Монгол Улсын гавьяат жүжигчин хэмээх сэтэр нь ахадсан дуучин Монголд олон байна. Түүний нэг нь Т.Баясгалан аж.

“Бяруу болоогүй байж бухын баасаар баав” гэдэг л боллоо. Тэрбээр өөрийгөө зохиолын дууны “гүнж” гэж сэрүүн зүүдэлж явдаг бололтой юм аа. Толгой  нь хоосон хүнээс л ийм үг гардаг байх даа хөөрхий гэмээр хэд хэдэн “том дуугарсан” ярилцлага өгчээ. Түүний хамгийн сүүлд өгсөн ярилцлагын ганцхан хариултаас жишээ татъя. “Баясгаланг элдвээр муулж янз бүрээр бичих тусам тэрбээр улам л хүчирхэг, гоё болж, сайн сайхан амьдрах юм. Энэ үнэхээр гайхалтай шүү”  гэсэн асуултад “Би бурханд хайртай.  Бурхан ч надад хайртай гэж боддог. Миний амьдрал бурхны зурсан зургаар л яваа. Намайг муулах хүмүүс орчлон дээр байдаг бол тэгж л заяагдсан хүмүүс байх. Түүгээрээ хэдэн төгрөг олдог  бол  тавилангаараа л амьдарч яваа биз. Гэхдээ “Тэнэг хүн тэнгэртэй тэрсэлдэнэ” гэж нэг үг бий. Намайг муулаад, надаас нуугдаж чадсан ч тэнгэрээс нуугдаж чадахгүй. Намайг муулж олсон тэр мөнгө нь үйлийн үр болоод өөрт нь хэд дахин муугаар тусна гэдгийг ухаараасай, тэд” гэжээ. Энэ хариултыг уншаад ёстой өмнөөс нь ичиж үхэх шахлаа. Өөрийгөө тэнгэрийн хүн гэж боддог байж болно.

Гэхдээ хэн байгаад хэн болсноо бас мартаж боломгүй. “Төөрсөөр төрөлдөө” гэгчээр одоогоос хэдэн жилийн өмнө УИХ-ын гишүүн Д.Батбаяр, Т.Баясгалан хоёр нэгэн сэтгүүлд ярилцлага өгснийг нь уншиж байсан. Тухайн үед амраг хайрт Д.Батбаярыгаа энхийн цагаан тагтаа шиг л ярьж суусан. Гэвч бодит амьдрал нь энэ үгтэй нийцэхгүй. Аргагүй л бэлтэй хүн шиг загнаж, Т.Баясгаланд гавьяат цол худалдаж авч өгснийг нь хэн хүнгүй мэднэ. “Зүүдээ ярих гээд хулгайгаа ярив” гэгчээр Т.Баясгалан энгэрээ мялааж гарч ирэхдээ “Ханьдаа баярлалаа” гэж ам алдсан удаатай. Аргагүй дээ, цаг нь болоогүй байхдаа авсан учраас бантаад ингэж хэлээ биз. “Сайн хүн урьд ямар явснаа цаг ямагт санадаг” гэдэг үг бий. Харин Т.Баясгалан хэн байснаа мартчихдаг бололтой. Хүний хоёр алаг үрийн эцгээ санан шаналж байгаа эмзэгхэн сэтгэл дээр Т.Баясгалан жаргаж явна гэх ухааны юм ярьж суугаа нь хэн хүнд таалагдахгүй биз ээ. Бас эзэн чингис хаан, бурхныг их шүтдэг талаараа сонин хэвлэлд өгсөн ярилцлагадаа дурьдах дуртай. Шүтлэгтэй хүнээс ийм хунгүй сүншиггүй үг гардаггүй юм аа. Арав гаруй компанийн хувьцаа эзэмшдэг нөхөр нь дуучин гэргийдээ олон зуун саяын үнэтэй зочид буудал, эмэгтэйчүүдийн эмнэлэг бэлэглэж байсан болохоор олны анхаарлыг татах нь зүйн хэрэг. Гэхдээ сайтар тунгааж үзвэл эд хөрөнгөнөөс илүү өр нимгэн, зөв бодолтой байх нь чухал гэдгийг мартах ёсгүй баймаарсан. Мэдээж, залуу насанд алдаа оноо бишгүй л байдаг. “Жаргах цагт сэрэмж хэрэгтэй” гэдэг шүү дээ.  Өөрөө ч гэсэн хойдох урдахын зовлон дунд өссөн болохоор “доороо суурьтай, дотроо бодолтой” ярих хэрэгтэй болов уу.