Майачуудын хуанли дууссан гэх шалтгаанаар зөвхөн Монголд ч биш олон оронд дэлхийн сүйрэл ирэв гэх цуу яриа гарсан билээ.

Манай их мэдэгчид ч “их” ярьсан юм. “Орифлэйм”-ийн гэх Оюунгэрэл гэдэг эмэгтэй Гачуурт хавьцаа бүр хэд хэдэн гэр барьж, дэлгүүрийн хамаг лаа, шүдэнз, газан плитка, нүүрс, түлээ бэлдсэнээ хэвлэл мэдээллийн хэрэгслээр зарлан олон түмнийг түгшүүрт автуулсан.

Ирэх 12 дугаар сарын 21-нд олон гарагийн тохиол, хиртэлт болох тул хэдэн хоног нар гарахгүй, өдөртөө бараг -70-80 хэм хүртэл хөрч хүн амьд үлдэхгүй шахуу болохоор нь хамаатан садантайгаа амьд үлдэх арга нь тэр юм гэх. Энэ асуултад Монголын ШУА-ийн энэ чиглэлийн эрдэмтэд хариу өгчээ.

Тэднийхээр бол дэлхий сөнөтөл дахиад зургаан тэрбум жилийн асуудал буй гэнэ. Олон гараг давхцан нарны наагуур ордог юм байж, яахав. Тэглээ гээд нар бүтэн хэдэн хоног хаагдахгүй. Сайндаа л хоёр минут үргэлжилнэ гэдгийг хэллээ. Эрдэмтэддээ итгэх үү, элий балай нөхдөд итгэх үү гэдэг нь ёстой л таны хэрэг болох шив дээ.
Г.Насан (www.wikimon.mn)