Эх дэлхийд хүмүүн биеийг олж төрнө гэдэг ховорхон хувь заяа. Ийм л ховорхон хувь төөргийг олох алтан мөчид буюу энэ сарын 18-ны өдөр Өмнөд Суданы Румбек хотын төвийн “Макой” гудманд ойролцоогоор 5 метрийн гүнтэй нийтийн бие засах газрын нүхэнд унасан байсан нярай хүүг аврах дуудлага Монголын цэргийн багт ирсэн байна. Тодруулбал “Румбек” баазад үүрэг гүйцэтгэж байсан хошууч Б.Бат-Амгалангаар удирдуулсан татан гаргалтын бүлэг ослын газарт нэн даруй очин ойр орчимд цуглаж бөөгнөрөн, эмх замраагүй байдал үүсгэсэн иргэдийг хамгаалалтад авч аврах ажиллагааг түргэн шуурхай зохион байгуулснаар нүхэнд унасан бяцхан хүүгийн алтан амийг монгол цэргүүд аварлаа.

Манай багийн эмнэлгийн бүлгийн их эмч, ахмад С.Пүрэвсүрэн, сувилагч, ахлагч Б.Адъяа нар уг нярай хүүг татан гаргасны дараа үзлэг хийн, ялгадсыг угааж цэвэрлэн, эхэсийг нь салгаж, хүйг боон эмнэлгийн анхны тусламж үзүүлэн эхэд нь эсэн мэнд хүлээлгэн өгөв. Хүү 3,2 кг жинтэй бөгөөд бойжилт хэвийн, эд эрхтэн бэртэл гэмтэлгүй болохыг тогтоож Румбек хот дахь “Католик хүүхдийн эмнэлэг”-т хүргэсэн байна. Хүү одоогоор эмнэлэгт байгаа бөгөөд биеийн байдал нь хэвийн ажээ.
Монгол цэргүүдийн энэхүү буянт үйлсэд талархсан орон нутгийн удирдлага, ард иргэдийн талархлын захидал батальоны удирдлагад ирсээр байна. Ийнхүү Өмнөд Судан улсад үүрэг гүйцэтгэж байгаа хурандаа Ч.Түмэндэмбэрэл захирагчтай Монгол Улсын Зэвсэгт II ээлжийн Мотобуудлагын батальон үүргээ амжилттай гүйцэтэхийн зэрэгцээ эх орныхоо нэрийг африк тивд мандуулсаар явна.

Эх сурвалж:Shuurhai.mn