Манай нийгэм нэгэн үеэ бодвол гэрэл гэгээтэй, шүтэх, харах сонсох юмтай болсон хэмээн хөөрцөглөдөг нь худлаа биш аж. Чингисийн удмын Хунтайж тодрохоос эхлээд юм юм л болж байна. Мөнгөгүй болчихвол Б.Сарандаваа хатагтайд очоод мөнгө төгрөгөө дуудуулчихна. Мөнгө нь авгай хүүхний халаасаар урсаад байгаа түшээд хүртэл очоод нэг сан тавиулчихаар болоод явчихна. Олон хэл сурах гэж олон багш хөлсөлж, дөрөв таван жилээр сурах ч хэрэг алга. Арго багшдаа очоод 25 хэлээ тэр дор нь сурчихна. Царай зүс энэ тэрд бол санаа зоволтгүй. “Орифлем”-ын  Оюунгэрэлээр нэг сайн үйлчлүүлчихэд л хангалттай.

Суу билэгтэй ухаантай хүүхэд төрүүлье, сод байя гэвэл З.Бат-Отгонд хандахад л болно. Тэр ч бүү хэл манай Төрийн түшээдэд хүртэл ийм ид шидтэн бий. Хэрвээ та тэнгэр дээд язгууртан Өүлэн эх, Бөртө хатан, Дондогдулам хатантай уулзъя гэвэл УИХ-ын гишүүн Д.Арвинд хандахад л хангалттай.

Энэ мэтчилэн манай нийгэм хачин сайхан болчихсон шүү дээ. Эдгээр зүйлийг яах гэж дурдаад байна вэ гэвэл манай Төр дээрх шидтнүүдээ ашигламаар байгаа юм. Мөнгө төгрөг хомс, валютын ханш өндөр болчихсон энэ үед муу “фортуна” Н.Батбаяр, Ерөнхий сайд Н.Алтанхуяг, Сангийн сайд Ч.Улаан нарыг л зүхэх юм. Цаадуул нь ч ой муутай юм даа, зайлуул. Хажууд нь ийм сайхан улс аж төрж байхад очоод нэг сайн сан тавиулж, лекцэнд нь суучихгүй юм.

Шуудхан хэлэхэд Б.Сарандаваагаар Эдийн засгийн хөгжлийн сайд Н.Батбаярт нэг сайн сан тавиулж, түүний лекцэнд нэг сар суулгамаар байгаа юм. Яадгийм. Лекцных нь мөнгийг татвар төлөгчдийн мөнгөнөөс л гаргачихна биз. Эсвэл бонд гаргасан ч болно. Ер нь Ерөнхий сайд, Ч.Улаан энэ тэр ч гэсэн суувал таарна. Төрөөс тусгай хөтөлбөр гаргаад зохион байгуулсан ч болно шүү дээ.

Одоо тэр өөрийгөө эмэгтэй Чингис гэх нь халаг байгаа З.Бат-Отгоны лекцэнд ССАЖ-ын сайд Ц.Оюунгэрэлийг олон цагаар суулгамаар байгаа юм. З.Бат-Отгон ямартай ч манай Соёлын сайд шиг хэдэн хэлхээтэй ясыг үндэсний их соёл, өв уламжлал хэмээн эргүүтэхгүйсэн дээ. Тэр Хууль зүйн сайд Х.Тэмүүжин гэж нэг дүүрчихсэн нөхөр байна. Түүнийг Арго багшийн хичээлд суулгаж, хормойн явдлыг нь Хунтайж П.Даваанямаар засуулж, хир буртагийг нь “Орифлейм”-ийн Оюунгэрэлээр нэг сайн угаалгах хэрэгтэй. Дэргэдээ ийм дэлхий шиг хүмүүстэй байж тэднийгээ нэг сайн ашиглаад ав л даа.

А.Гал