Хошин урлагийнхан дундаа сайхан ээжүүдийн дүрээрээ олонд танигдаж, шаггүй сайн жүжигчдийн нэг болж чадсан

“Шинэ үе” продакшны захирал Бооёо буюу Б.Ариунболд оюутан байхдаа бие жижигтэй ч бэлчээр томтой нэгэн байж. Адтай, авхаалжтайг хэлэх үү багш нарынхаа хайрыг татсан нэгэн байжээ. Багаасаа л урлагийн хүн болно гэж хатуу шийдсэн ноён Ариунболд анх СУИС-ийн жүжигчний ангид шалгуулж тэнцчихээд хөл нь газар хүрэхгүй баярлахдаа өмсөж явсан пиджакаа тайлж аваад дэвхцэж өгсөн гэнэ лээ. Үүнийг нь харсан Бооёогнийн ээж хүүгийнхээ баяр бахдалыг хуваалцан таван давхрын палкон дээрээ арай л бүжиглээгүй юм байх. Сүүлийн үед “Шинэ үе”-ийн Бооёо тайзан дээр сайхан ээжүүд, настан буурлуудын дүрийг чадмаг амилуулснаараа эмээ нараас урмын сайхан үгсийг харамгүй сонсох болсон гэдэг. Түүгээр ч зогсохгүй ноён Бооёог сайхан эмээ болдогийг нь урамшуулан “Монголын ахмадын холбоо”-ноос хүндэт медалиар шагнасан гэх юм билээ.

Энэ мэтчлэн түүний амьдрал хачин сонин зүйлсээр дүүрэн байдаг бололтой. Мөн “Шинэ үеийн захирал Бооёогийн хамгийн анхны төмөр хүлгээр “Соната”-г сонгож байсан гэдэг. Тухайн үед анх удаа машин унаж байгааг ч хэлэх үү, Бооёод шинэхэн Соната нь нэлээд зүйл ойлгуулсан гэнэ. Түүний унаа ч автомат удирдлагатай байж таарч, ноён Бооёо хөөрхөн байдалд орчихсон юм байх. Нэгэн өдөр шинхэхэн жолооч Бооёо “Соната” хүлгийнхээ удирдлаганы товчлуурыг андуурч дарснаас болж, машин нь жолоочгүйгээр хөдлөөд, яг урдаас нь өөрийг нь чиглээд ирсэн юм байна. Айж гайхсан Бооёо хэрхэн зогсоохоо мэдэхгүй хэсэг зуур байрныхаа жаалуудыг баахан инээлгэсэн хөгжилтэй түүх Бооёод байдаг. Хошин урлагийн жүжигчид дундаа нэлээд шударга үгийг хэлчихдэг Бооёо маань сүүлийн үед УИХ-ын эрхэм гишүүдийг зад шүүмжлэн эцэст нь тэднийг сонгууль дөхөөд суваг болгооноор мишээлттэй царай гаргах болж, эгээтэй л 25 дугаар суваг телевизийн “Манцуйтай тамирчин”-д орж хөгөө чирэхээс наахнуур болцгоосон улс төрчдийг ойр дотныхондоо гайгүй сайн шүүмжилдэг болжээ. Тэгэхээр сайхан эмээгийн дүрээр үзэгчдийн таашаалд нийцсэн “Шинэ үе”-ийн захирал Бооёо сүүлийн үед улс төрчдөд нэлээд алергитах болсноо ил тод нууж хаалгүйгээр мэдэгдсэн гэнэ лээ.

чухал