Улаанбаатар хотын нутгийн зөвлөлөөс “Улаанбаатар Банк” хэмээх байгууллагад гадна хашаагаа буулган нийслэлийн өнгө үзэмж, иргэдийн зорчих нөхцөл бололцоог бүрдүүлж өгөхийг хүсч албан бичиг өргөн барьсан бөгөөд үүнтэй утга агуулга ижил бичгийг Улаанбаатар хотын захиргаанд өөрсдөө хүргэн өгсөн байна.

Нийслэлийн төв талбайн баруун хэсэгт байрлах бусад төрийн бус байгууллагуудын төлөөлөл “Улаанбаатар хотын нутгийн зөвлөл”-ийн хийж байгаа ажилд талархалтай хандан нэгдэж байгаагаа илэрхийлсэн байна. Тухайн хашаанд үүдээ таглуулах шахсан үйлчилгээний газрууд ч энэхүү хашааг буулгах хүсэлтэй байгаа аж.

Энэ завсараар өдөрт олон мянган хүн зорчдог бөгөөд Коника Менолта зургийн газар нь Сүхбаатарын талбайд зураг авах үйлчилгээ эрхэлдэг олон зурагчидын үйлчлүүдэг гол газруудын нэг юм. Энд өндөр зэрэглэлийн ресторан ч ажилладаг.

“Улаанбаатар хотын нутгийн зөвлөл”-ийн залуучууд Нийслэлийн засаг дарга бөгөөд Улаанбаатар хотын захирагч Г.Мөнхбаяр болон албаны бусад байгууллагуудад “Улаанбаатар банк”-ны эзэмшил бүхий хашааг буулгах хүсэлтээ гардуулсан байна.

Улаанбаатар хотын газрын алба энэхүү нийтийн эзэмшилд байх ёстой газрыг нэн даруй чөлөөлөн Улаанбаатарчуудын чөлөөтэй зорчих боломжийг олгоно хэмээн найдаж байна. Мөн нийгмийн өмнө хүлээсэн хариуцлагаа ухамсарлан, итгэлцэл дээр тулгуурлан ажилладаг “Улаанбаатар Банк” хэмээх байгууллага энэхүү хашаагаа нэн даруй буулгана хэмээн итгэж байна.