“Шийдлийн” Засгийн газраас МАН-ын зургаан сайд гарч, тэдний оронд үүрэг гүйцэтгэгч зургаан хүнийг тохоон томилсон. Жинхэнэ сайдууд хараахан тодроогүй байна. Гэтэл үүрэг гүйцэтгэгч нар агентлаг газрын дарга нарыг дур мэдэн хууль бусаар халах явдал байгаа нь хэний ч хачирхлыг төрүүлж таарна.
Хамгийн наад захын жишээ гэхэд Хөдөлмөрийн эрүүл мэнд судлалын төвийн дарга Д.Очирбатыг хөдөө томилолтоор явж байхад нь буюу наймдугаар сарын 10-ны өдөр Хөдөлмөрийн сайдын үүрэг гүйцэтгэж байгаа С.Эрдэнэ халах тухай Б/146 тоот тушаал гаргажээ. Харин түүний оронд урьд өмнө тус төвийн даргаар ажиллаж байсан Л.Уртнасанг томилсон аж. Улмаар Д.Очирбат даргыг томилолттой хугацаанд хаалга үүдийг нь хүч хэрэглэн тамга тэмдэг авах гэсэн нь олны гайхширлыг бараад байна.
Хамгийн инээдтэй нь Л.Уртнасан гэх энэ нөхөр 2015 оны хоёрдугаар сарын 2-ны өдрийн Б/03 дугаар “Тэтгэмж олгох тухай” тушаалаар ажлаасаа чөлөөлөгдөж зургаан сарын цалинтай тэнцэх тэтгэмж авахаар болж, өнөөдөр ч энэ тэтгэмж авах хугацаа нь дуусаагүй аж. Гэтэл үүрэг гүйцэтгэгч сайд маань хууль бусаар ажил хүлээлцсэн байна. Иймээс тус төвийн газар, хэлтсийн дарга нар мэдэгдэл гаргаад байгаа билээ.
Гэтэл Л.Уртнасанг хууль бусаар томилдог наймдугаар сарын 10-ны урьд өдөр буюу наймдугаар сарын 9-нд С.Эрдэнэ сайдын эцэг сагсан бөмбөгийн нэрт мастер Д.Содномзундуйн хөшөөг Хандгайт дахь “Олимп” цогцолборт босгосон юм. Үүнд С.Эрдэнийг тойрон хүрээлэгчид, түүнийг дагаж далдагнагчид дунд Л.Уртнасан нэлээд үүрэгтэйгээр явж байгаа нь сэтгүүлчийн нүд, дурангийн хальснаа үлджээ.

Хөшөөг нээх ажиллагааны үеэр Л.Уртнасан С.Эрдэнэ сайдад цэцэг барин , бөгсийг нь долоох шахам гүйж байсныг ойрын эх сурвалж ч хэлж байна. Энэ л үеэр Хөдөлмөрийн яамны харьяа  Хөдөлмөрийн эрүүл мэнд судлалын төвийн тамгыг хууль бусаар ч хамаагүй авах тохироо хийгдсэн гэдэг нь ойлгомжтой. Манайд албан тушаалын халаа сэлгээ ингэж л хийгддэг бичигдээгүй хуультай.
Ийнхүү наймдугаар сарын 9-ний өдөр үүрэг гүйцэтгэгч С.Эрдэнийн цүнхийг зөөх шахуу цэцэг барин гүйж байсан Л.Уртнасан гэгч нөхөр, маргааш нь буюу наймдугаар сарын 10-ны өдөр тус төвийн даргаар томилогдсон гэх тушаал гаргуулсан байгаа юм.
Төрийн албыг ямар хөшөөний нээлтэд хундага өргөхдөө томилдог юм уу. Төрийн албыг ямар хэн нэгэн цүнх зөөж тал зассанд хууль бусаар өгдөг юм уу: Төрийн албыг ямар нэгэн найр хуримын ширээний ард хундагны үг шиг өгчихдөг юм уу гэж асуумаар байна.

                                                                                                                                                      А.Гал