УИХ-ын чуулганы баасан гаригийн хуралдаанаар Ард нийтийн санал асуулгад нэмэлт өөрчлөлт оруулах тухай хуулийн төслийг хэлэлцэхийг дэмжиж байнгын хороонд шилжүүлсэн юм. Энэ үеэр үг хэлсэн МАН-ын  гишүүн бүр л дэмжихгүй, эсэргүүцэв. Тэд намын бүлэг дээрээ “эцэг” хуулийг ард нийтийн санал асуулга явуулж өөрчлөлт оруулах эсэхийг  шийдэхийн эсрэг байж  “үгүй” гэсэн  кноп дарна гээд  тохиролцсон бололтой. Ямар ч асуудал хэлэлцлээ үг хэлэлгүй өнгөрөөдөггүй, хэлэмгий, доломгойгоороо зартай  УИХ-ын гишүүн Ц.Нямдорж  ард түмэн шийдэхгүй, бид шийднэ гээд  ам алдчихав. Тэрээр ” Ард түмэн дөрвөн жил төрийн хэргийг шийдээд ир гэж биднийг явуулдаг юм. Түүний цаана хэдэн мянган сонгогчийн санал байдаг ш дээ. Миний карманд эрхийг хийж өгөөд л явуулж байгаа” гэж хэлээтэхэв. Энэ нь нэгэнт бидэнд эрхийг өгсөн, одоо олон түмэн юу  бодох нь хамаагүй, тэднээс асуух шаардлагагүй гэж хэлсэнтэй адил сонстож буй
.

Уг нь    Монгол Улсын Үндсэн  хуулийн 3-р зүйлийн 1-д  “Монгол Улсад засгийн бүх эрх ард түмний мэдэлд байна. Монголын ард түмэн төрийн үйл хэрэгт шууд оролцож, мөн сонгож байгуулсан төрийн эрх барих төлөөлөгчдийн байгууллагаараа уламжлан энэхүү эрхээ эдэлнэ” гэж заасан байдаг.   Ард түмэн төрийн үйл хэрэгт  ардчилсан тогтолцоонд шилжснээс   хойш шууд оролцож байсангүй. Гагцхүү сонгож байгуулсан төлөөлөгчдийн байгууллага буюу парламентын гишүүдийг  сонгож түүгээрээ  дамжуулж, төрийн эрхийг барьж ирлээ. Харин шууд төрийн хэрэгт оролцоно гэдэг санал  асуулгаар шийдвэр гаргахыг хэлж буй хэрэг юм. Өнөөдөр Үндсэн хуульд нэмэлт өөрчлөлт оруулах асуудлыг улстөржүүлж, намууд хоорондын “зодоон” болгочихлоо. Нийгэм, улс орны байдал ч эгзэгтэй байна. Ийм л  үед  түмэн олон түүхэн шийдвэрээ өөрсдөө гаргаж, тулгуур хуулиар олгосон эрхээ эдлэх учиртай. Монгол Улсад тогтолцооны хямрал нүүрлэсэн, намууд төр, ард түмний дээр “сандайлж” суучихсан, эдийн засгийн байдал улам дордож байгааг олон олон  мэдэрч, өөрчлөлт хэрэгтэй гэж хаа  сайгүй ярьцгаах боллоо. Гэтэл  ард түмний шийдвэрээ гаргах эрхийг ардын нэртэй нам нь хязгаарлахыг оролдож болохгүй ээ.

Х.Тэргэл 

Эх сурвалж: TIMES.MN