шаардлага бий болсон байна. Шийдлийн Засгийн газрын дээрх хүндхэн шийдвэрүүд бол эдийн засгийн нөхцөл байдалдаа тааруулсан, орлогоо үнэнээр нь гаргаж, зарлагаа зөв тооцох эхний алхам руу орж байгаа явдал юм. Ерөнхий сайд Ч.Сайханбилэгийн хувьд хүнд үед Засгийн газрын тэргүүнээр ажиллаж байгаа. Түүний хувьд хуучин шиг, орлогоо буруу тооцоолж, ард түмэнд таалагдахын тулд л шийдвэр гаргахыг хүссэнгүй. Гагцхүү бодит байдалд тулгуурлан эдийн засгийн хүндрэлээс хамтдаа даван туулах ёстой гэдэг үүднээс хүндхэн ч гэсэн бүсээ чангалах шийдвэрийг гаргалаа. Харин ард түмэн бидний хувьд цалингаа нэмэгдүүлж чадахгүй, гэр оронд нь хоол хүнс хүрэлцэхгүй, хүүхдийн сургалтын төлбөр, байрныхаа зээлийг төлж чадахгүй байгаа энэ олон асуудал байгаа хэдий ч нийтээрээ бүсээ чангалж, тэвчиж болох зардлаа богино хугацаанд тэсэж чадвал удахгүй гэрэл гарна гэдэгт итгэж байна.

Засгийн газар бас нэг зөв шийдвэр гаргасан. Үүнийг өмнөх төр засгийн удирдлагууд хийж болохоор л ажил байсан. Энэ бол Засгийн газар гурван ч хүүхдийн эмнэлгийг байгуулахаар шийдвэрлэсэн явдал. Хүүхдийн эмнэлэг хүрэлцэхгүй, хүүхэд болон ээжүүд эмнэлгийн газар хэвтэж эмчлүүлэх энэ дүр зураг олон жил үргэлжилсэн. Үүний хариуд шинээр эмнэлэг байгуулна гэсээр олон жилийг ардаа үдлээ. Харин өнөөдөр бодит байдал боломжиндоо тулгуурлан ССАЖЯ, Цөмийн энергийн газрын суларсан байр руу ЗТЯ-ыг нүүлгэж, хуучин ЗТЯ байсан байранд хүүхдийн эмнэлэг байгуулахаар болсон. Мөн оффисын зориулалтаар ашиглахаар төлөвлөсөн Төрийн ордны ар дахь шинэ барилгын зориулалтыг өөрчилж шинэ эмнэлэг байгуулахаар судалж байгаа. Үүнээс гадна Яармагийн дэнжид сүүлийн хэдэн жил дараалан эзэнгүй байсан барилгыг дуусган эх нялхсын болон нэгдсэн шинэ эмнэлгийг байгуулахаар болж байна. Хүсвэл зөв менежентийг явуулж ажиллаж, хэрхэн эмнэлэг байгуулахаар болж байгааг Шийдлийн Засгийн газрын шийдвэрээс харлаа. Монгол төрийн бодлого алдагдаж, төрийн дархлаа сульдсан гэдгийг хүлээн зөвшөөрч, нийгэмд байгаа хүлээлтүүдийг болиулах ёстойг энэ гүйцэтгэх засаглалынхан хэлж байна. Өмнө нь ард түмэнд бодит байдлаа хэлэхгүй, бүх зүйл сайхан болж бүтэж байгаа юм шигээр хандаж ирсэн улстөрчдийн үйлдлээс болж өнөөдөр ийм байдалд хүрлээ. Иймд энэ бүгдийг засахын тулд бид хамтдаа бүсээ чангалж, хамгийн гол нь төр засгийн бодлогыг ойлгох ажил бидэнд үлдэж байна.

Ц.Гэрэл