Нэгэн цэцэрлэгт хормогчтой эмэгтэй бага насны хүүхдэд хоол өгөх үеэр хэрцгийгээр зодож буй бичлэг нийгмийг цочроогоод буй. Эл хэргийн эзэн нь Дундговь аймгийн “Оюуны хөгжил” гэх хувийн цэцэрлэгийн тогооч Ж.Отгонтөгс байсан талаар бид мэдээлсэн.

Эл хэрэгтэй холбогдуулан Дундговь аймгийн Цагдаагийн газраас Ж.Отгонтөгст эрүүгийн хэрэг үүсгэн шалгаж эхэлсэн бөгөөд 3-5 жилийн хорих ял төлөвлөөд буй. Тэгвэл тэрбээр өчигдөр дээрх бичлэгийг хийсэн ангийн багш Янжинлхамын амь насанд заналхийлж, хүйтэн мэс барин гэрийнх нь гадаа очсон гэх мэдээлэл цацагдаад байна. Тиймээс бид ангийн багш Э.Янжинлхамтай холбогдож дараах тодруулгыг авлаа.

-Танай ангийн хүүхдийг тогооч багш нь хооллохдоо хэрцгийгээр зодож буй үйл явцыг та бичлэг хийн баримтжуулж авсан юм билээ. Тэр бичлэг олон нийтийн сүлжээгээр цацагдсанаас хойш тогооч Отгонтөгсийн зүгээс танд дарамт, шахалт үзүүлж тэр ч бүү хэл амь насанд тань заналхийллээ гэх мэдээлэл байна. Энэ үнэн үү?

-Бичлэгийг олон нийтэд дэлгэснээс хойш тэр тогоочийн ар гэрийнхэн  намайг байнга дарамтлах болсон. Түүний нөхөр нь архи уух бүртээ “Манай эхнэрийн мууг үзсэн. Чамайг ална” хэмээн манай гэрт ирж агсам тавьдаг. Үүнээс болоод нөхөр бид хоёр гэртээ очиж чадахгүй, гурван хүүхдээ дагуулаад айл айлаар хонож байгаа. Одоо ч би айлд байна.

-Уучлаарай, тогооч эмэгтэй танай гэрийн гадна хутга барин тань руу дайрч байгаад цагдаад саатуулагдсан гэх мэдээлэл байна. Юу болсон юм бэ?

-Үгүй. Яг над дээр хутга барьж ирсэн тохиолдол гараагүй. Харин ам хэлээр заналхийлж байгаа.

-Яг юу гэж заналхийлж байна вэ?

-Тогооч эмэгтэйтэй гадуур явж байгаад хоёр, гурван удаа тааралдсан. Надтай үг дугараагүй. Харин “Оюуны хөгжил” цэцэрлэгийн эрхлэгч н.Оюунчимэг намайг хэл амаар дарамталсан. Тэр үед “Би хүүхдийн эрхийн төлөө, хүүхдийг хамгаалах гэж ийм зүйл хийсэн”  гэхэд “Болтугай, болтугай. Хүүхдийн төлөө хийснийг чинь мэдэхгүй юм. Чамайг сайн явахыг чинь харна аа” гэж хэл амаараа заналхийлж байсан. Ер нь иймэрхүү дарамт бол байнга ирэх болсон.

-Таныг ажлаасаа халагдсан гэж сонслоо?

-Тиймээ. Би тэр бичлэгийг “Оюуны хөгжил” цэцэрлэгийн эрхлэгч Ж.Оюунчимэгт өнгөрсөн арваннэгдүгээр сарын 19-ний өдөр үзүүлсэн юм. Гэтэл тэр орой хурал зарлаад намайг шууд ажлаас халсан.

-Та шууд шийдвэрийг нь дагасан хэрэг үү. Гомдол гаргаагүй гэж үү?

-Тэгсэн. Гомдол гаргаагүй байгаа.

-Яагаад?

-Манай цэцэрлэгийн цалин сар бүрийн 20-ны өдөр буудаг юм. Тэгээд би халагдсаныхаа маргааш нь цалингаа авъя гэж хэлсэн. Гэтэл цэцэрлэгийн ня-бо “Чи өөрийн хүсэлтээр халагдсан гээд өргөдлөө бичиж өг.  Тэгвэл би цалинг чинь олгоно” гэсэн юм. Тэгэхээр нь би тухайн үед банкны зээлтэй байсан тул хүссэнээр нь өргөдлийг нь бичээд өгчихсөн. Тэр нягтлан нь манай цэцэрлэгийн эрхлэгчийн охин нь байгаа юм.

-Хүүхэд зодсон тогоочид эрүүгийн хэрэг үүсгэн шалгаж байгаа юм билээ. Энэ хэрэгтэй холбогдуулан цагдаагийн байгууллага таниас тайлбар, мэдүүлэг авсан уу?

-Авсан. Хоёр удаа очиж байцаалт өгсөн. Тогооч хүүхдүүдийг яаж зоддог байсан, хэргийн газар дээр яг юу болсон талаар бүгдийг нь ярьсан. Хэрэв үнэн мөн нь ялдаг юм бол энэ хэрэг хүүхдийн эрхийн талд шийдэгдэх байх гэж бодож байгаа.

-Тэр тогооч эмэгтэй үүнээс өмнө хүүхдэд гар хүрч байсан уу. Та энэ талаар хэр мэдэх вэ?

-Тогооч Ж.Отгонтөгсийн хувьд “Оюуны хөгжил” цэцэрлэг байгуулагдсан цагаас хойш буюу гурван жил орчим ажиллаж байгаа. Энэ хугацаанд хүүхдүүдийг зодож, цохих үйлдлийг байнга хийдэг байсан. Энэ оны аравдугаар сард ойрмогхон хоёр, гурван хүүхдийг зодож, гэмтээсэн. Тэгээд би хоёр удаагийн үйлдлийг нь тэвчиж өнгөрөөгөөд гурав дахийг нь баталгаажуулах хэрэгтэй юм байна гэж бодон бичлэг хийсэн юм. Тэгэхгүй бол хүмүүс надад итгэхгүй юм байна гэж бодоод, баримтжуулах үүднээс тэр өдөр  бичлэг хийсэн. Тэр тогооч хүүхдүүдийг зодохоос гадна хэл амаар маш их доромжилдог. Хөөрхөн инээж байгаа хүүхдийг харснаа “Яасан хөөрхөн инээдэг юм чи” гэж загнана. Бас хүүхдүүдийг “Ургийн гажигтай” гэх мэтээр элдэв нэр хоч өгч, доромжилно.

-Зарим хүмүүс таныг харсаар байгаад хүүхэд зодууллаа хэмээн шүүмжилж байсан. Тэр бичгийг та яг яаж хийсэн бэ?

-Би яг энэ асуудал дээр тайлбар хийе гэж бодож байлаа. Намайг гар утсаа барьж зогсож байгаад тэр билэгийг өөрөө хийсэн гэж ойлгоод байх шиг байна. Би тэр өдөр хүүхдүүдийн өдрийн хоолны цагаар цонхны тавцан дээр утсаа хөдөлгөөнгүй байрлуулж орхичихоод гал тогооны өрөө рүү явсан юм. Тэгээд л тэр хооронд тогооч бүсгүй хүүг зодож буй нь бичлэгт үлдсэн хэрэг. Би эмэгтэй хүн, эх хүнийхээ хувьд тийм хэрцгий зүйлийг нүдээр харах дургүй. Тиймээс л би утсаа үлдээж бичлэг хийсэн.

-Тогооч хүүхэд хооллож байгааг олон хүн гайхаж байна. Уг нь хоолоо л хийх үүрэгтэй биз дээ?

-Манай цэцэрлэгийн эрхлэгч төсөв хүрэлцэхгүй байгаа гэх шалтгаанаар туслах багш ажиллуулдаггүй байсан юм. Тэгээд л хоолны цагаар тэр тогооч туслах багшийн үүргийг гүйцэтгэдэг байсан. Эрхлэгч тэр бичлэгийг үзсэн өдрөө “Цэцэрлэгээ авч үлдэхийн тулд та хоёрыг хоёуланг нь халлаа” гээд биднийг хамт ажлаас халсан.

-Танай цэцэрлэгт хэчнээн хүүхэд хүмүүждэг вэ?

-Манай цэцэрлэгт долоон сараас нэг ой хүртэлх насны хүүхдүүд хүмүүждэг. Нийт 25 хүүхэд бий. Хоёр ангиар хичээллэдэг. Манай ангид 12 хүүхэд хүмүүждэг байсан. Сарын төлбөр нь 126 мянган төгрөг.

-Тэдгээр хүүхдүүдийн ар гэрээс энэ асуудалтай холбогдуулан гомдол, санал гаргаж байна уу?

-Эцэг эхчүүд бүгд гомдол гаргана гэж мэдэгдээд байгаа. Би ар гэртэй очиж чадахгүй яваа болохоор тэдэнтэй хамтарч ажиллаж чадаагүй л байна. Эцэг эхчүүдийг өөрсдөө цагдаад гомдол саналаа гарга гэж хэлээд байж байна. Саяхан нэг хүүхэд уналт, таталт өгч эхэлсэн гэж эцэг, эх нь хэлсэн. Тэгээд эмнэлэгт очтол “Хүүхдийн чинь бие хөхөрч, няцраагүй л бол хүчирхийлээгүй. Ханиад, томуу л байх” гэж хэлсэн гэсэн. Хүүхэд зодууллаа гээд заавал хөхөрсөн байх албагүй. Тэр хүүхэд сэтгэл санаагаар маш их цочирдсон байдаг” гэв.

Хэргийн талаар эргэн сануулахад: 10 сартай бяцхан хүүгийн зодуулж буй бичлэгийг багш Э.Янжинлхам одоогоос 2 сарын өмнө буюу аравдугаар сарын 17-ны өдөр хийсэн гэдэг. Хүүхэд зодож буй эмэгтэй тус цэцэрлэгийн тогооч Ж.Отгонтөгс гэгч бөгөөд тус цэцэрлэгийн эрхлэгч Ж.Оюунчимэгийн төрсөн дүү нь аж. Тэрээр хүүхдүүдийг зоддог гэдгийг Э.Янжинлхам багш мэддэг байсан ч түүний дарамтаас болоод олон нийтэд дэлгэлгүй өнөөдрийг хүрчээ.

П.Мөнхжаргал

eagle.mn