УИХ-ын дарга З.Энхболд өнгөрсөн бямба гаригт гэнэтхэн л Увс аймагт ажиллалаа. Ардчилсан хувьсгал үүссэний 26 жилийн ойн “битүүн”-ий өдөр Увсад л ажиллахгүй бол болохгүй гэх ноцтой шалтгаан байсан гэж үү. Зарчмын хувьд УИХ-ын дарга амралтын өдрөөрөө “хаана ажиллаж” амрах нь ёстой жинхэнэ утгаараа бүрэн эрхийнх нь асуудал. Тэр тусмаа л “Яагаад?” гэх асуулт төрөх аж.

З.Энхболд даргыг Х.Баттулга, түүний багийнхантай сүжрэх болсон тухай удаан ярилаа. Хамгийн сүүлд “Х.Баттулгыг хуулийнхан шалгалаа гэхэд АН ямар нэг байдлаар улс төрийн дэмжлэг үзүүлэхгүй, хаацайлах бодолгүйгээ шулуухан хэлсэн гэнэлээ” гэдэг мэдээлэл уншсан юм даг. Тэрхүү сонины мэдээнд “Х.Баттулга фракцийн даргын албан тушаалаас хөөгдөж байна, АН ч нүүр буруулсан” гэж бичсэн нь үнэний ортой биз. Хэдийгээр “эх оронч” үзэл нь үндсэрхэг үзэлтэй монголчуудын цөсийг хөөргөж явсан нь саяхан ч яг одоогийн байдлаар түүний эсрэг “салхи эргэчихээд” байна.

Тиймээс хэг ёг араншингаасаа болж удаан нөхөрлөдөггүй, угийн нам дотроо “хөл гаргүй” түүнийг Н.Алтанхуягийг түшиж ирэх сонгуульд орохгүй бол “намаа сонгуульд ялагдуулсан намын дарга нэрийг насаараа зүүгээд зогсохгүй, намынхаа түүхэнд дараалсан ялалтын оосроос атгаад алдсан” гэх бараан толботойгоор үлдэх магадлалтай тул Увсад “яаралтай ажиллалаа” гэх таамаглал дэвшүүлээд буй. Үнэхээр ч Хөгжлийн банкинд шалгалт хийснээр бол “Гудамж” төсөл тийм ч өөгүй өндөг шиг гэх аргагүй байтал юу юугүй нээлт хийж, өндөр ач холбогдол өгөөд зогсохгүй, “Их наяд Увс” төслийг дэмжиж, Увсаас гаралтай төр, нийгмийн зүтгэлтнүүдийн тоонд Н.Алтанхуягийг байн байн дурссан зад сурталчилсан нь  гайхалтай.

Намын даргыг ийнхүү зад “увсжаад” ирэхэд Ерөнхий сайд асан хийгээд намаасаа Ерөнхий сайдад удаа дараа нэр дэвшин өрсөлдөж байсан Р.Амаржаргал “АН-д цэвэрлэгээ хийе” гэсэн уриалга бүхий ил захидлыг намын нийт гишүүддээ хаяглан, АН-ын өнөөгийн байдал, тэр тусмаа сул талуудыг илчилж, эмчилгээг нь санал болгон Ардчилсан хувьсгалын ойн сюрприз барих нь тэр. Харин маргааш нь ИЗНН лав АН-тай нэгдэхгүйгээ мэдэгдэв.

Тэгэхээр АН-ын дарга өөрөө аль болох удаанаар оршин тогтнох, цаашилбал намаа сонгуульд ялуулахын тулд Н.Алтанхуяггүйгээр хол явахгүй, үүний тулд Н.Алтанхуягийн хүлээж хүсээд, тэчъяадаад байгаа хэлхээтэй хэдэн хуулийг нь үтэр хэлэлцүүлэхээр тохиролцсон байж болох юм. Өөрөөр З.Энхболдын хувьд Н.Алтанхуягт таалагдуулах гээд барьчих “хадаг” тун цөөн. Иймд цаашид З.Энхболд, Н.Алтанхуяг нарын шинэ холбоос, эв нэгдэл хэр хол явахыг харах л үлдэв бололтой. Гэхдээ Н.Алтанхуяг бол Н.Энхбаяр гэдгийг мартаж үл болно!

М.Зэндмэнэ

Zaluu.com