Өнгөрсөн оны 11 дүгээр сард sonin.mn сайтад нийслэлийн 25 дугаар сургуулийн захирал асан, одоо 44 дүгээр сургуулийн захирлаар томилогдоод удаагүй байгаа Ж.Чимэдзаяагийн авлига, албан тушаалын хэргийн талаар бичсэн байлаа. Сэтгүүлч уг мэдээллээ санаанаасаа зохиогоогүй нь мэдээж. Эрхэм захирал Ж.Чимэдзаяа 25 дугаар сургуульд хэтэрхий дураараа дургиж дунд чөмгөөр жиргэж байжээ. Иймээс нийслэлийн удирдлага, Боловсролын газрын дарга нар нь түүнийг 2014 оны 2 дугаар сард захирлын үүрэгт ажлаас чөлөөлсөн байна. Энэ тухай Нийслэлийн засаг дарга бөгөөд Улаанбаатар хотын захирагч Э.Бат-Үүлийн Б/14 тоот захирамж гарчээ. Уг захирамжид “Боловсролын тухай хуулиар хүлээсэн албан үүргээ хангалтгүй биелүүлж, дотоод хяналт шалгалт сул, цалин урамшууллыг үндэслэл муутай хавтгайруулан олгож төсвийн хөрөнгийг үр ашиггүй зарцуулж, ажлын хариуцлага алдсан тул Сүхбаатар дүүргийн 25 дугаар тусгай сургуулийн захирал Жамъянжавын Чимэдзаяаг 2014 оны 02 дугаар сарын 05-ны өдрөөс эхлэн захирлын үүрэгт чөлөөлсүгэй” гэсэн байв. Хариуцлага л бол хариуцлага. Даргын шийдвэр хариуцлагын хэмжүүр.

Тийнхүү ажлаас хусагдсан Ж.Чимэдзаяа дээгүүр доогуур чавхдаж харайсаар 44 дүгээр сургуулийн захирал болсон нь эгэл жирийн багш, эцэг эхчүүдийн чихийг дэлдийлгэж, нүдийг бүлтийлгэж орхив. Хариуцлага алдаж нэг сургуулийг тараахаа шахсан түүнийг Боловсрол шинжлэх ухааны яам нь ивээлдээ авчээ. Эрхэм сайд Л.Гантөмөр хаширт “хайр” зарласан юм байлгүй. Улсын хэмжээн дэх 40 гаруй лаборатори сургуулийн нэг болох 44 дүгээр сургуульд Ж.Чимэдзаяа мэтийн гологдлоос өөр олигтой хүн “олдоогүй” бололтой. Уг нь хүний нөөцийн судалгаа тооцоонд нь Ж.Чимэдзаяагаас өөр захирал хийчих арай дөнгүүр, хариуцлагатай хүн байж л байсан юм билээ. Хотын удирдлага нэгэнт ажилдаа тэнцэхгүй гэж халж хаяад хэдхэн сар болж байхад буцаагаад захирлын ажилд томилохыг бодоход Л.Гантөмөр сайд, түүний албатууд нэлээд том ашиг сонирхол дээр нэгдсэн болов уу. Лаборатори сургуулийн захирлыг томилохдоо яам нь голлон тоглогч болдог болохоор ингэж ойлгохоос өөр аргагүй юм. Сайдтайгаа ийм найраа хийсэн Ж.Чимэдзаяа 44 дүгээр сургуулийн багшлах бүрэлдэхүүний өмнө хүрч очоод ядаж тухайн сургуулийн талаарх өөрийн стратеги төлөвлөгөөг танилцуулаагүй гэж байгаа. Мөн 44 дүгээр сургуульд захирлын ажлын байрын шалгаруулалт зарлагдаагүй байж. Гэхдээ 44 дүгээр сургуулийн өмнөх захирал Л.Сувдаа гэгч нь бас л бөөн будлианы эзэн бөгөөд түүний идэж уудаг, шударга сайн багш нараа ад үздэг, хавчин гадуурхдаг, тагнаж туршдаг, дээд газрууд, дарга нартаа дандаа худал мэдээлэл өгдөг гээд есөн шид нь бүрдсэн амьтан байж байгаад хусагдсан нэгэн. Л.Сувдааг зарим нь “Сонгууль Сувдаа” хэмээн “өргөмжилдөг” байв. Учир нь тэрбээр сонгууль болгоноор МАН-даа болон АН-д ч юухан хээхнээр үйлчилдэг байсан юмсанж. Ж.Чимэдзаяа нь ч түүнээс дутахааргүй “улс төрч”эмэгтэй. Боловсролын байгууллага улс төрөөс ангид байх учиртай ч цагаа тулахаар хууль, зарчим марчин ёстой лөөлөө болдог юм байна. Нэг гологдолыг нөгөөгөөр нь солиод л болоо. Хотын захирагч Э.Бат-Үүлийн захирамж үнэндээ хог новш болж байна. Яам, хотын захиргаа, Боловсролын хэлтэсийн ажлын уялдаа гэж юм алга. Нэг үгээр хэлэхэд, Л.Гантөмөр сайд болон түүний албатуудтай хуйвалдаж чадсан нь хотын захирагчийн захирамж руу шууд нулимдаг болсны нэг тод жишээ энэ ажээ.

Иймэрхүү бүдүүлэг, зарчимгүй байдалд 44 дүгээр сургуулийн багш нар дургүйцэж байна. Тиймээс тус сургуулийн багш нар “Бид 25 дугаар сургуулиас хөөдсөн хүнийг сонгон шалгаруулалт хийхгүйгээр шууд томилсонд харамсаж байна. Ёс зүй, хууль, журмаа зөрчдөг захиралтай хамтарч ажиллахгүй” хэмээн сайд Л.Гантөмөрт хандан гомдолоо илэрхийлээд байгаа ажээ.

 Б.Отгонбаяр

Шуурхай.мн