Б.Галааридын “Тэнгэр цэвэрлэж, Хаан тодруулагч Мөнхсаруул” нийтлэлийг уншлаа.

Уншаад Б.Галаарид гуайн тухай миний ойлголт орвонгоороо эргэлээ. Учир нь мөнхтэнгэр гээчийг энгийн ухаанаар судлах аргагүй байдаг, судлаад ч олигтой ойлгодоггүйг баталж байх шиг. Эсвэл хэн нэгний эрх ашгийг хамгаалж захиалгаар, гуйвуулж бичсэн юм байна гэж ойлголоо. Мөнхтэнгэр судлаач гэж итгэж явсан хүн маань ямар ч судалгаагүй, хийсвэр дүгнэлт хийж, гүтгэлэг, хов жив цуглуулан бусдыг үгүйсгэн хоолоо олж иддэг дүр төрхийг илэрхийлж буй нь өнөөгийн араатан шинжиндээ орсон нийгмийн манлайлагчдын үнэн дүр төрхийг харуулж, тараа таниуллаа даа.

Тэр хүн таныг судлаад өгөөч гэж хандсан гэжээ. Тэнгэр мэддэг гэгддэг, судалдаг болохоор чинь таны сүнсэнд ирсэн даалгаврыг таниулж, өнөөдөр ингэж хөгөө чирэх вий гэсэндээ өвөг дээдэс чинь танд судлах хугацаа өгч эрт уулзуулж дээ. Мөнхсаруул гэгээнтэн харин өөрт өгөгдсөн тэнгэрийн өгөгдлийг үнэнчээр дагадаг хүний хувьд эргээд өөрийг нь хэрхэхийг үл хайхран ариун цагаан итгэлээр тантай уулзаж дээ.

Нөгөө талаар та Бөө судлаач бол түүнээс дээш түвшний оюун санааг шууд буулгах цаг ирснийг анзаараагүй байж болох юм. Зөвхөн үзсэн харсан цонхоороо ертөнцийг харж, түүний хязгааргүй боломжийг үгүйсгэж буй бололтой.

Таныг хүндэтгэн үнэлж, өөрт тохиолдож буй энэ гайхам үзэгдлийг тайлах гэж зам мөрөө хайж явахдаа Б.Галаарид гуай л Тэнгэрийг мэднэ, шилдэг нь гэж танд хандсан сайхан сэтгэл рүү ус цацаж, та ч сайхан царайлахын хажуугаар хүний улыг шагайн, хожим новшрох хогийн санаа өвөрлөн үлдсэн байх юм.

Энгийнээр ойлгоход шүлэг бичдэг хүү эхний хэдэн бичсэн шүлгээ уншин урамшиж нэгэн яруу найрагчид үзүүлэхэд сонирхьё гэж авчихаад шоолж муулаад хадгалах, бөх болох авьяастай хүү анх сонирхолоо даган сумын заан дээр очиход ээрч мууран хэдэн мэхээ нуун мултарч хар амиа бодон, хүн чанараа гээсэнтэй ялгаагүй үйлдэл биш үү. Галаарид гуайг энэ жудаггүй, хүний мөсгүй үйлдлээ үргэлжлүүлэн даамжрах шинжтэй байгааг анзаарсандаа энэ зүйлийг бичиж байна.

Аливаа зүйлд хөгжил гэж байдаг, улаач түшээ нар ч онгодоо зөв буруу ойлгох, санааг зөв барин дамжуулах, харсан үзсэн мэдрэмжээ танин тайлбарлахдаа алдаж оносоор зүгширдэг. Таны үзье, сонирхьё, судлая гэж 2012 онд авч үлдээд одоо баримт гэж дэлгээд байгаа жижиг тэмдэглэл үеэ өнгөрөөж, 300 гаруй боть судар, ном болоод хавьгүй өндөр түвшний судалгааг хүлээж байна.

Та хэдэн өдрөөр, хэдэн цагаар туульс хайлах мэт яруу сургааль, судрыг буулгаж чадах нэгэнтэй тааралдаж байсан уу. Энэ энгийн нэгэн солиотой, мунхаг хүний хийж чадах зүйл үү. Түүнд итгэж дэмждэг олон зуун хүн анхандаа тань шиг л дүгнэн цэрвэдэг ч эгэлгүй их судруудыг нь чихээр сонсож, нүдээр харан уншаад тэнгэрийн үйлэнд нь оролцож, судалсаар өөрийн эрхгүй үнэнд гүйцэгддэг юм даа. Харин тэр таны шоолж буй итгэн дэмжигчид дотор бөө удган нь ч, лам хар ч, эмч домч нь ч, энергийн засалч үзмэрч нь ч, эрдэмтэн доктор ч, зурхайч одон оронч, зохиолч найрагч, урлаг соёлынхон ч, зураач барималч, багш, бизнесмэн, малчин, тариачин, оюутан, залуучууд, идэр насныхан бий.

Хаан   гэдэг нь у-хаан гэдэг үгнээс гаралтай ханасан оюун ухаан буюу оюун ухааны оргилд хүрэхийг, тэнгэрийн нууцын айлдварыг тайлах ухааныг хэлж буй юм аа.

Хатан ч ялгаагүй.

Б.Галаарид гуай өөрийгөө хаан бол гэж хэлсэн гээд шоолсон байна лээ. Харин ч хаан гэдэг нь Чингис хаан бол гээгүй шүү. Та хаадын удам, хэн нэгэн хааны сүнсийг эрхшээж төрсөн нэгэн байж яагаад болохгүй гэж. Та яагаад youtube дээр тавигдсан, шууд газар дээрээс нь хийсэн баримтат бичлэгүүдийг үзэлгүй, сонсолгуй хэдхэн хуудсанд хураангуйлан тавьсан танилцуулгыг шүүрэн авч яаран дүгнэлт хийдэг билээ.

Мөнхсаруул багш бөө ч биш, ламч биш, үзмэрч шидтэн ч биш шашин номын эрдэмд тэр зориуд суралцаагүй. Харин өөрийгөө, сэтгэл ухамсраа хөгжүүлж, сонсож тэнгэрийн өгөгдлөөрөө тэнгэр, дээд оюун санаатай холбогдож, Өвөг дээдэсийн мэдээллийг дамжуулж чадаж байгааг нь хэн ч үгүйсгэж чадахгүй байна. Тэрээр хоёр гурван цаг битгий хэл, хонон өнжин орон зай нөхцөл байдлаас үл хамааран шүлэглэн тэнгэрийн туульс дамжуулах онцгой чадвартай хүн юм. Ийм онцгой чадвартан хүн төрөлхтний түүхэнд үнэхээр ховор байсан гэдэг.

З.Бат–Отгон багш ийм хүмүүсийг бөө тархитай хүмүүс гэж нэрлэн харин ч судалгаатайгаар тайлбарладаг юм байна лээ. Тэр харин хамгийн ихээр судалдаг хүний хувьд энэ тухай хөнгөдөж, хийтэй дуугарахгүй байгаа нь эрдэмтэн хүний зангараг бололтой. Яг бөө гэж бас хэлчихээгүйг анзаарна биз ээ. Тэнгэртэй харьцдаг бүхэн бөө бас биш шүү. Бөө биш гэснээс биш, бөөг сайн муу гээгүй шүү. Бас гуйвуулах вий. 13-р зууны үед Цагаадай Хааныг тэнгэртэй холбогдон шүлэглэн буулгадаг байсан тухай Америкийн зохиолч Жак Уэтерфорд өөрийн зохиол Монголын Их Хатадын нууц товчоондоо бичсэн л байна. 40 гаруй жилийн хугацаанд далд ухамсрын дадал хийж, далд ертөнцтэй холбогдож, энерги, сүнс, далд ертөнцийн талаар алдартай олон ном бичсэн Монгол хэл дээр олон ном нь орчуулагдсан М. Друнвало болон өнөө бидний үед ч хэдэн цагаар шууд тэнгэрийн өгөгдлөөр ямар ч хэрэгсэлгүйгээр Channeling хийдэг тохиолдлыг бичсэн л байдаг. Та өөрийн блогтоо “Крайон 1995 онд НҮБ-ын байранд анх ченнелинг хийсэн, 1996 онд НҮБ-ын байранд хоёр дахь удаагаа ченнелинг хийхдээ тэрээр “ Өнөөдөр танай гаригийн оршиж буй энэ давтамжийн түвшинд та нар дайн хийх ёсгүй. Эргэн тойрноо харагтун. Ертөнцийн мөхлийн тухай эртний зөгнөлүүд биелсэнгүй. Учир нь та нар хуучин үзэл бодлын хүрээнээс нэгэнт гарчээ. Хуучин дайны энерги өнөөдөр хэрэггүй болж, шинэ мянган та бүхэнд энх амгалан, тэвчээр, хайрыг амлаж байна. Гэхдээ үүнийг зөвхөн та нар өөрсдөө л хийж чадна гэж хэлсэн юм.” гэж бичиж байсан шүү дээ. Түүнээс ч илүү чадвартай МОНГОЛ ХҮН байж болохгүй гэж үү. Та бөө судлаачийн хувьд ядаж Монгол хүнд л байдаг агуу их чадамжуудын тухай гадарлах биз ээ.

Яг энэ эгзэгтэй цаг үед Мөнхтэнгэр бидэнд шинэ элчээ илгээсэн нь Мөнхтэнгэрийн оньс Мөнхсаруул багш гэдэгт би хувьдаа бат итгэдэг. Түүнийг сохроор дагадаг гэж хэлүүлээд байгаа хаад, хатад нь дээд оюун санаатайгаа холбогдон эмнэх домнохоос эхлээд хар цагааныг ялган засах арга ухааныг тайлж чадаад хэдэн цагаар биш гэхэд арав, хорин минутын тасралтгүй судрыг тэрлээд байгааг та хэрхэн тайлбарлах бол. Хэрэв худал байсан бол тэр олон хүн ингэж итгэн дагах уу. Бас тэгэж санааны зоргоор шид хүч, далд увдисуудыг үзүүлж чадах уу. Судлаач хүнд сонирхолтой л баймаар юм.

1. Та түүнийг урд нэг насандаа Их Эзэн Чингэс хааны эрдмийн багш, хойд нэг төрөлдөө Өндөр гэгээн байсан тухайгаа хэрхэн батлах тухайд нь эргэлзжээ. Харин тэр үйлээрээ, судраараа хангалттай нотолж явна. Түүнийг нь та судалж болохгүй гэж үү. Судлахгүй гэвэл та судлаагүй байж үгүйсгэх эрхгүй баймаар.

1. Тэр үйлээ хадагны өнгөөр нэрлэснийг 5 хадаг бөөгийн зан үйлд байхгүй, шарын шашинтай холбоотой гэхчлэн бичжээ. Өвгөдийн маань бүтээсэн оюуны сан түүхэн хөгжлийн явцад баяжиж ирснээс гадна бөөгийн шүтлэгтэй ч шарын шашинтай ч явсан балруулдахгүй түүхээс гадна тэр бүх оюуны охь шим дээд сандаа хуран чуулдаг нь гарцаагүй. Гэгээнтэн маань ч тэр бүхнийг үгүйсгэхгүй байхыг сургаж “бурханы сургаалаар ч хураах буян гэж байдаг юм” гэж айлдсан байдаг юм. 5 хадгаар үйлээ нэрлэхдээ 5 махбодь, 5 өнгөөр илэрхийлэгдэх хишиг буян бүхнийг билэгдэн илэрхийлснийг махчлан тайлбарлах гэж муйхарлах нь угаас утгагүй.

1. Сэрээх, амирлуулах гэж эсрэг шахуу үгийг хамт хэрэглэсэн гэх юм. Сэрээж сэргээсэн бол хүчийг нь тогтоон бэхжүүлж амирлуулах нь зүйн хэрэг биз дээ.

1. Өвөг дээдсийн хишиг буяныг Эрдэнэзуу хийдийн 108 суврагаар нэгбүрчлэн буулган тайлсан гэснийг би ойлгоод байгаагаа тантай хуваалцъя даа. Нэгэнт биетэй бус оюун санааны хүчийг онилсон цэг дээр оноон тусгаж байж тайлан барьдаг арга далд ертөнцтэй харьцах ухаанд угаас дэлгэр шүү дээ.

1. Хийдүүдийг тэнгэрээр ариусгасан нь бас юу нь болдоггүй билээ. Ариун дагшин газарт сайны хажуугаар саар дүүрэн байдаг гэдгийг захын хүн мэднэ. Ялангуяа хар, цагаан нь холилдсон өнөөгийн нөхцөлд сайхан эрчим энергээр сэргээгээд тэнд очсон хүн ариусахаасаа илүү саарыг биедээ наагаад байгааг нь харсаар суух уу.

За тэгээд цааш ил далд ертөнцийн ойлголтыг хольж, гагцхүү гутаан доромжлоход л чиглэгдсэн, магадгүй та өөрөө ч мэдсээр байж хэт бүдүүлэг дорд ухамсраар харлуулсан зүйлсэд энэ мэтчилэн тайлбар өгөөд байх нь ач холбогдолтой эсэхэд эргэлзэж эхэллээ.

Ер нь хүний мөн чанараас эхлээд уул хайрхан, ус гол мөрөн, сүм хийд, нар сар од гаригсыг таниад уншаад буй юмыг нь юу ч болсон та бүхэн аваад үзчихэж болохгүй юу.

Дээд оюун санааны энэ дамжуулалтыг хүлээн авч цаг тухайд нь хийж бүтээж буй үйлээ бид Тэнгэрийн үйл гэж нэрлэж буй бөгөөд Мөнхтэнгэр, Өвөг Дээдэсийн дамжуулсан айлтгал, айлдвар, зарлиг тушаалын дагуу Монгол орныхоо уул, усны нууцыг тайлж, тахин амиллуулах, газар усны хүчийг эрхшээн, Монгол хүний хөх толбоны галыг сэрээхэд чиглэсэн 280 гаруй үйлийг хийсэн ба үүнээс 40 гаруй нь олон нийтэд хандсан үйл байгаа.

Тэр бүхнийг та авч үзье гэвэл Гэгээнтэн маань атгаг санаа агуулахгүйгээр шууд л өгөх хүн. Түүнд өс санах, хувиа хичээх өчүүхэн ч зан байдаггүй нь энэ олон хүний сэтгэлийг хурааж, хайрыг татахад нөлөөлдөг байх.

Та нэгэнт олон нийтийн хэвлэлээр сүржигнэсэн тул би ч бас уншигч түмэн зөв мэдээлэл аваасай гэсэндээ нээлттэй бичиж байгаа бөгөөд гагцхүү өөрийн сайн дураар итгэл сэтгэлийн угаас бичиж байгаагаа онцолмоор байна.

Мөнх Тэнгэр түүнд ”Чи бол Их Эзэн Чингэс Хааны нууцын түлхүүр” хэмээн зарлигдаж, улмаар 181 тэнгэрийн тамгатай хүмүүсийг танин залах мөн 1000 амьд бурхдыг тодруулан нэгтгэх тухай онцгой мэдээллийг хүлээн авснаар энэ үйлийн цар хүрээ хичнээн агуу болохыг мэдэрч, эрч хүчээр дүүрч энгүй их үйлийн цагаан замыг мөрлөж эхэлсэн түүхтэй юм. Их эзэн хаан нэгэнтээ дэлхийн талыг эзлэхэд гол хүчин зүйл нь юу байсныг асуухад “Мөнхтэнгэр” гэж л айлдсан тухай бичсэн байдаг. Тэгвэл та Их хаанаа худлаа хэлсэн гэх үү, эсвэл түүнээс баталгаа шаардах уу. Их эзэн хаанд маань Мөнхтэнгэр тусалсан нь түүний үйл хэргийн түүхээр батлагдан харагддаг бол Их гэгээнтний маань үйл ч үүнийг дахин нэгэнтээ нотлоно гэдэгт би эргэлзэхгүй байна.

Тэрээр ,,Ертөнцийг эзэгнэх хүч нь Монгол түмний хөх тамганд оршиж байдаг, нөгөө талдаа Монгол түмнээ гурван мянган жилийн туршид сайхан амьдралаар амьдруулах өв ухааныг нь өгч, сүнс сүлдийг нь тэгшлэн өргөж, өндөр тэнгэртэй гэдгийг нь таниулан сэрээж, агуу их хайраар дэлгэрч амьдрах тэр цагийг авчирч таниулах элч” болох тухайгаа ярьсан нь яагаад танд таалагдахгүй байгааг л би гайхаж байна.

Тэр ч гэсэн хань ижил, үр хүүхэдтэй, хувийн гэсэн амьдралтай. Тэр бүхнээ хойш тавьж, олны хэлэнд энэ мэт чичлүүлэхийг үл хайхран сэтгэлээ урж, зүрхээ сэмлэн байж таны төлөө, бусдын төлөө зүтгэж явна. Тийм ээ хэн ч түүнээс гуйгаагүй. Харин тэнгэр түүнд даалгасан юм. Тэр хүний биш, харин тэнгэрийн тэр хатуу шалгуур, шүүлтийг давж гарахын тулд амь нас, алив бүхнээ дэнжигнүүлэн ядаж явна.

Тэнгэрийн үйлээ шат дараалалтайгаар зөв гүйцэлдүүлэн давж, амжилтад хүрэх бүрд нь их хайр, ивээлээ хүртээж, эрдэм чадал, шид хүчийг нэмж, түүнийг ахиулж дэвшүүлсээр ирсэн юм. Тэр одоо 3 жилийн өмнө тантай уулзсан хоёр үгэнд халирдаг, эгэл нэгэн бүсгүй биш. Түүнээс хойш чандлан нуусан тангараг дор “тэнгэр”, “газар”-ын үйлээ гүйцээж дуусаад “хүмүүний ертөнцийг засах” үйлээ тэнгэрийн зарлигаар /2014 оны 11 дүгээр сараас эхлэн/ эхэлж, ард түмэндээ ил тод гүйцэтгэн биелүүлж явна.

,, …Луу жилээс эхэлж лус газраа аргадаж, Могой жилээсээ эхэлж мод ургамлаа тэтгэж                     Морин жилдээ хүчээ авч Монгол түмэн сэрж, Өгөөмөр сайхан хонин жилдээ өр ширгүй хотлоороо баясаж, Тэгш сайхан бичин жилдээ дэлгэрч нэгэнтээ тогтоно үрс минь…” хэмээн 2012 онд эхэлсэн энэхүү үйлийг тодорхойлсон бол хожим нь гурав гурван жилээр нийт есөн жилийн хугацаанд түүний хүрэх үр дүнг урьдчилан харуулж, хийх үйлийг нь хатуу цаг хугацаатайгаар хэрхэн яаж гүйцэтгэхийг нь нарийвчлан зарлигдан дамжуулсан байдаг юм аа.

Өнөөгийн хүмүүн бид зөвхөн ил харагдаж буйг л мэдэж, мэдэрч, хүртэж, шүтэж яваа болохоос дээд оюун санаа, далд ухамсар дахь нууц оршихуйг үл ойшоон ирснийг энэхүү Бумбын буюу Оюун Ухамсрын Алтан Эринд засаж залруулах нь зайлшгүйг нийт хүн төрөлхтөн аль хэдийнээ хүлээн зөвшөөрчээ. Орчлон ертөнц, Мөнхтэнгэр асар хурдтайгаар нүүдэллэн өөрчлөгдөж, хүмүүн бидний оюун ухаан, бие сэтгэл, ухамсарт нөлөөлөн, шинэчлэгдэн буй онцгой цаг үед амьдарч буйгаа мэдэрч, амьдралд маань гайхамшигт хувьсал болж буйг харсаар Яг энэ мөч маань Мөнхтэнгэрийн, Өвөг ДээдЭсийн өндөр түвшний шилжилтэнд орж буй алтан үед та бид хамтдаа амьдарч байна.

Хуучин амьдралын хэв маяг үеэ өнгөрөөж шинэ эрин, шинэ цаг эхэлж байна. Энэхүү өөрчлөлт зөвхөн бидний гадаад орчинд биш дотоод ертөнцөд хүчтэй явагдаж байна. Эгзэгтэй энэ үед биднийг илүү дотогшоо харж, бид хэн бэ? Бид яагаад энд байна вэ? Хүн төрөлхтөн хаашаа чиглэж байна вэ гэх мэт адармаатай асуултуудад бид өөрсдөө хариулахад хүрч байна. Асуултуудын хариултуудыг өдрөөс өдөрт улам бүр олсоор, эцэст нь орчлон ертөнц хийгээд бүх зүйл нэгдмэл юм, бид бүх зүйлстэй хамааралтай юм, Мөнхтэнгэрийн аугаа хүчин дор нэгдэж, тэндээс илгээсэн Мөнхтэнгэрийн оньсын тайлал, тэнгэрийн зарлиг айлдвар дор Монголчууд бид дахин нэгдэж, бидний дотоод дахь асар их хүч, гэрлээ асаан улам бүр гэрэлтэж, Орчлон Ертөнцийн гэрэлтэй нэгдэхийн чухлыг танин мэдсээр бус уу …

Хэрхэхийг Тэнгэр мэдтүгэй.

Ж.Отгонбаатар. /далд ухамсар, мэдээлэл эмчилгээ, биоэнергийн засалч /