Авлигын хэргээр шалгагдаж буй МАХН-ын дарга Н.Энхбаярыг цагдан хорих явцад яргалсан, дарамталсан гэх яриаг гишүүд, дэмжигчид нь гаргаж байгаа билээ. Энэ талаар Шүүхиин шийдвэр биелүүлэх Ерөнхий газрын Тогтоол гүйцэтгэх газрын дэд дарга П.Хосбаяраас тодрууллаа.

-МАХН-ын дарга Н.Энхбаярыг өндөр албан тушаал хашиж байсан учраас цагдан хорих төвд онцгой эрх эдэлсэн гэх яриа байна.

-Яллагдагчаар татагдсан Н.Энхбаяр онцгой эрх эдэлсэн юм байхгүй. Манай албан хаагчид Монгол Улсын Ерөнхийлөгчөөр ажиллаж байсан гэдэг утгаар нь ёс зүйн хувьд хүндэтгэлтэй хандаж байсан. Харин цагдан хоригдогч захиа гаргах, утсаар ярих гэх мэт дотоод журам зөрчсөн.

-Дотоод журам зөрчсөн хоригдогчид ямар арга хэмжээ авдаг юм бэ?

-Сахилгын арга хэмжээ авдаг журамтай. Н.Энхбаяр дотоод журмыг ойлгоогүй байсан юм билээ. Тийм учраас сахилгын арга хэмжээ аваагүй.

-Өмгөөлөгч нартай нь уулзуулдаггүй байсан юм биш үү?

-Өмгөөлөгчтэй нь өдөр болгон уулзуулдаг байсан. Харин эхнэр хүүхэдтэй нь цагдан хорих 461 дүгээр ангид шилжин ирсэн үед нь уулзуулсан юм билээ.

-Намынх нь гишүүд даргад нь яргалсан, хүч хэрэглэсэн гэх мэдээлэл тараасан. Энэ үнэн үү?

-Манай цагдан хорих төвүүд бүгд камерын системтэй шүү дээ. Төрийн тусгай хамгаалалтын ажилтнууд 24 цагийн турш теле камераар харж байсан. Нэмээд хэлэхэд хяналтын прокурор хууль дүрэм хэрхэн хэрэгжиж байгааг өдөр болгон үздэг байлаа.

-Ортой нь хүлээд ам руу ус цутгасан гэх мэдээлэл ч байсан.

-Ийм ор үндэсгүй мэдээлэл тараасан явдалд ихэд харамсаж байна.

-Цагдан хорих төвөөс хоол унд идэж байсан уу?

-Үгүй ээ. Төрийн тусгай хамгаалалтад байдаг учраас цаанаасаа хоол унд нь ирдэг. Шинжилгээнд орсон, хоол унд иддэг байсан юм.

-Эмчийн үзлэг оруулж байсан уу?

-Өөрийнх нь эмч тогтмол үздэг байсан.

-Төв аймгийн мөрдөнгөөс цагдан хорих 461 дүгээр хорих анги руу шилжих үед нь бас яагаад дамжилж гарсан юм бэ. Хөлөөрөө явж чадахгүй байсан юм уу?

-Өөрөө 461 дүгээр хорих анги руу явна гэсэн юм. Тэгсэн хэрнээ гучин минут хүлээ гэсээр дөрвөн цаг болсон. Энэ хооронд гишүүд дэмжигчид нь тусгай хамгаалалттай бүс рүү дайрч хоёрдугаар эмнэлэг рүү авч явна гэж байсан. Тэр ч бүү хэл Ерөнхийлөгч асан гутал, хувцсаа тайлж хаяад байсан шүү дээ. Бид сугадаж аваад машинд суулгасан. 461 дүгээр анги дээр ирэнгүүтээ л зүгээр ороод явчихсан. Машинд өөрөө суухгүй байсан учраас өргөж, сугадаж гаргадаг. Энэ нь байдал гишүүд дэмжигчдэд нь хүндээр тусдаг юм билээ.

-Яагаад гутлаа тайлж хаяад байсан юм бол?

-Мэдэхгүй. Бид гутлыг нь өмсгөж өгсөн.

-Танай албан хаагч руу хуруу гараа харуулах, эрх чөлөөнд нь хүртэл халдаад авсан гэх мэдээлэл бий. Арслан торонд орчихсон юм шиг л архираад байсан гэсэн яриа байна үнэн үү?

-Хоригдож байгаа болохоор бухимдсан байх. Үүнээс өөр тайлбар өгөх бололцоо алга. Манай хүмүүс рүү янз бүрийн ааш авир гаргаж байсан. Тэр бүхэн камерын бичлэгт баримт болоод байж байна.

-Өөрийнхөө төлөө өлсгөлөн зарлаж байгаа Н.Энхбаярыг ухаан алдлаа, нас барчихлаа гэсэн цуурхал их гарсан. Энэ бүх мэдээлэл нийгэмд бухимдал үүсгээд байх шиг байсан?

-Тийм ээ. Манай байгууллагын зүгээс бололцоотой бүх мэдээллийг өгч байсан.

-Цагдан хоригдож буй хүн бүхэн Н.Энхбаяр шиг гутлаа тайлж хаяад байвал хэцүү юм даа?

-Намынх нь гишүүд, дэмжигчид, гэх жар гаруй иргэд 461 дугээр хорих ангийн гадаа узель тавьчихаад Н.Энхбаярыг суллахыг шаардах, дуу дуулах гээд олон зүйл болсон. Шөнөжин чанга яригчаар ээлжилж яриад хонож байгаа юм. Бид хуулийн дагуу ажил үүргээ л гүйцэтгэж байлаа.

– Ер нь хориход хоригдол хүмүүс өлсгөлөн зарладаг уу. Хэрэв өлсгөлөн зарладаг бол жилдээ хэдэн хүн өлсгөлөн зарладаг юм бэ. Нас барсан тохиолдол бий юу?

-Жилдээ хорь гаруй хүн өлсгөлөн зарладаг. Нас барсан тохиолдол байхгүй.

-Н.Энхбаярын биеийн байдал ямар байсан бэ?

-Цагдан хоригдож байгаа хүний өвчин эмгэг, эрүүл мэндийн талаар мэдээлэл өгөх ңь хуулиар хориотой байдаг. Энэ хуулийн дагуу мэдээлэл өгөх боломжгүй.

Т.ЦОГТ-ЭРДЭНЭ

ӨДРИЙН СОНИН-МЭДЭЭ.МН