Хөвсгөл аймгийн “Sky” телевизийн ажилтнууд өнгөрсөн зургадугаар сарын 28-нд буюу сонгуулийн санал хураалтын өдөр ажлаа хийж байхад нь тус телевизийн толгой компани болох “Хөвсгөл ньюс” ХХК-ийн гүйцэтгэх захирал Б.Ганзориг гэгч нь согтуугаар дөрвөн залуу, нэг эмэгтэйн хамт дайран орж, сэтгүүлч, зураглаачдыг зодсон хэрэг гарсан билээ.

Өнөөдөр энэ асуудлаар МСНЭ-ээс хэвлэлийн хурал зарлаж, мэдээлэл хийлээ. Хэвлэлийн хуралд МСНЭ-ийн тэргүүн Б.Галаарид, “Sky” телевизийн захирал асан Ж.Эрдэнэцэцэг, МСНЭ-ийн ерөнхий нарийн бичгийн дарга Х.Батхүрэл нар хүрэлцэн ирж мэдээлэл өгөв.

Хэргийн талаар МСНЭ-ийн тэргүүн Б.Галаарид ярихдаа “Монголын сэтгүүл зүйн салбарт эрх зүйн орчин тун дутмаг байна. Сэтгүүл зүйн тухай хуулийг УИХ-аар батлуулж чадвал сэтгүүлчийн эрх ашиг хамгаалагдаж чадна. Өнгөрсөн зургадугаар сард Хөвсгөл аймгийн телевизэд гарсан энэ хэргийг МСНЭ төдийгүй олон улсын сэтгүүлчдийн байгууллагууд маш анхааралтай ажиглаж байна. “Хөвсгөл ньюс” ХХК-ийн гүйцэтгэх захирал Б.Ганзоригт холбогдох уг хэргийг саяхан саяхан прокрурын байгуулагт шилжүүлсэн. Хэрэв шүүхийн эцсийн шийдвэр нөгөө талд гарсан тохиолдолд МСНЭ дараа дараагийн арга хэмжээг авах болно” гэв.

Харин “Sky” телевизийн захирал асан Ж.Эрдэнэцэцэг “Манай “Sky” телевиз өнгөрсөн дөрөвдүгээр сард МСНЭ-д элссэн. Одоогийн байдлаар биднийг зодсон гүйцэтгэх захиралыг Эрүүгийн хуулийн бүлэглэсэн 181.2.1, дошгин авирлаж, танхайрсан 181.2.5  зэрэг зүйл ангиар прокрурын шатанд шалгаж байгаа. Харин “Sky” телевиз зодоон гарсан шөнө буюу зургадугаар сарын 29-нөөс хойш үйл ажилгаагаа явуулаагүй. Тиймээс дөрвөн зураглаач, таван сэтгүүлчид хэн нь ч өнгөрсөн хоёр сарын хугацаанд өөр ажилд ороогүй, хүлээлтийн байдалтай байна. Одоогоор халдлагад өртсөн уран бүтээлчдийн биеийн байдал хэвийн байгаа. Тархины цууралттай гэгдэж байсан зураглаач маань өмнө нь тархиндаа гэмтэлтэй байсан юс билээ. Тэр гэмтэл нь халдлагын дараа сэдэрсэн ч, эрчимтэй эмчилгээний үр дүнд шинжилгээний хариу нь хэвийн гарсан. Мөрдөн байцаалтын явцад “Хөвсгөл ньюс” ХХК-ийн гүйцэтгэх захирал Б.Ганзориг манай дөрвөн зураглаачидтай уулзаж, тус бүр нэг сая төгрөг өгье хэмээн амалсан байсан. Мөн ажилдаа буцааж авна харин сэтгүүлчдийг ажилд нь эргүүлж авах боломжгүй гэж ярьсан байна лээ. “Хөвсгөл ньюс” ХХК-ийн гүйцэтгэх захирал одоогоор Хөвсгөл аймагт батлан даалтанд байгаа” хэмээн мэдэгдэв.

Б.Дэжид