Хэлж дуусаагүй байхад гэдэг шиг л юм болж байна. Өчигдөрхний дугаарт “Ээ дээ эрчүүд минь энэ хүүхнүүдээс болж амиа хорлов” гэж бичсээр байтал тэгэхээс тэгэх гэж байгаа юм шиг дахиад л хүүхний асуудлаас болж хоёр эр нэгнийхээ амийг хороочих шиг боллоо. Өмнөговь аймаг дахь Хилийн цэргийн 0131 дүгээр ангид заставын орлогч, ахлах дэслэгч Э, жагсаалын дарга, ахлагч Э нар хоорондоо ширүүн зодоон хийснээс болж ахлах дэслэгч Э нь ухаан орохгүй байсаар нас баржээ. Номгон сумын эмнэлэгт хүргэж эмнэлгийн анхан шатны тусламж үзүүлсэн ч нэмэр болоогүй байна. Цагдаагийн байгууллагаас “Чухам юунаас болж ийм хэрэг болов гэдгийг тогтоохоор ажиллаж байна” гэж мэдээлж байгаа хэдий ч эх сурвалжийн мэдээллээр бол нэг хүүхнээс болсон гэх мэдээлэл байна. Одоогоор энэ эмэгтэй ямар учиртай хүн болох нь тодорхойгүй байна. Нэгийг нь байхгүй хойгуур нөгөөхтэй нь жиг ургуулсан бололтой. Ингээд л хардал сэрдэлтийн юм явагдаж офицер, “Жа” хоёр зодолдсон аж. Газар дээр нь очиход ч юу байхав дээ, дор нь тодорхой болгоно л доо. Энэ хэрэг явдал үнэхээр хүүхнээс болсон бол ерөөсөө ар өврөөр явалддаг асуудал улс орны эмгэнэл болох нь. Өдөр бүхэн шахуу хаа нэг газраас эрчүүд нэгнийгээ хөнөөлөө, амиа хорлолоо гэсэн мэдээлэл ирэх. Юунаас болов гээд учир шалтгааныг нь ухахаар эхнэр нь эр нөхрөө эзгүйчилсэн, эсвэл эр нөхөр нь бусдынх руу саамагнаснаас болж таараад байгаа юм. Улс орон доройтохын нэг шинж нь эмс хүүхнүүдийн хормой, хот суларснаар илэрдэг гэж дээдсийн захиаст бий. Энэ улсын өнцөг булан бүрээс ийм л шалтгаантай хэргүүд зайгүй цувах болсон нь эртний энэ сургаалыг эрхгүй сануулах боллоо.

Өчигдөрхөн бүсгүйчүүдийг өмгөөлж эрчүүдэд бурууг тохож бичсэн бол өнөөдөр харин “Эмс хүүхнүүд минь энгэр заамаа чангахан барь, эрчүүдийг буруу замд хөтлөхөө боль” гэж хэлэх байна. Ямарч эр хүн нааш гэж байгаа бүсгүйгээс буцдаггүй болохоор элдэв аяг гаргаж эрчүүдэд нүүр өгөхөө боль. Буруу дуулахгүй л бол буцдаг эр хүн байдаггүй болохоор бүсгүйчүүд минь та нар л чанга бай. Тас ширвээд явж одоцгоо.

Холбогдолтой мэдээ: Эрчүүд ээ, энэ юу болж байна вэ?

Б.НЯМАА