“Цалин өндөртэй ажил санал болгож байна, очиж ажиллаач” гэсэн найзынхаа ятгалгаар урд хөршийг зорьж, улмаар хүний наймааны золиос болж зовж байсан охин Г-г өнгөрсөн аравдугаар сард манай Консулын газраас эх оронд нь авчирчээ. Түүний хувьд Эрээнд хүний гарт орсноос хойш биеэ үнэлж, Замын-Үүд-Эрээн хоёрын хооронд хэд хэдэн удаа хар тамхи зөөвөрлөж байжээ. Г нь бүтэн өнчин нэгэн бөгөөд асрамжийн газар өссөн аж.

Тэрбээр нас биед хүрч, ажил хийж байгаад нэгэн охинтой танилцсан бөгөөд тэр нь “Хятадад томоохон цайны газар зөөгч хийдэг. Тиймээс хамт очиж ажиллая. Сайхан орчинд мөнгө илүү ихийг хураана” гэж худлаа хэлэн дагуулж аваачаад хятадуудад худалдаж хаячихаад бичиг баримтыг нь мөнгөний хамт аваад ор сураггүй алга болжээ.

Түүнтэй хамт мөн худал үгэнд итгэж очсон гурван монгол охины хамт хятадуудад зарсан байжээ. Ийнхүү хүчээр биеийг нь үнэлүүлж, ашиг олдог байсан газраасаа амь зугтаж Бээжин дэх Элчин сайдын яамыг бараадсан охинд тус газар болон манай Консулын газраас тусламжийн гараа сунгаж, эх оронд нь авчирсан байна. Тэрбээр Баянзүрх дүүргийн харьяат бөгөөд дүүргийн Засаг даргын Тамгын газар, Цагдаагийн хэлтсээс туслах боломжтой бөгөөд эхний ээлжинд амьдрах байр олж өгч, ажилтай болоход нь дэмжлэг үзүүлэхээр болжээ.

Uls.mn