Ерөнхий сайд Ж.Эрдэнэбатын хэлж ярьж байгаагаас үзэхэд томоохон төслүүдийг эргэлтэд оруулах асуудлыг ажил хэрэгч түвшинд авч үзэх бололтой, энэ засаг. Ерөнхий сайд чуулганы хуралдаанд хэлсэн үгэндээ “Цаашид макро эдийн засгийн нөхцөл байдлыг тогтворжуулах, эдийн засгийг сэргээх, засаглалын хямралыг даван туулах, ард иргэдийг ажлын байртай болгох, орлогыг нэмэгдүүлэх, шаардлагатай нийгмийн зорилтот хэсгээ төрийн бодлогоор дэмжин тэтгэх, хувийн хэвшлийн бизнесийг дэмжих, томоохон болон  дэд бүтцийн төслүүдээ хөдөлгөж, эдийн засгийн эргэлтэд оруулах  гээд олон олон чухал ажлыг хийж амжуулах шаардлага бидний өмнө байна. Та биднийг төрд илгээсэн ард түмэн сонгогчдын хувьд цагийн тоолуур гүйж эхэлсэн. Тэд улс орныхоо ирэх дөрвөн жилийн төлөө хийх ёстой ажлаа хийж,  хамгийн үнэ цэнэтэй итгэлээ та бидэнд өгч, сонголтоо хийсэн. Цаг биднийг хүлээхгүй. Одоо бидний өмнө, ажил хийх таатай нөхцөлийг хүлээхгүйгээр зүтгэж ажиллах үүрэг ирж байна. Монголын төр, Монголын улс төрийн хамгийн том нам хэлснээ хийдэг, амласнаа биелүүлдэг байх ёстой. Монгол төрийн уламжлал, залгамж чанарыг хадгалж, улс орныхоо тогтвортой хөгжил, иргэдийнхээ сайхан амьдралын төлөө хоёргүй сэтгэлээр чин шударгаар зүтгэж ажиллацгаая.” гэсэн юм. Тэгэхээр Ерөнхий сайд Ж.Эрдэнэбат хэлсэндээ хүрч чадах эсэхийг хэн хүнгүй анхааралтай ажиж эхэлж байна.

Эх сурвалж: Шуурхай.мн