Эмтэрсэн аяганд цай уух дургүй ард түмэн “доголон” төртэй наадмаа угтах уу. Төрт ёсны их баяр наадмын өмнө “Төр минь” гээд хүндлэе гэхнээ итгэл төгс бус нөхцөл байдалтай учирлаа.Эв нэгдлийн бэлгэдэл-Ерөнхийлөгч энэ “гурвалжин гэр бүл”-ийг салгах дургүй байгаагаа илэрхийлэн “эвлэрэх” хугацаа өгчихөөд айлчлалд мордов. Иртэл нь хэрэлдэж муудалцсаар байх уу. Эсвэл Ерөнхийлөгчийн хэлсэнчлэн нэг намын нэлээн хэдэн хүний шийдвэрээр Засгийн газраа тараах уу. АН-ын Гүйцэтгэх зөвлөлөөс УИХ дахь намын бүлэгтээ өгсөн даалгавраар бол арав хоногийн дотор Засгийн газрыг задалж зургаан сайдын орны хүмүүсийг УИХ-аар хэлэлцүүлж “элэг бүтэн” болгох ёстой гэнэ.

АН-ын Гүйцэтгэх зөвлөлөөс УИХ дахь намын бүлэгтээ өгсөн даалгавраар бол арав хоногийн дотор Засгийн газрыг задалж зургаан сайдын орны хүмүүсийг УИХ-аар хэлэлцүүлж “элэг бүтэн” болгох ёстой гэнэ.

Хэрэв АН-ынхан Төрийн тэргүүний үгийг дагаж гэрээгээ үргэлжлүүллээ гэхэд элэглэж шоолоод байх нь юу л бол. Тэгээд ч засгийн эрхийг барих бүртээ дотоод зөрчлөөсөө болж бусгаж хөрвөөдөг, “ордны хуйвалдааны аргаар” Засгийн газраа тараадаг гэдэг гуншингаа ичгүүртэйгээр ч атугай гээж эвлэлдэн нэгдэж сонгуультай золговол яасан юм бэ гэдэг дээр талцаад эхэлсэн сурагтай. Хадаг барьж гуйсан Ерөнхий сайдаа улайлган байж хагалан бутаргахын цаана дахиад хэдэн жилийн хугацаанд сөрөг хүчин байх бол гэсэн айдас хүйдэстэй байгаагаа ч зарим гишүүн нь нуухгүй байгаа гэнэ.

Энэ тохиолдолд Ардын намын өмнө буулт хийх бус ард түмнээсээ уучлал гуйчих хэрэгтэй юм. “Нэг алхам ухарч хоёр алхам урагшилна” гэх зарчмаар бол АН-ын Гүйцэтгэх зөвлөл болон УИХ дахь АН-ын шийдвэр буруутаж мэдэх үндэслэл дэндүү олон бий. Авлигатай тэмцэх газраас шалгагдан буруутаад байгаа дарга асанууд, тэдний тойрон хүрээлэгчдийг хар. Өнөөдөр Монголын эдийн засагт авчирсан гай гамшиг, өр ширийг хар. Урагшилсан биш гацсан ажлууд, тэдний шалтгааныг хар. Энэ бүхэнд яагаад МАН буруутна гэж. Дэндүү буруутгах гэж яараад, хүчилж наагаад байгааг чинь сонгогчид эртнээс мэдрээд байна. Магадгүй, цаашид Засгийн газрыг энэ бүтэц, бүрэлдэхүүнээр нь ажиллуулахад хүрлээ гэхэд МАН-ынхан “Та нар хөөсөн биз дээ” гэж гэдийж мэдэх ч “үхэхээс бусдыг үзэж” 94 жилийн ойтойгоо золгож буй “өвгөн” нам төрийн тогтвортой байдлыг хангаж яваад сонгуультай золгохоо ч бас мэднэ. Гэхдээ “Хагарсан чулуу эвлэж нийлдэггүй шиг үнэн”-ийг хэлэхэд АН-ынхан өөрсдөө л буруутан. Эвдэрсэн ч, эвлэрсэн ч тэр.

Тийм ч учраас АН-аас нэр дэвшиж ялсан Ерөнхийлөгч хүртэл үүнийг мэдэрч, тодруулбал 2016 оны сонгуулийг тосож хагарч цуурахаас нь өмнө эвлэрүүлэх үгээ хатуухан ч гэсэн хэлчихээд мордлоо. Эргээд ирэхэд нь шинэ бүтэц танилцуулахад таатай хандахгүй нь ойлгомжтой. Мөн АН-ынхан уучлал гуйчихлаа гэхэд ч баярлахгүй.

Зөвхөн хөгжлийн төлөө, хөрөнгө оруулалт татахын төлөө улс төрийн тогтвортой нөхцөл байдлыг хангаж ажиллаасай. Дахин томилгоо хэлэлцэж, бүлэг, байнгын хороод хуралдаад, чухал хуулийн төслүүд овоорчихоод байхад хойшлуулаад байгаасай гэж төрийн төлөө гэсэн улстөрч хүсэхгүй. Өнөөдрийн байдлаар Засгийн газар хэрхэхийг, улс төр, эдийн засаг, нийгэмд ямар шинэ нөхцөл байдлыг хэн ч хэлж мэдэхгүй байна. Засгийн газрын гишүүд ч, МАН-ын зургаан сайд ч өмнөх замаа харахгүйгээр жолоо барьж явна. “Үлдэх хүнээр ачаа бүү татуул” гэдэгчлэн “МАН-ын” гэсэн хаягтай төрийн байгууллагын ажилтнууд ч маргаашгүйгээр ажиллаж, ёстой л “хоноцын сэтгэлгээ” гэгчээр наадмыг үдэж байгаа харагдана. Тэдний буруу гэж хэлэхэд хэцүү биз дээ. Сэтгэл шулуудан, “маргааш”-ийн төлөвлөгөөтэй ажиллаж амьдрах сайхан. Наадмын маргааш МАН-ынхан намар шиг л буцах амархан. Хамтарсан шиг хамтарч чадаагүй, урьчихаад хөөсөн гэрийн эзэн, тэр айл хоёрыг л олон нийт цаашаа хэрхэн “аж төрөх”-ийг нь харж хоцорно. Учир нь алдаа бүхнийг нь аваад явахгүй учраас тэр шүү дээ.

Эх сурвалж: Zaluu.com С.Лантуу