Монголын хамгийн алдартай хүргэн хүү хэн бэ гэвэл Г.Дэнзэн гэх хүн захаас авахуулаад олон.

Тэрбээр олны танил болоод удаагүй ч ёстой л цахиур хагалж гарч ирсэн азтай бас зальтай залуу. Гэнэт л Г.Дэнзэн гэх хэний ч танихгүй залуу Засгийн газрын хэрэг эрхлэх газрын дэд дарга боллоо гэх мэдээ олны анхаарлын төвд орж ирсэн. Ингэснээр түүнийг хэн бэ, хаанаас гараад ирэв гэсэн олон эрэл сурал болсоор Ерөнхий сайдын хүргэн” гэх алдрыг хүртээсэн. Ингэж тодорсон хүргэн хүү удалгүй албан ту­шаалаа өөрийн хүсэлтээр өгч байсан нь саяхан. Сайн дураар ч гэж дээ түүнийг тойрсон том тоотой мөнгөний асуудал сөхөгд­сөнөөс тэр.

Эргэн санавал товч­хондоо “Эрдэнэс Таван­толгой” ХK-иас “Говь повер” хэмээх компани 17 тэр­­бумын тендэр авч нүүрс гар­гахаар болсон. Уг компани нь ерөнхий сайд Н.Алтанхуягийн төр­сөн эгчийн охиных. Тэр охин нь Засгийн газрын хэрэг эрхлэх газрын дэд дарга Г.Дэнзэнгийн эхнэр” гэх асуудал хэвлэлийн хуудаснаа хөвөрснөөс тэр.

Авсан, аваагүй гэж удаан мэтгэлцсэн энэ асуудал хэсэгтээ л дарагдсан. Гэтэл өчигдөр үүнийг МАН-ынхан сөхлөө. Учир нь УИХ-ын Эдийн зас­гийн байнгын хорооны хурал­даанаар уг асуудлыг хэ­лэл­цэх байсан ч АН-ын нөхөд “Бэлэн биш байна” гэснээр хойш­луул­сан. Уг нь тус байнгын хороо­ноос өнгөрсөн тавдугаар сард “Эрдэнэс-Таван толгой” ХК-д Үндэсний аудитын шалгалт оруулах шийд гар­гаж, УИХ-ын гишүүн Д.Хаянхярваагаар ахлуулж байжээ.

Харин өдгөө тус шал­галтын дүн гарсан бөгөөд Г.Дэнзэн гэгчийн шам­шиг­дуулсан мөнгийг он сар өдрөөр нь задаргаатай нь гаргачихаж. Ийм бай­хад байнгын хорооны хурал­даанаар энэ асуудлыг хэ­лэлцээгүй тул УИХ-ын ги­шүүн Д.Хаянхярваа, А.Тлейхан нар хэв­лэлийн­хэнд хандсан юм. Энэ талаар Д.Хаянхярваа ги­шүүн “Ер нь төрийн өмчит компаниудад томоо­хон хяналтын систем үгүйлэгдэж байгааг энэ шалгалт харууллаа. Энэ компанийн 123 хүн одоо­гоор хотын төвд ажиллаж байна. Хэтэрхий нүсэр орон тоо бүтэц байгаа биз. ТУЗ-ын дарга нь зургаан сая, гишүүд нь 1.8 сая төг­рөгийн цалинтай.

Мөн 2013 он хүртэл шууд гэрээгээр нэг их наяд төгрөгийн худалдан авалт хийсэн бөгөөд хууль дүрмийн дагуу тендер зарлах ёстой байсан. Ерөнхий сайдын хүргэн Г.Дэнзэнгийн эх­нэрийн “Говь Повер” ХХК шүүхийн шийдвэр гаргуулж Цагаан хад хэмээх газарт байх талбайгаа 4.8 тэрбум төгрөгөөр зарсан мөн энэхүү мөнгөө авахдаа дансыг нь хаалгаж байгаад хэд хэдэн удаагийн гүйлгээгээр барагдуулсан нь авилга албан тушаалын хэрэг байх магадлалтай тул зохих га­зарт нь шалгуулах нь зүйтэй” гэв.

Түүнчлэн тэд “Ерөнхий сайд Н.Алтанхуягийн хүр­гэн 26 настай Г.Дэнзэн­гийн 4800 дахин ашигтай бизнесийн “timeline” гэх 2012 оны нэгдүгээр сарын 7-ноос өдийг хүртэлх Г.Дэнзэнтэй холбоотой баримтууд бо­лон мөнгөний асуудлын задаргааг хийсэн хүснэгт харуулав.

Уг хүс­нэгтэд ха­руулс­наар Г.Дэнзэн дөр­вөн удаа­гийн үйлдлээр 4.7 тэрбум төгрөг гаргуулж авсан тухай баримт байх аж. Ингэснээр улстөрийн сэдвээс хэсэг мартагдсан Г.Дэнзэнгийн нэр дахин тодров. Тэр ч бүү хэл мань эр ТУЗ-ийн даргын цалин гэж 2012 онд 16 мянган ам.долларын цалин авах тухай шийдвэр гаргуулсан тухай ч уг хүснэгтэд дурьджээ.

Нөгөөтэйгүүр зөвхөн гадаад захирлууд Монголд ийм хэмжээний цалин авдаг гэсэн ойлголттой мон­голчуудад сайхан мэ­дээ ч гэж ойлгож болох юм. Гэхдээ л яаж ч харсан өөрөө өөртөө шийд гаргаж, хөлжих гэсэн энэ нөхрийн увайгүй үйлдэл үүгээр зогсоосой билээ.

Энэ мэт том тоотой мөнгө бүхий сонирхолтой хуудсыг дэлгэж, Г.Дэнзэнгийн дуу­лианыг дахин дэг­дээв. Эдийн засгийн байн­гын хо­рооны ээлжит хурал­даа­наар энэ асуудал улам биелэлээ олж, АТГ зэрэг холбогдох байгууллагуудад шалгагдах эсэхтээ ч тулж магадгүй.

Гэхдээ өнөөдөр Ерөнхий сайдыг огцруулах асуудлаар авсан АН-ын ажлын тав хоногийн завсарлагын ху­гацаа дуусч байгаа болохоор хүргэн хүүгийн хэрэг хүр­гэн ахын хэрэгт дарагдаж магадгүй л юм.
Хэдийгээр сайн зүйл биш ч гэсэн монголын улс­төрд Засгийн газрын бү­тэц, бүрэлдэхүүнийг ший­дэх, Ерөнхий сайдыг сандлаас нь түлхэж унагах уу, суул­гаад үлдээх үү гэдэг хоёр­хон сэдэв дээр “Залуу Г.Дэнзэнгийн дуулиант хэ­рэг цуврал хоёр” гэсэн цоо шинэ бүлэг нэ­мэгдэж бай­на. Үүнийг тухлан сууж, таалан болгоох л үлдэх шив дээ. Эдгээр хэргийн дэргэд ирэх оны төсөв зэрэг бараг мартагдах биз хөөрхий.

М.Санчир

Эх сурвалж: