Сүүлийн үед цахим сүлжээ болон зарим мэдээллийн веб сайтаар Фруто НяНя”  жүүс  муудсан  байсан,  хүүхдийн  кашнаас хорхой гарсан, чанарын шаардлага хангахгүй байгаа гэх мэдээлэл цацагдсан.   “Фруто НяНя”   нь манай эцэг эхчүүдийн хүүхэд багачууддаа авч хэрэглэдэг хамгийн түгээмэл бүтээгдэхүүн билээ. Тиймээс энэ бүтээгдэхүүний аюулгүй байдал, чанарын асуудалд эцэх эхчүүд нэлээд анхаарал хандуулаад байгаа. Тиймээс Нийслэлийн мэргэжлийн хяналтын хэвлэл мэдээллийн албаны ажилтан н.Даариймаагаас  уг мэдээллийн талаар тодруулахад ““Бимекс Холдинг”-той холбоотой болоод бүтээгдэхүүнийх нь  талаар ямар нэг зөрчил, гомдол санал мэргэжлийн хяналтын байгууллагад ирээгүй байгаа. Өнгөрсөн хоёрдугаар сард “Бимекс Холдинг”-ийн өөрсдийн санаачлагаар арав гаруй бүтээгдэхүүнд нь хяналт шалгалт хийсэн. Ингэхэд ямар ч зөрчил илрээгүй. Хэрэглэж болох бүрэн боломжтой гэдэг нь тогтоогдсон. Одоог бүтээгдэхүүний зөрчил илэрлээ гэх гомдол санал ирээгүй” гэв.

Мөн НМХГ-ын Экспорт, Импортын хэлтсийн дарга Б.Батшагайгаас хүнсний аюулгүй байдалтай холбоотой зарим зүйлийг тодрууллаа.

-Гаднаас орж ирж байгаа бараа бүтээгдэхүүнд ямар хяналт шалгалт хийдэг вэ?

-2014 оны долдугаар сарын 30-ын өдрийн Шадар сайдын 60 дахь тогтоолоор Экспорт, импортын бараа бүтээгдэхүүний эрсдэлийн бүлгийн жагсаалтыг гаргасан байдаг. Ингэхдээ их эрсдэлтэй, дунд эрсдэлтэй, бага эрсдэлтэй гэж бараа бүтээгдэхүүнээ ангилаад хяналт шалгалтаа хийдэг.

-Хилээр оруулж ирдэг хүнсний бүтээгдэхүүнүүд дунд эрсдэлтэй бүлэгт хамаарах байх. Тэгэхээр дунд эрсдэлтэй бүлгийн бараа бүтээгдэхүүнийг хэрхэн, яаж шалгаж оруулж ирдэг вэ?

-Дунд эрсдэлтэй бүтээгдэхүүний бараа бүтээгдэхүүний хаяг шошгон дээр түлхүү анхаардаг. Хаяг шошго нь стандарын шаардлага хангасан, зөрчилгүй байгаа эсэхийг шалгадаг.  Шошгон дээр хугацаа, хадгалалт, стандарын дагуу үйлдвэрлэгдсэн, орц найрлага гээд бүх зүйл байдаг. Тэгэхээр энэ бүхний манай зүгээс шалгасны эцэст Гаалиар оруулдаг гэж ойлгож болно.

Эх сурвалж: Shuurhai.mn