УИХ-ын Төсвийн байнгын хороо, Эдийн засгийн байнгын хороо өнөөдрийн хамтарсан хуралдаанаар Хөгжлийн банкинд хийсэн шалгалт, Чингис, Самурай бондын зарцуулалтад шалгалт хийсэн ажлын хэсгийн дүгнэлтийг танилцуулах ёстой. Хурал өнөөдөр 09.00 цагт эхлэх товтой ч одоогоор гишүүд ирээгүй байна. Тус шалгалтын дүнг өнгөрсөн долоо хоногт хэлэлцэх ёстой байсан ч Ардчилсан намын гишүүд оролцоогүйгээс тус хурал хойшлоод буй юм.

Мөн тус шалгалтыг хийсэн ажлын хэсгийн ахлагч УИХ-ын гишүүн Л.Энх-Амгалан “УИХ-ын дарга, АН-ын дарга З.Энхболд “Хөгжлийн банк, Чингис, Самурай бондын зарцуулалтад хийсэн шалгалтын дүгнэлтийг бүлгийн хурал дээр хэлэлцэж байж дараа нь байнгын хороонд ор” гэсэн чиглэл өгсөн гэсэн. УИХ-ын даргын захирамжаар байгуулагдсан ажлын хэсэг ямар нэгэн байдлаар бүлгийн хурлаар орж, бүлгээс чиглэл авна гэдэг нь хэтэрхий улстөржсөн асуудал юм. Хэрэв өнөөдрийн хуралд АН-ын гишүүд оролцохгүй бол шалгалтын дүнг хэвэлийн хурал зарлаж нийтэд зарлах болно” гэлээ.

Мөн тэрээр илэрсэн зөрчлүүдийн талаар цухас дурдахдаа, Сангийн яамнаас хийсэн шалгалтаар Хөгжлийн банкны удирдлагууд зам барих тендерт тусгай зөвшөөрөлгүй компанитай гэрээ байгуулж санхүүжилт өгсөн тохиолдол байгаа. Төсөвт өртөг нь бага мөртлөө хэрэгжилтийн явцад өртөг нь огцом нэмэгдсэн төслүүд цөөнгүй байна лээ. Эдгээр асуудлыг хуулийн байгууллага шалгах биз. Мөн Үндэсний аюулгүй байдлын газраас гаргасан зөвлөмжийг зөрчсөн баримт материалууд ч байгаа гэсэн юм.

Д.ЖАРГАЛ

Zaluu.com