Нийтийн тээврийн жолооч нартай холбоотой зам тээврийн осол буурахгүй байна. Тээврийн хэрэгслийн техникийн бүрэн бүтэн аюулгүй байдал хангалттай бус, зорчигчид сууж, бууж амжаагүй байхад хөдөлгөөнөө эхэлүүлж зорчигчоо унагааж бэртээх, хаалгандаа хавчих, гэнэт огцом тоормослох, хоорондоо уралдах, гэрлэн дохио зөрчих, хурд хэтрүүлэх, урсгал сөрөх гээд нийтийн тээврийн хэрэгслийн жолооч нарыг гаргадаг алдаа дутагдал олон бий. Хамгийн гол нь тэдэнд хариуцлага тооцдог нь хэр бол. Автобусаа жолоодож яваад хүний амь нас хохироочихоод юу ч болоогүй юм шиг ажлаа үргэлжлүүлэн хийгээд явсан тохиолдол бий.

Өнгөрсөн долоо хоногт гэхэд автобусны жолоочтой холбоотой гурван осол Замын цагдаагийн газар бүртгэгджээ.

Тухайлбал, явган зорчигчийг мөргөж гэмтээсэн, бага насны хүүхдүүдийг буух гэж байхад хавчиж биед нь гэмтэл учруулсан байна. Харин автобусны жолооч явган зорчигчийг мөргөж гэмтээсэн хэрэг гарсан билээ.Тэгвэл хохирогч эмэгтэй ГССҮТ-д хэвтэн эмчлүүлж байгаад нас баржээ.

Тодруулбал, СХД-15 Энхтайваны өргөн чөлөө, 19-р байрны урд замд “Нийслэлийн зорчигч тээврийн нэгтгэл” ОНӨААТҮГ-ын Daewoo BS106 автобусны жолооч А нь явган зорчигч СХД-ийн 19-р хороонд оршин суух 57 настай эмэгтэй О-г мөргөжээ. Хохирогч О нь ГССҮТ-д хүргэгдэн эмчлэгдэж байгаад өнгөрсөн пүрэв гаригт нас барсан байна.