Бусад улс төрчдөөс эгэл жирийн амьдралтай УИХ-ын гишүүн З.Баянсэлэнгийн талаар сүүлийн үед  таагүй мэдээлэл гарах болжээ. Тэрээр “Арз Суварга” ХХК-ны нэр дээр 9 тэрбумын тендер авсан бөгөөд одоо 26 тэрбумын тендер авахаар Худалдан авах ажиллагааны газраар эргэлдэх болсон гэх мэдээлэл цацагдаад байсан. Тэгвэл энэ талаар З.Баянсэлэнгэ гишүүн албан ёсны тайлбар өгчээ. “Өнгөрсөн долоо хоногт УИХ дахь эмэгтэй гишүүдийн төлөөлөл Хонгконг улсад эмэгтэйчүүдийн эрхийг хамгаалах уулзалтад оролцоод ирсэн. Энэ хооронд намайг “Арз суварга” компанийн нэр дээр есөн тэрбумын тендер авсан гэсэн мэдээлэл хэвлэл мэдээллийн хэрэгслээр гарсан. Улс төрийн зорилготойгоор миний нэр хүндэд халдаж байгаад маш их харамсч байна. Есөн тэрбумын асуудал гэдэг онц хүнд гэмт хэргийн шинжтэй мэдээлэл. “Арз суварга” гээд байгаа тэр компани надтай ямар ч холбоогүй. Би тэр компанийг мэдэх ч үгүй. “Арз суварга” компани Монгол Улсын хэмжээнд үйл ажиллагаа явуулж байгаа учраас өөрийн нэр төрийг сэргээж тайлбар хийнэ гэж бодож байна. Намайг есөн тэрбумын тендер аваад Зайсанд орд харшид амьдарч байгаа гэсэн байна билээ. Хамгийн сүүлд TV5 телевиз “Ажлын дараа” нэвтрүүлэг хийж манайд очсон. Би Чингэлтэй дүүргийн арвандолдугаар хорооны сурагчийн 777 тоотод одоо хүртэл амьдарч байна. Би сард татвар, нийгмийн даатгалын шимтгэлээ хасаад гар дээрээ 1318000 төгрөгийн цалин авдаг. Жирийн ардын хүүхэд УИХ-д орж болдог гэдэг жишээг би харуулсан. Энэ зам мөрийг балалчихгүй байх юмсан гэж хичээж ажиллаж байна. Бусдаас дор орохгүй юмсан гэж нууцлаж явсан мэдээллээ дэлгэхээс өөр аргагүй байдалд хүрч байна. Би цалингийн зээлтэй, “Худалдаа хөгжлийн банк”-наас авсан. УИХ-ын гишүүд дотор над шиг цалингийн зээлтэй хүн байхгүй байх. Онц хүнд гэмт хэрэгт  гүтгүүлсэн учраас би холбогдох хууль, хяналтын байгууллагад хандана. Хэрвээ хууль хяналтын байгууллагаар шалгаад намайг их хэмжээний тендер авсан нь тогтоогдвол би УИХ-ын гишүүнээсээ татгалзахад, хариуцлага хүлээхэд бэлэн байна” хэмээв.

Эх сурвалж: Шуурхай.мн