Өнөөдөр Монголын төр олон нийтийнхээ санааг төлөөлөх чадвараа алджээ. Шагнал хэмээгч нь тухайн хүндээ урам зориг хайрлах биш харин эсрэгээрээ “гай” дагуулдаг зүйл болж хувирав. Эрх мэдэлтнүүд сонгуульд нь тусалсан эсвэл, сайн даган дуурайж савсаганасан тэр хүнийг л урамшуулж, дэндүү бага, хумигдмал хүрээнд өнгөцхөн хараад л өөрийн үзэмжээрээ шийдчихдэг болжээ. Нэг үгээр хэлбэл, төр засаг өргөн олноо бүхлээр нь харж хайрладаг “аав” чанараа нэгэнт алдсан нь зөвхөн төрийн одон шагнал гээчийн хүрээнд ярихад л бэлхнээ харагдана.
Үүний тод жишээ нь энэ цагт төрдөө үнэлэгдээд буй “живхтэй” соёрхолт дуучин Д.Болд, найруулагч Н.Наранбаатар нар. Эдгээр эрхмүүдийн туурвисан уран бүтээлийг нь харахад нэг зүйл эрхгүй бодогдоно. Тэр нь “Монголын төр шагналаа залуусаа сайн зүйлд дуудаарай гэж олгосон юм уу аль эсвэл садар самуунд уриалаарай гэж соёрхсон юм болов уу гэх гайхшрал.

Монголчууд эртнээс гуя хасаа гаргасан зүйлийг цээрлэдэг. Гэтэл телевизүүдээр бүхэл бүтэн төр нь соёрхсон хүн Монгол түмнийг хувцасгүй нүцгэн байхыг уриалан дуудаж байх юм. Энэ зүүд үү? Юу болоод байна вэ? Та минь ээ. Д. Болдын хамгийн сүүлд гаргасан “Хувцасаа тайлаад шид” цомог болон цомгийн нэрээр нэрлэгдсэн дууны дүрснээс харахад, Монгол улсын Ерөнхийлөгчийн “Давхар дээл” тайлуулах гэсэн санааг энэ бүтээлдээ тусгах гэж зааврын дагуу оролдсон ч мань эр бүтэлгүйтсэн нь илт.

Далд санаагаа ойлгуулах биш энэ нь бүр Монгол түмнийг доромжилсон бүтээл болон хувирсан нь хармсалтай. Олон нийтэд нөлөөлөх гэсэн Д.Болд ба түүний нөхдийн далд бодлого, санаа нь ингээд л гүйцэлдсэнгүй. Ийм зүйлд Монголчууд тархиа угаалгахаа нэгэнт больжээ. Залуус зөв зүйлд тэмүүлдэг, хийж бүтээхийг эрмэлздэг тийм л цаг үе ирж.

Бас нэгэн жишээ дурдахад, Найруулагч Н.Наранбаатарын саяхан дэлгэцэнд гаргасан “Сүүлчийн шөнө” кино нь мөн л олон нийтэд таашаагдсангүй. Монголчуудыг гурван үеэрээ завхайрч, нууцаар амраглаж яваарай гэх гээд байна уу хэмээн үүнийг хүлээж авч байгаа хүмүүс олон байна. Ингээд бодохоор саяхан шагнал авч олныг шуугиулаад авсан “Мисс” хүүхэн эдгээр эрхэм соёрхолтуудаас дээр санагдах боллоо.

Сүүлийн үед МУСТА хэмээх цолыг баруун солгойгүй олгож, ёстой л нөгөө “Богдын боорцог” гэдэг шиг тааралдсандаа тарааж яваа Ц.Оюунгэрэл сайдыг энд дурдалгүй өнгөрч болохгүй нь. Залуус нийгэмдээ ямар үлгэр дууриаллыг үзүүлэв гэдгийг нь үнэлэхээсээ илүү, зүгээр л өнгө мөнгөний өмнө бөмбөрч, өөрийн тааллаараа, сэтгэлийн хөөрөлдөө дулдуйдаж, “хэтэрхий сайн” ажиллаж байгаа юм биш үү та? Сайд аа!!!

Энэ мэт мөрөөрөө явж байсан залуусыг шагнал хэмээгчийн гайд унагасан МУ-ын Ерөнхийлөгч Элбэгдоржийн нэр залуусын дунд салбарын сайд, соёрхолтуудынхаа хамт навс унасаар байна. Хүмүүс ээ, шагналаас л холхон яваарай. Гэнэдүүлж, гэнэтхэн өгч мэднэ шүү!, цаадуул чинь.

Эх сурвалж: Шуурхай.мн