Л.Гансүхийн өмгөөлөгч нар өнөөдөр цаг үеийн асуудлаар сэтгүүлчдэд мэдээлэл хийхээр хэвлэлийн бага хурал зарлаад байв. Гэвч 12 цагт зарласан хурал болсонгүй.

Учир нь хэвлэлийн бага хуралд оролцох байсан шүүгдэгч Б.Мөнгөнтуяагийн бие гэнэт муудсан талаар эх сурвалж мэдээллээ. Тэрээр шүүхийн шийдвэрийг хүлээн зөвшөөрөхгүй хэмээж, давж заалдахаа мэдэгдээд буй.

Тэрээр энэ оны есдүгээр сард болсон Л.Гансүх нарт холбогдох хэргийн шүүх хурлын үеэр “Намайг Гансүхийн эхнэр Уранчимэгийн дүү гэж цоллож хамаатуулж яллаж байгаа. Би Батцэнгэл овогтой Мөнгөнтуяа. Намайг гэрээ танилцуулсан, гэрээ хийсэн учраас яллаж байгаа гэнэ. Би хэнд ч танилцуулаагүй, хэнтэй ч гэрээ байгуулаагүй. Үнэ нь тодорхой, хэрэгжих нь тодорхой зүйл дээр гарын үсэг зурснаараа яллагдаж байна” хэмээн шүүх танхимд нулимс дуслуулан байж, өгүүлсэн удаатай.

Б.Мөнгөнтуяагийн хувьд нүүрс хөтөлбөрийг хэрэгжүүлсэн “ЭмЖиЭлЭсБи” компанийн ерөнхий нягтлангаар ажилладаг байсан юм. Түүнд шүүхээс үйл ажиллагаа явуулах эрхийг хоёр жилээр хасч, 19 сая 200 мянган төгрөгөөр торгохоор шийдвэрлэж, сулласан билээ.

Харин шүүхээс Л.Гансүхэд 4 жил 6 сарын хорих ял оноож, жирийн дэглэмтэй хорих ангид эдлүүлэхээр болсон. Түүний цагдан хоригдсон хоногийг оноосон ялаас хасахаар шийдвэрлэсэн. Мөн Л.Гансүхийг төрийн тодорхой албан тушаал эрхлэх үйл ажиллагааг дөрвөн жилээр хассан юм.

Эл шийдвэрийг тэд эсэргүүцэж, давж заалдахаа мэдэгдээд байгаа юм.

П.Жаргал

Эх сурвалж: Eagle.mn