“Maxi Pot” ресторан иргэдэд өнгөрөгч ням гаригт керосинтай хоолоор үйлчилжээ. Улмаар хоолонд хордсон иргэд Хордлого тайлах төвд хүргэгдсэн байна. Энэ хэргийн талаар Чингэлтэй дүүргийн Мэргэжлийн хяналтын газрын ахлах байцаагч Г.Саруултай уулзаж зарим зүйлийг тодрууллаа.
– ’’Maxi Pot” ресторанд үйлчлүүлж байсан иргэдийн хоолонд яагаад керо­син орсон юм бол?

-Тус газар өнгөрөгч ням гаригт хоёр давхрын ресторандаа шинэ жилийн хүлээн авалттай байсан. Энэ үедээ хоёр давхарт байрлах гал тогооны зарим хэрэгслээ нэг давхар руу зөөн шилжүүлсэн байна. Улмаар түргэн тогоо цэнэглэдэг химийн бодис болох керосиныг жижиг данханд хийж хадгалсан байсныг тус рестораны зөөгч 23 настай эмэгтэй Р нь шөлтэй хоолонд хийснээр дөрвөн хүн хордсон.

-Рестораны тогооч биш зөөгч хүн яагаад шөлтэй хоолонд дур мэдэн өөр зүйл хольсон юм бэ?

-Зөөгчийн хэлж буйгаар шөлтэй хоол захиалсан иргэд шөл нэмж захиалсан байна. Энэ үед данханд байсан керосиныг мэдэлгүй шөлтэй андуурсан хэмээн мэдэгдсэн.
-Керосинтай шөл ууж хордсон үйлчлүүлэгчдийн биеийн байдал ямар байгаа вэ ?

-Хоолонд хордсон иргэд дөрвүүлээ байсан. Тэд ажил хэрэг ярингаа шөлтэй хоол захиалж иджээ. Гэвч удалгүй бие нь муудаж төд удалгүй хортой хоол идсэн гэдгээ мэдсэн билээ. Улмаар тус рестораны зохион байгуулагч тэднийг Хордлого тайлах төв рүү хүргэсэн. Ходоодыг нь яаралтай угаалган нарийн шинжилгээнд хамруулсан байна. Ингэхэд нэг үйлчлүүлэгчийн цусанд өөрчлөлт орсон гэсэн хариу гарсан. Нөгөө гурвынх нь биеийн байдал сайн байгаа гэсэн мэдээлэл бидэнд ирсэн.

-’’Maxi Pot” ресторанд ямар хариуцлага тооцох вэ?

-Энэ хэрэг тус газрын дотоод зохион байгуулалт муугаас болсон. Тиймээс рестораны хоёр давхарт байрладаг Халуун тогооны гал тогоог түр хугацаагаар хаагаад байна. Мөн тэр өдөр хийж бэлтгэсэн шөлнүүдээс дээж авч шинжилгээнд явуулсан. Мэргэжлийн хяналтын ерөнхий газрын улсын байцаагчийн акт гарсан байгаа. Нэмж торгуулийн арга хэмжээ авна.

-Энэ хэрэгтэй холбогдуулан тус газрын удирдлагууд холбогдох албаны хүмүүстэй биечлэн ирж уулзсан уу?

-Одоогоор тус газрын менежер ирж уулзсан. Удахгүй удирдлагуудтай нь уулзаж зөрчил дутагдлыг нь бүрэн арилгуулах болно.
Л.Алтанхишиг

Эх сурвалж: “Нийслэл Таймс”