Монголын агаарын тээврийн гол зохицуулагч болох Иргэний нисэхийн ерөнхий газрыг тойрсон маргаан чих дэлсэх боллоо. Цалин мөнгө, нийгмийн хангамжаараа манайдаа л толгой цохидог энэ байгууллагын ажилчид ямар шалтгаанаар удирдлагуудынхаа чихийг халууцуулах болсон нь сонин. Учрыг лавлавал Иргэний нисэхийн ерөнхий газар жил бүр хөрөнгө төсөвлөн, ажилчиддаа байрны мөнгө олгодог. Бүр тодруулбал жил бүр тодорхой тооны ажилчдад орон сууц авахад нь дэмжлэг үзүүлэх зорилгоор 10-30 сая төгрөгийг өгдөг.

Гэтэл энэ жилийн халамж Иргэний нисэхийн ерөнхий газрын зарим албан хаагчдын сэтгэлийг гонсойлгож, хэл ам хийхэд хүргэсэн байна. Орон байр авахад нь нэмэр болгож өгсөн энэ мөнгийг олгохдоо Иргэний нисэхийн ерөнхий газрын дотоод журмыг баримталдаг. Нэг үгээр хэлбэл тухайн үед ажиллаж байгаа удирдлагуудын эрх мэдлийн асуудал гэсэн үг. Дарга ямар журам батална, түүгээр бүх асуудал шийдэгддэг гэж ойлгож болно. Иргэний нисэхийн ерөнхий газарт таваас дээш жил ажилласан хүн мөнгөн тэтгэмжид хамрагдах журамтай. Гэтэл энэ жил хоёр, гурван жил ажилласан нөхдүүд халуудыг ардаа орхиж, орон сууцанд зориулсан мөнгөн тэтгэмж авах болсон нь эсэргүүцэлтэй тулгарчээ.

Харин шинэхэн гаруудыг хэн тэр жагсаалтад шургуулсан нь хамгийн анхаарал татсан асуудал. Тодруулбал, яам, тамгын газар гээд дээгүүрээ танилтай, албан тушаалаар далайлгаж асуудал шийддэг аж. Үүнийг батлах мэт энэ жил мөнгөн тэтгэмж авах нь тодорхой болчихсон байсан хүмүүсээс дөрөв нь буцаагдаж, жинхэнэ эзэндээ очихоор замдаа яваа гэнэ. Хэл ам хийсний хүчинд л хаалганы гадна үлдэж байсан дөрвөн хүн тэтгэмжээ авах болсон нь энэ. Харин ар, өврийн хаалгаар хэн гэдэг гарууд мөнгө “завших” гэж байсан нь тодорхойгүй, тас нуугаастай.

Хэдийгээр дөрвөн хүн хэл амныхаа ачаар зөрчигдсөн эрхээ хамгаалсан ч цаана нь арав, хорин жил ажилласан жолооч, техникчээс эхлээд өчнөөн хүн хэзээ даргын алга тэнийж, сайхан аашлахыг дуугүй хүлээсээр байгаа. Дахин хэл ам хийж, элдэв юм ярьж явбал ажлаас хална шүү гэсэн даргын дарамтанд орсон хүмүүс ус балгасан мэт дуугүй байхаас ч яах билээ. Бас болоогүй ээ, саяхан иргэний нисэхийнхэн шинэ жилээ тэмдэглэхдээ албан хаагч бүрээсээ 150 мянган төгрөг татаж. Энэ татаасанд шинэ жилийнхээ баярт оролцох боломжгүйгээр хөдөө томилолтоор явж байсан хүн хүртэл өртсөн гэнэ шүү. Ингээд л тухайн хүний гарын үсэггүйгээр цалингаас нь шууд 150 мянган төгрөг авч, баярлацгаасан байна.

chuhal.mn