“Оюутолгой”-н ТУЗ-д Монголыг төлөөлөх эрхмүүд шинээр томилогдоод байгаа. Тэгвэл өмнөх засгийн үед тус компанийн ТУЗ-д байсан нөхдүүдийн нэг Ч.Отгочулуу хэвлэлд яриа өгчээ. Хэдийгээр тэрбээр Оюутолгойн ТУЗ-ийн асуудлаар нэг их яримааргүй байна гэсэн ч өөрийн байр сууриа илэрхийлсэн байна. Тэрбээр  “Мэдээж цөөнхийг төлөөлнө гэдэг хаана ч хэцүү байдаг. Зарим үед хөрөнгө оруулагч тал олонхиороо түрээд шийдвэр гаргаад явах эрхтэй. Анхнаасаа манай гэрээнүүд тэгж хийгдсэн юм билээ. Гэхдээ бид олон асуудлыг Монгол Улсад ашигтайгаар шийдүүлж чадсан байдаг. Тухайлбал, санхүү аудитын болон худалдан авалтын хороог нь монгол хүн даргалдаг болсон. Мөн менежментийн төлбөрийн өндөр хувийг бууруулсан. BHP-ийн гэгдэх хоёр хувийн роялтийг хүчингүй болгож чадсан. Роялти тооцох аргачлал дээр их удаан маргаж байсан ч эцэстээ манай хуулийн дагуу, манайд ашигтайгаар эцэслэн шийдүүлэх тал дээр айлын талыг буулт хийлгүүлж чадсан. Нийтэд нь тооцвол 4-5 тэрбум ам.долларын хэмнэлт бас өгөөж бий болгож чадсан.

Үнэхээр тэдний хэлээр ярьдаг, гэхдээ энэ нь зөвхөн англиар гэсэн үг биш л дээ, бизнес бас хууль, стандартын хэлээр ойлголцохгүйгээр юу ч явахгүй. Тэрнээс биш Оюутолгойн ТУЗ гээд л хоосон эх оронч, сэлэм эргүүлээд байвал ашиглагдаад л дуусах байх. Ер нь юм мэдэхгүй, хоосон толгойтой хирнээ ууртай, догшин хүнийг залуурдах шиг амархан юм байхгүй. Наанаа бууж өгч байгаа юм шиг дүр үзүүлсэн ч цаагуураа хожоод л байдаг юм. Монголын эрх ашгийг хамгаалж байна гээд галзуу, солиотой юм шиг аашилж болохгүй. Яг тэд нартай адилхан түвшинд сэтгэж, ямар үед дуугаа чангалах юм, хэзээ өндөрсгөх юм, ямар үед буулт хийх юм, хаана юу хэлэх юм гэдгээ ч тооцох ёстой нь ойлгомжтой. Ингэж байж зорилгодоо хүрдэг учир эдийн засаг, санхүүгээс гадна харилцааны мэдрэмж шаардсан ажил.” хэмээн хэлж байна.

Эх сурвалж: Шуурхай.мн