Хэдийгээр энэ хорвоод эрэгтэй хүн болж төрсөн ч, өдгөө бие сэтгэхүйн 90 хувь нь эмэгтэй хүний шинжтэй болсон Б.Солонго энэ байдалдаа сэтгэл хангалуун явдаг төдийгүй ойрын мөрөөдлөө биелүүлсэн гэж үздэг гэнэ. Харин Монголын нийгэм цөөнхүүдийг дэмждэггүй ад үздэгээс гадна доромжилдог талаар сэтгэл дундуур явдаг гэдгээ нуулгүй ярьжээ. Ялангуяа хошин урлагийнхан тэднийг доромжилдог тухай хэлэхдээ “Би өөрийгөө хамгийн ойрын мөрөөдөлдөө хүрчихсэн гэж бодож байна. Миссийн тэмцээнд орохоосоо өмнө монголын мисс больё гэж боддог байсан. Миний хэтийн зорилго монголд ЛГБТ олон нийтийнхээ дунд тодорхой хэмжээний хөтөлбөр хэрэгжүүлээд ялангуяа транс охидуудын нийгэмд тулгараад байгаа асуудлыг шийдэж өгөх. Юу юунаас илүү монгол хүмүүс нэг нэгнийгээ гэсэн сэтгэлтэй байгаасай гэж хүсдэг. Ядаж л урлагаар дамжуулаад ЛГБТ олон нийтийг зөвөөр ойлгуулах сан. Урлаг гэснээс энэ хошин урлагийн Бооёо мэтийн хүмүүсийг би их гайхдаг. Парик зүүгээд аягүй муухай стил бүрдүүлж гарч ирээд бид нарыг доромжлоод байдаг байхгүй юу. Хүмүүсийг инээлгэж байгаа мэт боловч асар их доромжилдог. Жүжиг үзээд сууж байхад надад их эвгүй санагддаг. Урлаг гэдэг маш хүчтэй зүйл. Урлагаар дамжуулж нийгмийн уур амьсгалыг өөрчлөх ёстой юм болов уу. Гэтэл урлагийн чадваргүй хүмүүс гарч ирж байна. Часхийсэн урлагийн рекламны студи байгуулъя гэж боддог. Хажуугаар нь үр хүүхдээ гоё хүмүүжүүлээд явна. Ер нь яагаад трансжендер их хурлын гишүүн ч юмуу улс төрч, төрийн албаны чухал хүн байж болохгүй гэж. Ирээдүйд нийгмийн үзэл санаанд өөрчлөлт гараасай, бид ч гэсэн энгийн хүмүүс шиг, натурал эмэгтэйчүүд шиг карьер хөөх өдөр ирэх байх” хэмээжээ.