Н.Энхбаяр тэргүүтэй авлигын хэрэгтнүүд өршөөлийн төлөө улайрч байна

Н.Энхбаярын дүү Н.Энхтуяагаас “Улаанбаатар таймс” сонины хувьчлалын талаар байцаалт авах олон шаардлага АТГ-ынханд байсан ч тэрбээр олдохгүй байгаа юу, эсвэл түүнийг хайхгүй байна уу гэдэг тодорхойгүй хэвээр байна. Тэрээр бизнесийн зөвлөгөө өгдөг “Эскон” хэмээх хувийн компанийг 2010 онд ахаасаа авснаар энэ хэрэгт нэр холбогджээ. Н.Энхтуяа тухайн үед Сингапурт байрлах усан онгоц бүртгэдэг компанийн бүртгэгчээр ажиллаж байв. Тэр 2004 оноос хойш АНУ, ОХУ, Сингапурт амьдарч байсан бөгөөд Монголд суурин байгаагүй. Харин компанийнхаа үйл ажиллагаанд алсаас оролцдог байсан ажээ. Үүний дараа “Mедиа холдинг” компанийн 500 ширхэг хувьцааг эзэмшдэг байсан УИХ-ын гишүүн Ц.Мөнх-Оргил өөрийн хувиа Н.Энхбаярын дүү Н.Энхтуяагийн нэр дээр шилжүүлсэн байдаг. Н.Энхтуяа “Медиа холдинг”-ийн захирал болоод “Улаанбаатар таймс” НӨҮГ-ийн хувьчлалын дараа Н.Энхбаярын “Кроп” компанид хөрөнгөө шилжүүлсэн юм. Ахынхаа бэлэглэсэн компанийг авсан дүү нь өмчилснөөр ийн хэрэгт холбогдсон байдаг.

Б.Хуягийг “Өргөө” зочид буудлын хувьчлалын асуудлаар шалгах шаардлагатай ажээ. Экс Ерөнхийлөгчийн шадар туслахаар ажиллаж байсан Б.Тулгыг өнгөрсөн оны арванхоёрдугаар сард “Өргөө” зочид буудлын хувьчлалтай холбогдуулан баривчлаад сулласныг олон хүн мэднэ. Харин түүний төрсөн ах Б.Хуяг АНУ руу дүрвэсэн байдаг. Тэрээр Н.Энхбаяр нарт холбогдох хэргээс болоод сүүлийн хоёр жил эх орондоо ирж чадахгүй байгаа ч хаа нэгтээ найз, нөхөд рүүгээ цахим шуудан бичдэг гэсэн мэдээлэл бий. Иймээс ч АТГ, УМБГ-аас Буяагийн Хуягийг луйврын хэрэгт холбогдуулж Интерполоор эрэн сурвалжлуулж эхэлсэн. НИТХ-ын тогтоолоор “Өргөө” зочид буудлыг “Хар дун” компанид шилжүүлснээр Б.Хуягийн нэр энэхүү дуулиант хэрэгт холбогдох болсон юм. “Хар дун”-гийн гэх хавтаст хэрэгт нарийн яривал Н.Энхбаярын хүү Э.Батшугар ч холбогддог гэдэг боловч эдүгээ Монголбанкны дэд ерөнхийлөгчөөс Монгол Улсын Шадар сайд болох гээд юун гэмт хэрэгт холбогдохтой манатай өсөн дэвшиж яваа нь сайн аавын буян, ийм буянтай хүүд хууль үйлчилдэггүйн жишээ бололтой. Дээрх бүх хэрэг Ерөнхийлөгчийн хоригийг УИХ хүлээж аваагүй тохиолдолд замхарч хэрэгтнүүд өршөөгдөх гэж байна.
С.Баяр,С.Батболд нарын “үеийнхэн” бас өршөөл хүлээсээр…
Тэдэн дээр УИХ-ын гишүүн асан Ц.Батбаяр, Д.Дондог нар нэмэгдэнэ. Ийн үргэлжилсээр С.Баярын Засгийн газрын үеийн “өршөөгдөх авлигачдын цуваа”-тай холбогдож байна. Үүнд С.Баяр өөрөө ч хомроглуулаад авсан. Г.Уянга гишүүний хувьд С.Баярыг анхны эхнэр болон охид, одоогийн найз бүсгүйн нэр дээр Америкт тансаг хаусууд авч өгсөн. Цаашлаад энэ нь мөнгө угаасан хэрэгтэй холбогдож магадгүй гэсэн зүйлийг тодорхой баримтуудын хамтаар дэлгэсэн билээ.
Харин С.Баяр “Би солиотой хүн биш долоон байшингаар яах юм бэ. Нэр төрд халдсан хэргээр цагдаагийн байгууллагад хандана” гэдгээ мэдэгдсэн. Хожим нь УИХ-ын гишүүн Г.Уянга гишүүний нэр дээр АТГ-аас “С.Баяртай холбоотой гэмт хэргийн шинжтэй мэдээллийг хуулийн дагуу хянан үзэж байна” гэсэн албан бичгийг хаяглан явуулжээ. Ингэснээр АТГ С.Баярыг шалгаж эхэлсэн, Г.Уянга гишүүнээс ч тодруулга авсан нь тодорхой болсон юм. Ямартай ч С.Баярыг АНУ-д 24 тэрбумын үнэтэй долоон байшин эзэмшиж байгаа гэсэн мэдээлэл няцаагдаагүй байгааг бодоход түүнийг “цэвэр шүү” гэж цагаатгаагүй, хилсдүүлчихлээ гэж уучлал гуйгаагүй л байна.
С.Баярын Засгийн газрын үед авлига авсан, албан тушаалаа урвуулан ашигласан гэмтнүүдийг С.Баярцогт, Л.Гансүх нар тэргүүлнэ. Улмаар Ашигт малтмалын газрын дарга асан Д.Батхуяг хууль бусаар 120 гаруй лиценз олгосон хэргээр шалгагдаж эхэлсэн. Төдөлгүй “Рио Тинто”-гийн төлөөлөл, “South gobi sands” компанийн Ерөнхийлөгч “Жастин Капла ч энэ хэрэгт холбогдсон тул түр хугацаагаар албадан саатуулж Монгол Улсаас гарч явахыг нь хориглосон нь дуулиан тарьсан төдийгүй гадаадын хөрөнгө оруулагчдад сөрөг дохио болсон юм.
Мөн С.Батболдын Засгийн газарт ЭМЯ-ны Төрийн нарийн бичгийн даргаар ажиллаж байсан Н.Түмэндэмбэрэлийг албан тушаалаа ашиглан тендерийн мөнгийг хувьдаа завшсан хэрэгт буруутгаж байгаа юм. Хэргийг шалгах явцад тендерийн мөнгийг 2012 оны гуравдугаар сарын 30-ны өдөр Сангийн яамнаас Н.Түмэндэмбэрэлийн эзэмшлийн “Лабтех” компанийн данс руу 1.735 тэрбум төгрөгийг MRI соронзон оношлогооны аппарат Шастиний нэрэмжит III эмнэлэгт нийлүүлэхэд зориулан шилжүүлсэн. Шилжүүлж авсныхаа дараа “Саммитмедикал сервис” компанийн данс руу нэг тэрбум 720 саяыг нь шилжүүлж, тендерийн ажлыг гүйцэтгүүлсэн нь тогтоогджээ. Өөрөөр хэлбэл Н.Түмэндэмбэрэл нь бусадтай үгсэн хуйвалдаж өөрийнхөө компанийг тендерт шалгаруулаад өөр компаниар хуучин тоног төхөөрөмж нийлүүлсэн хэрэгт сэжигтнээр татагдсан юм. С.Баярцогт, Ё.Отгонбаяр нарын холбогдоод байсан багтдаг ZTE-ийн хэрэг гэгч замхарсан уу, мөн л тусгаарлан шалгаж байна уу. Цагаатгалаа гэж дуулдаагүй болохоор бас л өршөөл хүлээж байгаа бололтой.
Н.Алтанхуягийн Засгийн газрын үеийн авлигачид намаа талцуулж байна
Н.Алтанхуягаас өөрөөс нь эхлээд ахлах зөвлөх, төрсөн охин, хүргэн дүү гээд олон хүн энэ өршөөл хамаатай. Мөн түүний Засгийн газарт багтсан Эдийн засгийн хөгжлийн сайд Н.Батбаяр, Эдийн засгийн хөгжлийн яамны Төрийн нарийн бичгийн дарга Б.Шинэбаатар нарыг “Чингис бонд”-ын хөрөнгийн зарцуулалт, тэр тусмаа үйлдвэржүүлэлтийн 888 төсөлтэй холбоотойгоор шалгаж эхэлсэн гэдэг. Н.Алтанхуягийн Засгийн газрын хэрэг эрхлэх газрын дэд дарга, “Эрдэнэс Тавантолгой” компанийн ТУЗ-ийн дарга Г.Дэнзэн 17 тэрбумын хэрэг нь улам ч нэмэгдсээр байдаг ч хоригдож байх хугацаандаа бие нь муудаж, захиа бичиж, эгээ л том ах нарын гаргадаг авир бүхнийг гаргаж, хэлдэг бүхнийг хэлсээр батлан даалтад гараад байна. Магадгүй батлан даалтад гаргаагүй бол өнгөрсөн тавдугаар сард 461 дүгээр ангид хоригдож байгаад амиа алдсан Д.Амарсайхан агсны адил золгүй явдал тохиолдох вий гэж урьдчилан сэргийлсэн бизээ. Д.Амарсайхан агсны хувьд мөн л Газрын тосны газрын даргаар ажиллаж байхдаа “Петро Чайна Дачин Тамсаг” ХХК-ийнхантай нийлж мөнгө угаасан хэрэгт холбогдон шалгагдаж байсан билээ.
Н.Алтанхуягийн Засгийн газрын үеийнхний албан тушаалын гэмт хэрэгт холбогдсон байдал нь голдуу “Чингис”, “Самурай” зэрэг бондын хөрөнгийн зарцуулалтай холбоотой байдаг. Тиймээс Хөгжлийн банкны гүйцэтгэх захирал Н.Мөнхбат, “Гудамж” төслийн Д.Батболд, “Нүүрс” хөтөлбөрийн Л.Гансүх, “Цэвэр агаар” сангийн захирал Н.Хүрэлсүх, нягтлан бодогч М.Хулан гэхчлэн толгой дараалан шалгагдаж шүүгдэж байна. Тиймээс ч Өршөөлийн хуульд Ерөнхийлөгч хориг тавих вий гэсэн айдастай тэдэнд хамгийн их хамаатай. Учир нь мартагдаж амжаагүй шинэ сэрэг дээрээ байгаа болохоор олон түмний анхаарлыг татаж буй. Ийнхүү ял сонссоноос эхлээд мөрдөн байцаалтын шатанд байгаа, тусгаарлан шалгаж байгаа гэх олон хэргүүд Өршөөлийн хоригийг эсэргүүцэн дуншин хүлээж байна.
Энэ мэтчлэн “аалзны тор”-ыг хөвөрдөөд байвал үл тасрах бололтой. Таслах гэснийг нь тас цохиж сүүлдээ АТГ-тай тэмцэх уриалгаар эхэлж Өршөөлөөр төгсөх “Авлигачдын алтан үе” нэгэнт ирсэн бололтой. Сүүлдээ авлигачид нам, фракц хамааралгүй “Шударга үнэний” эсрэг тэмцэн үүндээ Засгийн газрыг барьцаалах замаар ажиллаад байгааг Хууль зүйн сайд Д.Дорлигжав телевизээр хэлчихлээ. Өршөөлийн хуулийг ардуудад зориулъя л гэсэн бол авлига, албан тушаалын хэрэгтнийг өршөөх ёсгүй. Ардууд бол шударга үнэнээрээ явахыг чадах ядахаараа хичээж байна. Тэдний сайн сайхан амьдрах нөхцлийг шунахайн сэдлээр булаан авч албан тушаалын гэмт хэрэг үйлдсэн хүмүүс хариуцлагаа заавал хүлээх ёстой. Гэвч Өршөөлийн хуулийг “худалдан авсан” үе үеийн авлигачид Ерөнхийлөгчийн хоригийн эсрэг тэмцэхээр нэгдэж байгааг бид харж байна. Өршөөлөөр наймаалцаад ялсан авлигачдад хоригийг бүү худалдаарай, УИХ-ын дарга аа!!!