Эрүүл мэндийн сайд асан Г.Шийлэгдамбыг ажлын байран дээрээ 500 сая төгрөг авч байхдаа үйлдэл дээрээ баригдаж, баахан  асуудал дэгдэж байсан. Мань эр намын дарга Н.Энхбаярынхаа шахалтаар намдаа санхүүжилт олж өгөх гэсэн зорилгоор л тэр мөнгийг авсан гэх тайлбарыг хийж байсан. Тэгвэл уг хэрэгт Н.Энхбаярыг албан ёсоор хамаатуулан, шинэ зүйл ангиар шалгаж эхэлсэн гэх мэдээлэл байгаа юм. Н.Энхбаярт холбогдох хэргийг  прокурорт шилжүүлээд нэлээд хэд хонож байгаа. Гэтэл прокурорын байгууллагаас  Н.Энхбаяр болон Г.Шийлэгдамба нарт холбогдох хэргийг нэгтгэх чиглэлийг АТГ-т өгсөн гэх мэдээлэл байгаа юм.

Дашрамд өгүүлэхэд, Г.Шийлэгдамбын  албан тушаалаа ашиглан онц их хэмжээний мөнгө завшсан гэх хэрэгт холбогдуулан МАХН-ын Санхүү хариуцсан нарийн бичгийн дарга П.Цогтбаатарыг баривчлан ШШГЕГ-ын урьдчилан хорих 461-р ангид саатуулж байгаад батлан даалтад гаргаад байсан. Түүнчлэн П.Цогтбаатарыг “Хэрэгт хамтран оролцсон гэх үндэслэл тогтоогдоогүй” гэж Хяналын прокурор үзсэнээр хэргийг хэрэгсэхгүй болгосон талаар бид мэдээлсэн.

Тэгвэл Г.Шийлэгдамбын  хэрэгт хамтран оролцсон хүнээр Н.Энхбаярыг хуулийн байгууллагынхан тодруулж байгаа бололтой.

Эх сурвалж: Шуурхай.мн