Монголын залуучуудын холбооны Ерөнхийлөгчөөр томилогдсон АН-ын гишүүн А.Мөнхбат ирэх сонгуульд Өвөрхангай аймгаас нэр дэвшихээр болжээ. Албан тушаалаасаа татгалзсан түүний хувьд олигтойхон сэтэргүй сонгуульд нэр дэвшинэ гэдэг утгагүй зүйл мэт санагдсан тул хуурай ах Ч.Сайханбилэгийн лоббигоор МЗХ-ны ерөнхийлөгч болж нэрийнхээ өмнө зүүх сэтэртэй болж амжив. Тэрбээр нэгэн үе загварын тайзнаа бужигнуулж явсан топ модель Ч.Туяацэцэгтэй амьдарч байсан боловч төдөлгүй хоёр тийшээ болсон нь “Биеэ засаад гэрээ зас. Гэрээ засаад төрөө зас” гэдэг үгтэй харшилдаж байна. Амьдралаа төвхнүүлж чадаагүй хөвүүн ард олны төлөө ажиллана гэдэг юу л бол гэж өвөрхангайчууд өөр зуураа ярилцаж байгаа гэнэ.

Түүний хуурай ах Ч.Сайханбилэг цагтаа Москвагийн Комсомолын дээд сургуулийг төгсч ирмэгцээ МЗХ-ны ерөнхийлөгчөөр ажиллаж байхдаа загвар өмсөгч Р.Байгальтай гэр бүл болж,  улмаар Мэдээлэл харилцаа холбооны зохицуулах газрын даргын алба хашиж, УИХ-д хоёр ч удаа сонгогдсон бол, хуурай дүү А.Мөнхбат нь ахынхаа замналаар явахыг илүүд үзсэн нь түүний богинохон намтраас харагдана. Учир нь, тэрбээр МЗХ-ны Тэргүүлэгч гишүүнээр ажиллаж байсан бөгөөд мөн л загвар өмсөгчтэй гэр бүл болж, Мэдээлэл харилцаа холбооны зохицуулах газрын дэд даргын алба хашиж байсан агаад эдүгээ УИХ-д сонгогдохын тулд нойр, хоолгүй хонож байгаа гэнэ. “Ахыгаа” бодвол амьдралдаа алдаа гаргасан тэрбээр эдүгээ хэн гэдэг загвар өмсөгчтэй сууж хэрхэн гишүүн болохоо мөрөөдөж сууна.
А.Харанга (www.wikimon.mn)