Мөнгөний бодлогын зөвлөл өчигдөр хуралдан бодлогын хүүг 14 хувьд хүргэсэн. Энэ талаар Монголбанкны Ерөнхийлөгч Н.Баяртсайханаас тодрууллаа.

-Мөнгөний бодлогын хүүг нэгээс илүү нэгжээр буу­руу­лах боломж байсан уу?

-Мөнгөний бодлогын хүүг хэн нэгэн хүнд таа­лагдахын тулд буулгадаг зүйл биш. Энэ нь эдийн засгийг удирдах маш чухал механизм. Тиймээс хүүг бууруулахдаа бол­гоомж­той хандсан.  Нэгдүгээрт, Олон улсын валютын сантай албан ёсны хэлэлцээр эхлээгүй байна. Хоёрдугаарт, зэс, алт, нүүрсний үнэ бага зэрэг өсч байгаа бо­ловч энэ хандлага ирэх онд хэрхэх вэ гэдэг тодорхой­гүй байгаа юм. Түүнчлэн дэлхийн эдийн засаг тодорхойгүй нөхцөл байдалд байгаа учраас бид зайлшгүй болгоомжтой хандах хэрэгтэй юм. Ирэх оны гуравдугаар сард төлөх Хөгжлийн банкны бондын төлбөрийг хийсний дараа мөнгөний бодлогын хүүг бууруулах эсэхээ шийдэх нь зүйтэй гэсэн байр суурийг зөвлөлийн зарим гишүүд илэрхийлж байсан. Гэсэн хэдий ч хувийн хэвшлийн хөрөнгө оруулалт, бодит секторын идэвхжилд дэмжлэг үзүү­лэх зорилгоор мөнгөний бодлогын хүүг зөөлрүүлэх шийдвэр гаргалаа.

-Мөнгөний бодлогоор эдийн засгийг удирддаг тухай та хэллээ. Манай улсын хувьд энэ нь эсрэгээр үйлчилдэг гэдэг шүү дээ?

-Төрөөс эдийн зас­гийг удирдах цогц арга ме­ханизмын нэг нь мөнгөний бодлого. Мэдээж, төсөв болон санхүүгийн бодлого зэргээс шалтгаалан үр дүн нь харагдана шүү дээ. Гэхдээ өнгөрсөн удаад авч хэрэгжүүлсэн бодлогын арга хэмжээнээс томоохон дүгнэлтийг хийж болно. Тухайлбал, дан ганц мөн­­гөний бодлогын хүүг өсгөс­нөөр эдийн зас­гийг тогтворжуулах, өсөл­тийг дэмжих бололцоо хяз­гаар­лагдмал гэдгийг харлаа.

-Бууруулсан мөнгөний бодлогын хүүгийн нөлөөг хэрхэн харж байгаа вэ?

-Мөнгөний бодлогын цааш­дын төлөв нь Зас­гийн газрын гадаадын хө­рөнгө оруулалтыг дэм­жих бодлого, төсвийн сахилга бат, гадаадын өрийн эргэн төлөлт зэр­гээс хамаарна гэдгийг онц­лон тэмдэглэмээр байна. Хамгийн гол нь гадаад худалдааны нөх­цөл сайжирч байгаа нь валютын дотогшлох урсгал, төлбөрийн тэнцэл, төсвийн орлогод эерэгээр нөлөөлөх юм.

Эх сурвалж: Зууны мэдээ сонин