Д.АРИУН

МАХН, МАН-ын нэр бүхий ахмад гишүүд хоёр намын даргатайгаа уулзаж, өргөн барих бичгээ гардуулжээ.  Академич Ч.Авдайгаас эхлээд Сонгуулийн ерөнхий хорооны дарга асан М.Ядамсүрэн нарын 43 хүн гарын үсэг зурсан энэ өргөх бичигт гол нь “Үзэл бодол угшил үндэс нэгтэй МАН, МАХН-ын дарга Ерөнхий нарийн бичгийн дарга нар эх орон ард түмний эрх ашгийн үүднээс үл ойлголцол маргаанаа зогсоож, аливаа асуудлаа ухаан, тэвчээр гарган ярилцаж, эв нэгдлээ бэхжүүлэх үндсэн дээр 2016 оны УИХ-ын ээлжит сонгуульд хоёр нам эвсэж, орох саналыг та бүхэнд хүргүүлж байна” гэсэн байна. Ахмадууд  2013 оны Ерөнхийлөгчийн сонгуульд хоёр намыг эвсэж орох тухай санал тавьж байсан бөгөөд намын удирдлагууд талархан хүлээж авсан боловч ажил хэрэг болгоогүй гэдгийг ч өргөх бичигтээ дурджээ.

Ахмадуудын өргөх бичгийг хүлээн авах үеэрээ МАХН-ын дарга Н.Энхбаяр “Ахмадуудынхаа өргөх бичгийн агуулгыг сонсоход та бүхний сэтгэлийн зовнил, өнөөдрийн хүнд хэцүү байдлыг дүгнэн энэ байдлаас гарах гарцыг хоёр нам эвсэх гэж дүгнэж тунгаажээ. Энэ бүхэнтэй би санал нэгтэй байна. Гэвч нэг хүн санал нэгдэхээс илүүтэй өөр олон хүмүүсийн санал нэгдэж байж энэ асуудал цааш өрнөх ёстой. Ялангуяа МАХН, МАН-ын удирдах бүрэлдэхүүний санал нэгдэх ёстой. Тийм учраас бид хойшоо суухгүй, тойрч гүйхгүй идэвхтэй оролцъё.

Бидний өмнө дөрвөн үүд хаалга бий. Нэгдүгээрт, дангаараа УИХ-ын сонгуульд оролцох,хоёрдугаарт та бүхний санаачилсанчлан МАН-тай хамтраад сонгуульд оролцох,гуравдугаарт АН-тай хамтарч оролцох, дөрөвдүгээрт бие даагчид, жижиг намуудтай хамтран сонгуульд оролцох гэсэн үүд хаалга байгаа.

Өнөөдрийн тухайд та бүхэн МАН-тай хамтар гэсэн үүд хаалгыг зааж байна. Та бүхний тавьсан саналын дагуу нөгөө талтай уулзъя. Уулзахад буруу зүйл гэж байхгүй” гэдгийг онцлоод хэрэв эл уриалга, санаачилга бүтэхгүй  бол хэнээс болж, яагаад болсонгүй вэ гэдийг маш зөв ойлгоорой” гэсэн байна.

МАН-ын дарга М.Энхболд “Энхболд ахмадуудын өргөн барьсан албан бичгийг өнөө, маргаашгүй МАХН-ын Удирдах зөвлөлд танилцуулж, тоймтой хариу өгнө” гэж хэлсэн байна.