ОХУ-ын элчингийн ажилтны хэрэг дуулиан дэгдээсээр. Тоймлобол, “Жаргалтай Улаанбаатар” цэнгүүний дараа буюу 22-ны орой энэ хэрэг гарчээ. Элчингийн ажилтан Олег, А.С. гэж янз бүрээр бичигдэж байгаа хүн их согтуу байсан агаад, дуучин Амарааг хас тэмдэгтэй улаан дээл өмссөн байна гэж ихэд дургүйцэж байжээ. Тэд бие биеээ танихгүй. Амараа “Хайль Хитлер!” гэж мэндчилсэн явдал гараагүй. Хамар руу нь мөргөж, хамрын ясыг гэмтээсэн төдий зүйл болоогүй. Хүн амины хэрэг гарах дөхжээ. Бичлэг дээр бүгд тодорхой байгаа аж.

Согтуу ажилтан Амараагийн араас дагз руу нь архины шилээр хүчтэй цохиж ухаан алдуулж унагаад, ухаангүй хэвтэх түүнийг цохиж өшигчсөн аж. Хамгаалагч нар энэ үйлдлийг зогсоожээ. Амараа ухаангүй эмнэлэгт хүргэгдэж, 3 хоног ухаан ороогүй байна. Тархины зүүн хэсэгт цус харвасан байна. Бас тархины суурь яс гэмтсэн, баруун талын нүүрний хэсэг бүхэлдээ хөхөрч хавдсан, шүд хугарсан, уруул бүхэлдээ урагдсан язралттай. Тэрээр одоо ухаан орсон ч, биеийн байдал тогтворгүй, ухаан орж гарсан байдалтай байгаа юм байна. Цаашид энэ уран бүтээлчийн эрүүл мэнд хэрхэх нь огтхон ч тодорхойгүй байна.

Хамгаалалтын ажилтнууд амжиж салгаагүй бол согтуу галзуу этгээд Амарааг газар дээр нь алах байж.

“Уг хэргийг Монгол Улсын Эрүүгийн хуулийн 181.2.1-т зааснаар танхайн гэмт хэрэг гэсэн зүйл ангиар эхлэн шалгаж байгаа. Харин мөрдөн байцаалтын явцад нэмж ямар зүйл анги нэмэгдэх нь тодорхой болно. Тэр хүний дипломат бүрэн эрхтэй байх нь хамаагүй. Учир нь аль ч улсын бүрэн эрх бүхий төлөөлөгч болон элчин сайд нар Монгол Улсын нутаг дэвсгэр дээр гэмт хэрэг үйлдсэн бол манай улсын хуулиар шийтгэл хүлээнэ гэсэн хуулийн заалт байдаг” гэж дуулиант хэргийн өмгөөлөгч гэж алдаршсан Г.Батбаяр мэдэгдлээ.

Хэргийг үйлдсэн этгээд “Согтуу байсан” гэхээс өөр зүйл хэлээгүй байгаа аж. Согтуугаар гэмт хэрэг үйлдэх нь хэргийг хөнгөрүүлэх биш, хүндрүүлэх шалтгаан болдог.