Ерөнхий сайдын ахлах зөвлөх Л.Гансүх батлан даалтад гараад найм хонож байгаа. Өнгөрсөн зун АТГ-аас Л.Гансүхийг 3.6 тэрбум төгрөг завшсан нь тогтоогдсон тухай тус газрынхан мэдээлж байсан. Тэгвэл өчигдөр АТГ болон Нийслэлийн прокурорын газар хамтран Л.Гансүхийн асуудлаар мэдээлэл хийсэн юм. Тус газар Л.Гансүхийг шалгаж эхэлснээс хойш хууль зөрчсөн үйл ажиллагаа явуулж, Хүний эрх, эрх чөлөөнд халдаж буй мэтээр ташаа мэдээлэл цацах болсон тухай тэд мэдээллийнхээ эхэнд онцолсон.

Тиймээс Л.Гансүхийн холбогдоод байгаа хэргийн бодит байдлыг олон нийтэд мэдээлэх нь зүйтэй гэж АТГ-ынхан үзжээ. АТГ-ын Мөрдөн шалгах хэлтсийн дарга Ө.Энхтөр “Л.Гансүх, М.Тулга нарын арван ир­гэнийг шалгаж байгаа. Тэд “Нүүрс” хөтөлбөрийн хүрээнд улсын төсвөөс мөнгө идээд зогсохгүй зарим компаниудаас ихээ­хэн хэмжээний мөнгө ба­римт хийхгүйгээр авч ашиг­ласан нь тогтоогдож бай­гаа. Улмаар хэвлэл мэ­дээл­лээр гараад байгаа шиг тэдэнтэй өмгөөлөгчийг нь уулзуулахгүй, мөн эрүү­дэн шүүсэн зүйл байхгүй” гэдгийг онцоллоо. Мөн Л.Гансүх нь өөрийн хүрээл­лийн хэд хэдэн хүнтэй нийлж, шинээр аж ахуйн нэгж байгуулан Бага­нуур ХХК-тай нүүрс ний­лүү­лэх, тээвэрлэх гэрээ бай­гуулж ажилласан байна.

Тухайлбал Л.Гансүхийн эхнэрийнх нь төрсөн дүү­гийн охин нь Багануур ХК-тай гэрээ байгуулан ажил­лаж байсан хоёр ч ком­панийн ерөнхий нягтлан бодогчоор нь ажиллаж бай­­сан.

Түүнчлэн худал тай­лан гаргаж, Засгийн газрын нөөц хөрөнгөнөөс 854 сая төгрөг гаргуулж бай­сан байна. Мөн Мөрдөн бай­цаал­тын ажиллагаанд саад уч­руу­лахаар завдсан, нөлөөлөх гэж оролдсон, төрийн өндөр албан ту­шаалт­ны нэр барьсан гэх үндэслэлээр Л.Гансүхийн өмгөөлөгч Ц.Баасандоржийг шалгуулахаар цагдаагийн байгууллагад холбогдох ба­римтыг нь хүргүүлжээ.

Энэ үеэр АТГ-ын мөрдөн байцаах хэлтсийн дарга Э.Амарбатаас зарим зүй­лийг тодрууллаа.

-Л.Гансүх нарын хэ­рэгт яг хэдэн хүнийг шал­гаж байгаа вэ. Цагдан хо­ригдсон хүмүүсээс гадна га­дуур байцаалт өгч байгаа хүмүүс байгаа юу?

-Энэхүү хэрэгт дөрөв­дүгээр сарын 24-нөөс эхлэн эрүүгийн хэрэг үүсгэн шал­гаж байна. Одоогийн байдлаар арван хүнийг сэ­жигтэн яллагдагчаар татан шалгаж байна. Үүнээс зур­гаан хүнийг цагдан хо­рих таслан сэргийлэх арга хэмжээ авсан. Эдгээр зур­гаан хүнээс гурван хүн нь цагдан хорих таслан сэр­гийлэх арга хэмжээг өөрч­лөн шийдвэрлэж гаргаад гур­ван хүнийг цаашид цаг­дан хорьж байгаа.

-“Нүүрс” хөтөлбөрөөс 3.6 тэрбум төгрөг завшсан гэж байгаа ч энэ мөнгөн дээр их хэмжээний мөнгө завшсан нь нотлогдож байгаа гэлээ. Үүнийг тайл­барлахгүй юу?

-2012, 2013 оны гэрээний дагуу нийтдээ 249 мянган тонн нүүрсийг 6.8 тэрбум төгрөгөөр Багануур ХХК-иас худалдаж авсан. Эргүү­лээд 2012-2014 онуудад бор­луулахдаа 19.9 тэрбум төгрөгөөр борлуулсан байдаг. Борлуулсан үнийг та бүхэн мэдэж байгаа. Иргэдэд нэг тонныг нь 80000 төгрөгөөр борлуулж байсан. Уг асууд­лаар Үндэсний аудитын газар шалгалт хийж дүгнэлт гаргасан.

Дээрээс нь АТГ-т шалгагдаж эхэлсэнтэй хол­боотойгоор шинжээч нарыг томилон ажиллуулж, дав­хар дүгнэлт гаргуулж асууд­лыг нягталж үзлээ.

-М.Тулгын биеийн бай­дал муу байгаа гэсэн?

-М.Тулгын хувьд нарийн мэргэжлийн оношлогоонд орж “Улаанбаатар Сонгдо” эмнэлэгт 18 хоног хэвтэн эмчлүүлсэн байгаа. Улмаар эмч нарын зүгээс М.Тулгыг цаашид цагдан хоригдоход болно. Хэвтэн эмчлүүлэх шаардлагагүй гэсэн учраас цагдан хорих хугацааг сунгасан. Түүний хувьд 2010 оноос нурууны бэртэлтэй байсан юм билээ.

-“Багануур” ХХК-ийн хувьд их хэмжээний хо­хирол амсссан гэсэн. Энэ талаар?

-“Багануур” ХХК-ийн хувьд 2.8 тэрбум төгрөгний хохирол хүлээсэн. Мөн эд­гээр компаниудаас Л.Ган­­сүх нарын хүмүүс их хэмжээний мөнгө авч хувь­даа ашигласан байж бол­зошгүй байгаа. Одоо­гоор хэн хэдэн төгрөг авсныг тодорхойлон хэлэх боломжгүй байна.

-Хоригдож буй хү­мүүст эргэлт уулзалтыг оруу­лахгүй байгаа гэх хэл ам их байгаа?

-Эргэлт уулзалтыг оруулж байгаа. Ар гэ­рийн­хэн, өмгөөлөгчдөөс гадна дэм­­­жигч иргэд, зарим ги­шүүд төлөөлөгчдийг ч оруулж уулзуулсан.

Л.Ган­сүхийг цагдан хо­ригдож байх хугацаанд 20 удаа эр­гэлт орсон бол М.Тулгад 10, Мөнгөнтуяад 21, Э.Төмөр­баатарт 9, харин Батхуягт 10 удаа эргэлт орсон.

Эх сурвалж: