Сэтгүүлч А.Баатархуяг, түүний эхнэр Амлалт нэхэх ард түмний холбооны өрөнхий зохицуулагч Г.Уянга нарт холбогдох анхан шатны шүүх хурал өчигдөр боллоо. А.Баатархуяг манай сонины өнгөрсөн оны гуравдугаар сарын 4-ний дугаарт “Нэгдлээс задрал руу” нийтлэл гаргасан юм. Уг нийтлэлд Байгаль орчин, аялал жуулчлалын сайд Л.Гансүхийг “Сая ам.долларын байшинд амьдардаг” гэж бичсэн билээ. Мөн Г.Уянга өнгөрсөн хавар “Ард түмний их хуралдай”-д үг хэлэхдээ Оюу толгойн гэрээг байгуулсны дараа Л.Гансүх сайд Зайсанд сая ам.долларын үнэтэй хаус худалдаж авсан гэж хэлснээрээ буруутаад байгаа юм. Улмаар тэднийг хүн гүтгэсэн гэх үндэслэлээр Эрүүгийн хуулийн 111 дүгээр зүйлийн 111.2-т зааснаар яллах дүгнэлт үйлдсэнийг шүүх хэлэлцлээ.

Анхан шатны шүүх А.Баатархуяг, Г.Уянга нарыг гэм буруутай гэж үзэж, торгох ял оноолоо. Тодруулбал, А.Баатархуягийг хөдөлмөрийн хөлсний доод хэмжээг 55 дахин нэмэгдүүлсэнтэй тэнцэх төгрөгөөр, Г.Уянгыг хөдөлмөрийн хөлсний доод хэмжээг 51 дахин нэмэгдүүлсэнтэй тэнцэх төгрөгөөр торгох шийдвэр гаргалаа. Ингэснээр нэг гэр бүлийн хоёр нийтдээ 15,8 сая төгрөгийн торгууль төлөх болж байна.

Шүүхийн шийдвэрийн талаар Г.Уянга “Бид өөрсдийгөө хангалттай баримтаар хамгаалсан. Гэвч шүүх ял оноолоо. Үр дүнд нь бид ялтан боллоо. Ингэснээр УИХ-д нэр дэвших боломжгүй болж байгаа. Улстөрийн зорилгоор намайг ялтан болгосон гэж харж байгаа. Ардчиллын үнэт зүйлийг Ардчилсан нам ингэж үгүй хийдэг юм байна. Сэтгүүлчид хардах эрхээ эдэлснийх нь төлөө ял оноолоо. Ер нь бид хоёр хувьсгал гарцаагүй юм байна гэж дүгнэж байна. Үүнээс өөр гарц үлдээгүй юм байна. Давж заалдана” гэсэн юм.

Б.ЦЭЦЭГДЭЛГЭР

“ӨДРИЙН СОНИН”