Монголчууд төрийн хар хүн гэж ярьдаг даа. Түмний өмнөөс төр түшиж яваа хүмүүсийн ноён нурууг, хэн нь хэн бэ гэдгийг мэддэгийнхээ хувиар л тэгж хэлж ярьж, цаагуураа зөөлөн маягаар эрэмбэлдэг гэхэд болно. Тэрчлэн өнөө цагийн монголын төр дэх нөхдүүдийн хэн нь муу нэртэй, зүтгэл муутай вэ гэдгийг ч олон нийт өөр зуураа хэлж ярьж л байдаг. Тэгвэл тэр таагүй тодотголтой хүмүүсийн нэг бол “түгжил” хочит Ж.Батсуурь юм.  Боловсрол, соёл, шинжлэх ухаан, спортын сайдаар томилогдоод буй Жамъянсүрэнгийн Батсуурийг сонгож болохгүй хүмүүсийн нэгээр Монголын Залуучуудын Холбооноос тодруулж байсныг уншигч та санаж болов уу. Бүр тодруулбал, тус холбооны зүгээс хар жагсаалтад оруулсан байсан юм. Гэсэн ч тэр өнөөдөр төрийн сайдын суудалд заларч байна. Гэхдээ тэглээ гээд, түүнийг дагаж төдийгөөс өдийг хүрсэн муу нэр арилахгүй л дээ. Өнгөрсөн хугацаанд нэр бүхий мэдээллийн хэрэгслүүдэд, сайтуудад Ж.Батсуурийн талаар түгжил гэх тодотголтой нийтлэл материалууд цөөнгүй гарч байсан байдаг. Тэрчлэн “түгжил” маягийн алхам хийсэн жишээ баримтуудыг нь ч олноор өгүүлсэн байдаг. Харин бид энэ удаа Jirgee.mn, deed.mn гэхчлэн сайтуудад нийтлэгдэж байсан “нутгийн олныг хордуулсан хуншгүй “Түгжилдэлт” гээчийнх нь талаар эргэн сануулж байна. Тэнд өгүүлснээр бол 2015 оны 4 дүгээр сарын 22-ны өдөр УИХ-ын Эдийн засгийн байнгын хорооны хуралдаан дээр Ж. Батсуурь бусад гишүүддээ хандан Централ Тауэрын 17 давхарт очиж сайхан хоол идэнгээ, Арева компанийхантай нууцаар уулзая, тэднууц санал тавих гэхчилэн уриалж байгаа бичлэг телевизээр цацагдсан асуудал олны анхаарал хэсэгтээ орж байсан билээ.

Сэтгүүлчид уг үйл явдлыг сурвалжлахаар очсон байгааг харсан  Ж.Батсуурь хамгаалалтын албаныханд ховлож хөөн гаргуулж байгаа нь  бичлэг дээр үлдсэн байдаг.  Тэр  үйл явдлын дараахан Арева компани Дорноговь дахь ураны ордодоо ашиглалт явуулах лиценз авсан нь тодорхой болсон байдаг. Уг нь Ж.Батсуурь Улаанбадрах сумын уугуул нэгэн атлаа нутаг усныхандаа хуншгүй зан гарган гадаадынханд найр тавьснаар цөмийн задралаас үүдэлтэй селени хэмээх бодис бэлчээрээр тархан мал хордуулж, ургийн гажигтай төл олноор төрөх болсон байдаг. Тэрээр аймгийн Засаг дарга байх үедээ анхлан Арева компанид хайгуулын зөвшөөрөл олгоход туслаж дэмжсээр ирсэн талаар ч хэвлэлүүд бичиж ирсэн юм. Ж.Батсуурь ураны хайгуул ашиглалтыг ямар ч үнээр хамаагүй хийхийг идэвхтэй сурталчлагчийн нэг бөгөөд хэвлэлээр удаа дараа энэ тухайгаа илэрхийлж байв. Ж.Батсуурь: “Арева” групп бол Дорноговьд миний мэдэхийн 10 гаруй жил ураны хайгуул, судалгааны ажил хийж, “Улаанхар” гэх мэт томоохон орд газар нээн илрүүлсэн. Би энэ ордыг ашиглах асуудлаар биечлэн хөөцөлдөж, Засгийн газарт санал тавьж, санамж бичиг байгуулах зэргээр ажиллаж байгаа.Нэгэнт бидэнд уранаа өөрсдөө ашиглах боловсон хүчний болоод эдийн засгийн боломж байхгүй учраас энэ мэт томоохон компаниудтай харилцан яаралтай ашиглах нь зүйтэй. Бид өөрсдөө хувь эзэмшье гэж байгаа бол хөрөнгө оруулалт буюу зардлын тодорхой хувийг гаргах л ёстой. Ямар ч баялгийг ашиглах, олборлоход зардал гарч л таараа. Зардал гаргахгүйгээр ашиг хүртдэг ёс хаана ч байхгүй. Миний хамгийн гол сэтгэл дундуур байдаг зүйл бол цаг хугацаа алдаж байгаа байдал. Яах вэ, надад дургүй байвал дургүй л байна биз. Гэхдээ би үнэнийг нь л хэлнэ” хэмээн ярьж байжээ.

Ж.Батсуурь гэдэг хүн ийн ярьж байх хооронд  “Арева” 2000 тонн  ураны хүдэр туршилтын журмаар олборлосон байдаг. Тэдний олборлолтоос үүдсэн хор уршгийг  монгол даяар мэдэх болсон. Тэр бол  Дорноговь аймгийн Зүүнбаян багийн малчин Д.Норсүрэнгийн  тугалууд  үхсэн бодит жишээтэй холбоотой. Тус айлын үхэр сүргээс эмнэл зүйн тодорхой шинж тэмдэггүйгээр 19 тугал бэлчээртээ үхсэн. Тэдгээрээс авсан эд, эрхтний эмгэг бие бүтцийн үлэмж ба бичил шинжилгээний үр дүнгээр цацрагийн болон хүнд металлын ужиг явцтай хордлого мөн гэсэн онош, дүгнэлтийг 2013 оны 3 дугаар сарын 11-нд Мал эмнэлэг үржлийн газраас гаргаж байсан юм. хэдийгээр улс төрийн чанартай нөлөөллөөр уг дүгнэлт өөрчлөгдсөн ч, ийм дүгнэлтийг мэргэжлийн хүмүүс гаргаж байсан гэдэг бол том сэдэв мөнөөс мөн юм. Тэгэхээр энэ мэт том ноцтой асуудлуудтай ямар нэг хэмжээгээр холбоотой байж ирсэн Ж.Батсуурь гэж хүн одоо юу бодож суудаг юм бол доо.

Эх сурвалж: Шуурхай.мн