УИХ дахь МАН-ын бүлгийн гишүүд намынхаа Удирдах зөвлөл, нийслэлийн намын хорооны удирдлагуудын хамт Баянзүрх дүүрэгт байрлах их, дээд сургуулийн оюутнуудтай уулзаж,  зарим худалдааны төвөөр орж ард иргэдийн санал бодлыг сонслоо. Тэд гурван багт хуваагдан ажилласан юм. Эхний баг болох УИХ дахь МАН-ын бүлгийн дарга С.Бямбацогт,  УИХ-ын гишүүн Ө.Энхтүвшин, Нийслэлийн МАН-ын хорооны дарга Ц.Сандуй тэргүүтэй хүмүүс дүүргийн МАН-ын хороонд ирж, гишүүд дэмжигчдийнхээ санал сэтгэгдлийг сонссон юм. Мөн Их Засаг их сургуулийн оюутнуудтай чөлөөт уулзалт зохион байгуулж, “Асайт” болон “Цайз” худалдааны төвд худалдаа эрхлэгчид, “Цайз-16” орчмын таксины жолооч нартай уулзаж ярилцлаа.

Оюутнууд гаж тогтолцоог “ховлов”

УИХ-ын гишүүн Д.Сумъяабазар, Сү.Батболд, Д.Сарангэрэл, Б.Чойжилсүрэн нар өчигдөр Улаанбаатар их сургуулийн оюутнуудтай уулзаж, тэдний санал бодлыг сонссон. Оюутнуудын зүгээс ээж аавын нь цалин нэмэгддэггүй хэрнээ сургалтын төлбөр өсөөд байдаг, сургалтын төлбөр өсөөд байгаа хэрнээ сургалтын чанарт ахиц гардаггүй гаж тогтолцоо улам улам усан хаван гүйсээр байгааг эрхэм гишүүдэд “ховлов”. Мөн үнийн өсөлтөд дарлуулж байгаагаа ч нуусангүй.

“Нарантуул”-ынхан “НАЙМАА МУУ БАЙНА” гэв

МАН-ын бүлгийн гишүүд Сү.Батболд, Д.Сумъябазар, Б.Чойжилсүрэн нар Баянзүрх дүүрэгт ажиллахдаа “Нарантуул” олон улсын худалдааны төвөөр саатав. Наймаачид зарим нь хачирхан хүлээн авсан бол нөгөө хэсэг нь өөрсөддөө тулгамдаж байгаа асуудлуудыг УИХ-ын түшээддээ дуулгаж, шийдвэрлэх арга замын тлаар лавлав. “Нарантуул”-ынхны хамгийн их хөндсөн асуудал нь “наймаа муу байгаа”-г хэлж байв. Өнгөрсөн оны мөн үетэй харьцуулахад ард иргэдийн худалдан авах чадвар маш их буурсаныг хэлж байв. Тэгсэн хэрнээ талбайн түрээсийн төлбөр өндөр байгааг хэлж байлаа. Түүнээс гадна одоо хүйтний улирал эхлэх гэж байгаатай холбоотой ажиллах орчин хүнд байгааг хэлсэн. Тэд “Бид энэ асуудлыг үе үеийн улстөрч, эрх мэдэлтнүүдэд хэлдэг ч шийдвэрлэлгүй өдийг хүрсэн. Та бүхэн тэдний нэгэн адил энд сайхан зүйл яриад, саарл ордондоо ормогц мартчихав. Д.Сумъябазар гишүүнийг аливаа асуудалд ул суурь, углуурганаас нь хандаад байна уу гэж харсан. Илүү дутуу маяг үзүүлэх гол биш, иргэдийн үгийг сонссоных ганц ч гэсэн асуудалд сэтгэл гаргаад анхаарал хандуулчихвал баярлах байна” гэсэн хатуухан үгийг ч хэлээд амжина билээ.