“Ичиножёод л унаж болохгүй гэж нэгэндээ хэлдэг болсон гэнэ”

Японы мэргэжлийн сумогийн дээд зиндаанд онцгой үзэгдэл болон гарч ирсэн Ичиножёо Ичинноровт тус улсын бөхчүүд дургүй байдаг тухай нэгэ ояката ярьсан байна. Тэрээр “Ичиножёо сэтгүүлч нартай их хүндэтгэлтэй сайхан харилцаж, асуусан болгонд нь хариулдаг болохоор мэдээж түүний тухай ямар ч нийтлэл гарсан магтсан, сайшаасан өнгө аястай болдог. Гэтэл бусад Монгол сумочид сэтгүүлчдийг тоохгүй зөрөөд л явдаг. Тэр ч бүү хэл байнга магтуулдаг Эндо хүртэл ялагдахаараа юу ч ярихгүй доошоо хараад суучихдаг. Тэгэхээр Ичиножёод дуртай байлгүй яахав” гэсэн юм.

Харин энэ бүхэн нь Япон сумочдод огт таалагддаггүй гэнэ. Тус улсын сумочид сүүлийн үед хоорондоо ярихдаа “Тавиас дээш хувийн амжилтаа үзүүлж чадахгүй байсан ч Ичиножёод л ялагдаж болохгүй шүү” гэдэг болжээ. “Мэдээж алдартай бөхийг ялахаар сонин хэвлэлд гарна, дээр нь барилдааны шагналын мөнгө ч ирэх болохоор ялахыг хүсэх нь гарцаагүй” гэж дээр дурдсан ояката ярьжээ.

Ичиножёог багш нь өөр дэвжээнд очиж бэлтгэл хийхийг нь хориглосон юм. Үүнийгээ тайлбарлахдаа залуу, туршлагагүй бөх хамаагүй хүнтэй барилдаж байгаад бэртэл авч магадгүй гэсэн юм. Гэхдээ үүнийг нь өөр шалтгаантай гэж Японы бөхчүүд хардаж байгаа гэнэ.

Монголын их аваргуудын залгамж халаа болон гарч ирсэн Ичиножёо Ичинноров өдгөө жинхэнэ утгаараа “од” болоод байгаа. Түүнийг дээд зиндаанд гарч ирснээс хойш тэмцээний тасалбар маш их зарагдаж байгаа. Энэ тухай сумогийн холбооны ажилчид ярихдаа “Хуучны ах дүү Таканохана, Ваканохана нарын үетэй адилхан байна” гэсэн юм.

Сонирхогчийн сумогийн ёкозүна цол хүртэж, мэргэжлийн сумод орж ирсэн Ичиножёо дээд зиндаанд хоёрхон башё барилдсан. Өнгөрсөн сард сэкиваке цолоо хамгаалсан манай бөх ирэх тэмцээнээс озэки цолны төлөөх дайралтаа хийнэ хэмээн хөгжөөн дэмжигчид нь итгэж сууна.

Э.Гүнтөмөр

Эх сурвалж: www.sumodb.sumogames.de, “Таван цагариг” сонин