МХЕГ-ын байцаагчид хийсэн хоёр шалтгалтынхаа дүнд үндэслэн эмч нарыг шалгуулахаар болсон байна

ГССҮТ-ийн эмч нар улсын эмнэлгээр бизнес хийж хувийн эмнэлэгтээ их хэмжээний ашиг ол­дог болжээ. Энэ тухай ГССҮТ-ийн даргын үүрэг гүй­цэтгэгчээр зургаан сар ажил­ласан Ц.Энхбаяр эмч ийнхүү хэлж байсан юм.

Тэрбээр “Гэмтлийн эм­нэлгийн хамаг эрх мэ­дэл хэдхэн эмчийн гарт ор­чихсон, түүнийг нь илчлэх гэхээр намайг зайлуулж байгаа юм. Эмч болгон хувь­даа эмнэлэгтэй. Түү­гээ­рээ өвч­төнд үйлчилж ашиг ол­дог” гэж хэлж байсан удаатай.

Тэгвэл түүний хэлж байсан энэхүү үгийг МХЕГ-ын байцаагчид шалгалтаар тог­тоосон байна. Тодруулбал, өнгөрсөн пү­рэв гаригт МХЕГ-ынхан бүх шатлалын эрсдэлтэй үнэлэгдсэн эмнэл­гүүдэд шалгалт хийхэд өнгөрсөн зургаадугаар сард гарч байсан алдаа дутагдал дахин ГССҮТ-д илэрчээ.

Өөрөөр хэлбэл нэр бүхий эмч нар улсын эмнэлгээр бизнес хийж байсан нь илэрсэн гэсэн үг. Уг нь ЭМЯ-нд гарсан зөр­чил дутагдлын талаарх мэдээллийг хүргэж байсан ч өнөөдрийг хүртэл ямар ч арга хэмжээ авалгүйгээр нэр бүхий эмч нарыг улам ч ихээр өөгшүүлсэн байх юм. Ингээд тус газрынхан хийсэн хоёр шалтгалтынхаа дүнд үндэслэн эмч нарыг АТГ-т шалгуулахаар болсон байна.

Тус эмнэлгийн мэс заслын эмч Өлзийбаяр, Сүхбат, Мөнхсайхан, Жаргал­­сайхан Мөнхбаяр, Батзориг нар гэр бүлийнхээ компаниас эм хангамж ний­лүүлээд зогсохгүй, эмийн сангаар дам­жуулан нийлүүлэлт хийл­гүйгээр хиймэл үе, имплант хэрэглэдэг байсныг нь МХЕГ-аас тогтоосон юм.

Түүнчлэн тэд үе суулгах хагалгаа хийхдээ хоёр өөр үнээр хийдэг байжээ. Өөрөөр хэлбэл тэд эмнэлгийнхээ нэг дав­харт 4600ам.доллараар хийдэг бол нө­гөө давхартаа 3600 ам.доллараар хийж байжээ. Даварсаар, давар­саар Дагвын оронд гэгчээр тэд хагалгаа хийдэг өрөө­нүүдийг хүртэл хувийн мэдэлдээ авч улсад орлого оруулах биш зөвхөн өөрс­дийнхөө халаасыг түнтийлгэдэг байсан нь ийнхүү тэднийг АТГ-т шал­гуулах үндэслэл нь болсон байна.

Харин АТГ-аас хагал­гаа болон хагал­гаанд ашиг­лагдсан гэх эд зүйлсийн тооцоог гаргаж ирэхийг шаарджээ.
Дээрх эмч нар Эрүүл мэндийн тухай хуулийн 28 дугаар зүйлийн 28.4.3 дахь заалт, 26 дугаар зүйл, Эм, эмнэлгийн хэрэгслийн тухай хуулийн 11 дүгээр зүйлийн 11.1.1.дэх заалтыг, Эмнэлгийн мэргэжилтний ёс зүйн хэм хэмжээг баталсан Эрүүл мэндийн сайдын өнгөрсөн оны 496 дугаар тушаалыг зөрчиж байна гэсэн үг. Тухайлбал тус эмнэлэг өнгөрсөн оны долоодугаар сараас эхлэн энэ оны зургаадугаар сарын 03-ныг хүртэлх хугацаанд 357 хүнд түнхний болон өвдөг­ний үе солих хагалгаа хийжээ. Үүнд гэмт­лийн гаралтай, өвчний улмаас түнхний үе солиулсан 129, гэмтлийн гаралтай бус өвчний улмаас хамааралтайгаар 228, үүнээс түнхний 10, өвдөгний үе солих хагалгааг 218 хүн хийлгэсэн гэсэн мэдээлэл бий.

Уг нь Монгол Улсын Засгийн газрын 2012 оны 184 тоот тогтоолын хоёрдугаар хавсралтаар үений протезийн үнийн жагсаалтыг батлахдаа хиймэл түнхний үе зургаан сая, хиймэл өвдөгний үений үнийг таван сая төгрөгөөр баталж Нийгмийн халамжийн сангаас ахмад настан, хөгжлийн бэрх­шээлтэй иргэдэд олгогддог юм байна.

Хэрвээ Н.Удвал сайд хувийн бизнесээ цэцэглүүлж буй дээрх эмч нарт дорив­тойхон хариуцлага тооцсон бол өнөөдөр нэр бүхий эмч нар улсын эмнэлгийг ашиглан хувийн бизнесээ цэцэглүүлэхгүй байсан нь ойлгомжтой.

Түүнчлэн эмч нар хяналт шалгалт хийсэн нэр бүхий МХЕГ-ын бай­цаагч нарыг элдвээр доромж­лон баалсан байдаг. Энэ талаарх мэдээллийг тус газрын байцаагчдаас авах гэсэн боловч “Биднийг гэмтлийн эмнэлгийн эмч нар хангалттай доромжилсон. Тэгээд ч бид энэ тухай мэ­дээллийг өгсөн учраас дахин ярих нь илүүц байх” гэж цааргалсан юм.

Өмнө нь хэвлэл мэдээл­лийн хэрэгслээр “Үе суулгах хагалгаа бизнес болжээ” гэж бичиж байсан боловч үүнийг ГССҮТ-ийн эмч нар маш ихээр үгүйсгэдэг байсан юм. Тэгвэл одоо тэдний хууль бус үйлдэл нь ил болж хуулийн байгууллагад шалгагдах боллоо. Товч­хондоо хувийн бизнесээ дам­пуурна гэж бодсон хэсэг эмч нар “шинэ захирал хүлээн авахгүй дотроосоо захирлаа сон­гоно” хэмээн үхэн хатан зүтгэж байсан нь үүнтэй холбоотой аж.

Үнэн хэрэгтээ гэмтлийн эмнэлгийг тойрсон олон жижиг хувийн эмнэлгүүд бүгд эндхийн эмч нарынх. Тэд ГССҮТ-өөс арай бага өртөгөөр хагалгаа, эмчилгээ хийж хөөрхөн хэдэн төгрөг тоншчихдог арга ихтэй хүмүүс.

Хатуухан хэлбэл гэмтэж бэртэж, яарч сандарсан, өвчиндөө шаналсан хү­мүүсийн зов­лонгоор ха­лаасаа түнтийлгэх нь тэдний сонгомол нэг арга гэж хэлж болно.

Ард иргэдийнхээ өвчин зовлонгоор бизнес хийсэн эмч нарын балгаас болж одоогоор үе, түнхний мэс засал хийхийг зогсоогоод байгаа.

Тиймээс энэ мэтчилэн улсын эмнэлэгт ажилладаг эмч нарын хувийн биз­несийг төр засаг анхааралдаа авах цаг нь аль хэдийн иржээ. Уг нь Эрүүл мэндийн салбарт ажилладаг эмч нар Төрийн байгууллага болон хувийн хэвшилд зэрэг ажиллаж болохгүй гэсэн журам гарч байсан ч мөнгөтэй эрхмүүдэд үйлч­лэхгүй байсаар байгаа юм.

Р.Саруул

Эх сурвалж: