УИХ-ын Төрийн байгуулалтын байнгын хорооны хуралдаанаар Иргэний үнэмлэхийн талаар авах зарим арга

хэмжээний тухай УИХ-ын тогтоолын төслийг хэлэлцсэн юм. Хууль зүй, дотоод хэргийн сайд Ц.Нямдоржийн танилцуулснаар шинээр иргэний үнэмлэх авах шаардлагатай 64 мянга гаруй иргэн байгаа аж. Тэдэнд хуучин үнэмлэх олгох боломжгүй, тиймээс нөхцөл байдлыг харгалзан үзэж УИХ-ын сонгуулиас урьтаж шинэ цахим үнэмлэх олгох шаардлага тулгарч байгааг онцлон хэлсэн юм.
Энэхүү хэлэлцүүлгийн үеэр Хууль зүй, дотоод хэргийн сайд Ц.Нямдорж, УИХ-ын гишүүн Н.Алтанхуяг нарын дунд нэлээд ширүүхэн хэрүүл өрнөсөн. Н.Алтанхуяг гишүүн “Ц.Нямдорж оо, чи зориуд сонгуулийг будилаантуулах гэж ийм ажил зохион байгуулж байна. Яагаад хурууны хээгээр санал өгөх асуудлыг оруулж ирэхгүй байгаа юм бэ” гэхэд сайд Ц.Нямдорж “Хэн чамайг замын дундаас ажлаа хая гэсэн юм. Би дуртайдаа ажлыг чинь аваа юу” хэмээн нэлээд уцаарлангуй өгүүлэв. Гэтэл Н.Алтанхуяг гишүүн “Чи тэр Л.Амарсанаагаа халаарай, танай нам чамд хайртайдаа сайдын суудлаас чинь огцруулаагүй гэж бодож байна уу.

Чи бол сонгууль будилаантуулах гэж л үлдсэн ш дээ, муу бууны нохой минь” хэмээн ширүүхэн “буулгав”. Энэ үеэр Төрийн байгуулалтын байнгын хорооны дарга тэднийг хэрүүлээ зогсоохыг шаардсан ч улайрсан хоёр улстөрчийн тулаан хэсэгтээ л үргэлжилсэн. Эцэст нь байнгын хорооны дарга хүчээр шахам санал хураалт явуулснаар эл тогтоолын төслийг гишүүдийн олонх нь “Хэлэлцэх нь зүйтэй” хэмээн үзсэн юм. Ийнхүү улстөрийн хүрээнд “халуухан” өдөр хоногууд үргэлжилж, хэрүүл маргаан тасрахгүй байгаа нь мэдээж ирэх сонгуультай холбоотойг хэн хүнгүй мэдэх биз ээ.
Н.Хувьзаяа secret.mn