Сүүлийн жилүүдэд манай улсад гэр бүлийн хүчирхийлэл болон бага насны хүүхдийн хүчирхийллийн хэрэг ихээр гарах болсон. Эцэг эхийн арчаагүй байдлаас болж Монголын ирээдүй болсон бяцхан үрс хэн нэгний золиос болсоор байгаа. Энэ явдал жил ирэх тусам нэмэгдэж өнөөх хүүхдийн төлөөх нийгэмлэг, байгууллага нь доривтой арга хэмжээ авахгүй л байна. Архинд хөлчүүрхсэн эцэг эхийн хар балгаар энэ хорвоод ямар ч гэмгүй бяцхан үрс хохирч байгаа нь харамсалтай. Өчигдөр гэхэд л согтуу эцэг хоёр хүүхдээ цонхоор шидэх гэж байна гэсэн дуудлага ОБЕГ-т ирүүлсэн байна. Тодруулбал, 21:50 цагт Сонгинохайрхан дүүргийн 16 дугаар хорооны 26 дугаар байрны 8 давхарт айлын цонхоор хүн унах гэж байна гэсэн дуудлага нийслэлийн Онцгой байдлын газарт иржээ. Дуудлагын дагуу аврах ангийн 9 аврагчтай бүлэг тус газар очиход 27 настай эрэгтэй архи ууж, гэр бүлийнхэнтэйгээ муудалцаж, гэрийнхээ хаалгыг дотроос нь түгжин хүн оруулахгүй 2-6 насны хоёр хүүхдийг цонхоор шидэх гэж байжээ. Онцгой байдлын аврагчид 9 давхарын айлын цонхоор доош буун тус айлын гал тогоо, зочны өрөөний цонхыг хагалан дотогш орж хүүхдүүдийг аварсан байна. Аврах ажиллагааг зохион байгуулж байхад согтуугаар хүүхдээ цонхоор шидэх гэж байсан 27 настай иргэн Б аврагчид руу хутга барин дайсан гэнэ. Харин аврагчид аврах ажиллагааг шуурхай зохион байгуулсан бөгөөд 2 хэсэгт хуваагдан хаалганы гадна Б-г саатуулж байхад нь зарим нь цонхоор орж 2 хүүхдийн амийг аварчээ. Согтуу этгээдийг болиулах гэхэд өөрийн төрсөн хүү Б /эр.2н/-д хутга тулган эсэргүүцэл үзүүлжээ. Цагдаа болон Онцгой байдлын албан хаагчид шуурхай ажиллан хэргийг таслан зогсоож чадсан байна. Одоо хэргийг Сонгинохайрхан дүүргийн цагдаагийн гуравдугаар хэлтэс шалгаж байна. Өөрийнхөө хоёр хүүхдийг согтуурсан үедээ алах гэж завдсан энэ хэрэг өнөөдөр нийгмийг цочролд оруулаад байна. Архи гэх хар усанд толгойгоо мэдүүлсэн залуучуудын гарт гэм буруугүй бяцхан хүүхдүүд хохирсоор байгааг төр засаг болоод холбогдох газрууд нь зүгээр л хараад өнгөрсөөр байх уу… Бүр цаашлаад өнөөгийн нийгмийн хувь хүний ухамсар ямар доройтсоор тэр бүрт хүүхэд эмэгтэйчүүд хохирч үлдэж байгаа нь харамсалтай.

Эх сурвалж: Шуурхай.мн