Сангийн сайдын зөвлөлийн хуралдаан дээр яригдсан асуудлуудын нэг нь Зоос банкны асуудал байв.  “Зоос” банкны тухайд Монголбанкнаас томилогдсон эрх хүлээн авагчид банкны өр, авлагыг барагдуулах ажлыг зохион байгуулж ирсэн бөгөөд ажиллах хугацаандаа нийт 42,6 тэрбум төгрөгийн зээл, авлага, актив хөрөнгийг барагдуулаад байгааг энэ үеэр дуулгав.

Засгийн газраас “Зоос” банканд зориулан гаргасан төлбөрөөс 21,5 тэрбум төгрөгийг хоёр жилийн хугацаанд барагдуулсан байна.

Тус банкнаас зээлээ төлөхгүй байгаа зээлэгч нарын талаар тодорхой арга хэмжээ авч ажиллаж байгааг зөвлөлийн гишүүдэд Монголбанкны Тэргүүн дэд ерөнхийлөгч Б.Жавхлан танилцуулав.

Дээрх мэдээлэлтэй холбогдуулан холбогдох мэдээ материалыг бүрэн бэлтгэж, олон нийтэд үнэн зөв мэдээ мэдээллийг тухай бүр нь шуурхай хүргэж, мэдээллийн ил тод байдлыг хангаж ажиллахыг Сангийн сайд хэлж байв.